2
1 Lene dikan <<Ma sikwei bisipwoi singon leu binhyepo singon dorti tut mun di singat singwes eisi.>> Noro mun dima cem mun di bit bon ingon dorti tut kan bi ri. 2 Leu api dingon huk niti bipia nipa tut ningon ngganti kin ningon mbumti ter leu yam bi. Lene mun di dingon pri kep cem bon ninyeng bi. 3 Dibungwam mem gima dingat dingwes ei nidut ba anggur ngeisi kin niyem pesta nindigsi. Dikan bigya gima ne puig di kei bibor kei mem tungwatu nya rin ba, ibingat ingwes ei ide niyaijo cunti ei dihyeisi dini. 4 Dicuk ditde limwa nya leu binhyepo inda jo kep midyai nindig bibor ba, ingot ig mang mem da ba, ita ba anggur kioi nya ei miai ba anggur nghousi. 5 Dicuk yok ba, igyai miai ba, ita biei hi gom hi gom di ngat ningat bidem ninyeng hagom eisi. 6 Dicuk yok ba, itig urwer nya mem minyei leu binhyepo itau minyei bibiprok miai mitou kin biei mmon nghousi kin miai ngot dima yok. 7 Diba mitiei biwim awak nya imang bibor. Awak ngot di dipek yok he nya kin gi isrek tut yok ei ditde ig cem. Mindhe-ndhe nimuhup tu di dinyeng tut nya mang bibor ba, nimangti dor njiriek yo di timiei minu ndig Yerusalem di nipou nya kikau kwei bipek ammani kep ide mindhe-ndhe nya nimangti. 8 Diba dinyeng biti perak kin mas di nibou ndig nya ibigo belasten gau ide minu bidem minu di dinyeng tak kep nya hagom. Nipai diun cig kin nipai diun pmem nya ipai doia nya ba, ibiyai dingon bikei. Diyai ditnem ndrim nya imang bibor bit leu dingut kanti.9 Dipai jit bipia diwer ndigpoi di ninyeng jei dor njiriek yo di nipou yo ibong ei minu ndig Yerusalem yahagom. Lene ditde ningon kiti pren hanyen leu dingonti bi sren. 10 Diyai mun nyeng hagom bit leu dijoi sutti. Doom dingonti leu mun nyeng di dingat dingwes eisi nya kan bi. Lewo dinggei ngwig sut ningat di ntun ditde nicom nahanggwap tutti nya hagom. Ba, ninggei ngwig sutti pima ne dimuhup di ditug ndei ri. 11 Noro niabiati bu ne dingkwei bidiyok diyai kep midyai di diyai nya kin dahanggwap di dicom ei midyai dima yokti di put hagom. Leu api dingon huk niti bipia gima ne mun di bit bon dingon dorti tut kan bi. Dem kep nok niyon igkep hou nimig.c 12 Mbro nok gima lo, no di kui nok nibou ndig miyai kep nibou ndig gi nipou nya igyai kepti nya he.
Leu api dikan <<Ningon ki kin nibbwe-bwausi kin ningon mbumti ndo mindei binye i? 13 Ningat ne dikan tut lo, ningon kiti kei dor njiriek ningon mbumti ba, gima noyam kin nipigati di kei di dor njiriek nidinditi.
14 No di ningon ki ngat puig dima mbut kak. No di ningon mbum mbut nok no di niyai tu di tibap-tibap nyen he.>> Noro dikan tut bipia mun di mipek kep mem yo dima yahagom noyam. 15 Apino sikan <<Mun di mipek kep mem sa di Allah kos tut ei mem sa noyam kin mun di mipek kep mem no di ningon mbum. Gima rino side ningon kiti nya hagom bie ndam mindei i?>> Leu api jo nibreisi bipia siba side ningon kiti bitug ndei mun nyeng hi bi. 16 Tungwatu nya ibbwe ser no di ningon mbum haninyai lene igyok ngon kep no di ningon ki cem bi. Mimbrek-mimbrek lene nyeni yahagom mipren leu tungwatu ibou ngwakti. Yo di ingon ki kin yo di ingon mbum cem yuug dor nimaiti. 17 Gima rino diyaijoti bon nisinati bi. Diba nitok bak niyaijoti lewo bit bon dingon dorti tut kan bi. Gima dem kep nok niyon igkep hou nimig.d
18 Dikan kros bipia ningat di mintun midyai di diyai nya him kin niyai nimuhup di ditug ndei cem bon ninyeng mem da bi. Lewo suar dikes gima yok hagom mem no di ya luei dohoti. 19 Ba, dikan bipia no di ya luei dohoti dima ningon ki e, he ningon mbum e, dikan tut bi. Mbro nok gino ningon ki e, he ningon mbum lo, ninyeng mitak kep ningat di dicom dahanggwap tut kin ningat di diba ningon di ki biyai mem nijam di diyaijo ei dihyeisi dini. Ba, gima cem mun di bit bon dingon dorti tut kan bi ri. 20 Nogindini dinso danti tut gi diyai midyai sindem bibor. 21 Lewo tungwatu nya iba ide ningon kiti kin ide nintin kimboti kin ide nibibon mun kanti hagom biyai midyai sindem ba, ningat ntun him. Noro niabiati bu ne suar ikes ide ningat di icom yahanggwap tut nya hagom ei mem no di com nahanggwap tut mun hi bi sren. Gima yok bon ninyeng ba, igbit bi cem. 22 Tungwatu dihyeisi dini igyai kep midyai di buhun ba, nggruk bijo kikau. Noro ningat di itug ndei di ibikon inyeng rigitou i? 23 Mun di inda jo kep di igyai ei nijam di igyaijo ei dihyei ninjek dip dini biyai inghuisi di wei kin ingon di sibui biyok he. Ingon digit tut bikwop mmun. Bit bon ingon dorti tut kan bi.
24 Gi hi di kei mem tungwatu nya dor njiriek mun nindigsi rino njita di igyem kin ndia ngei di idut kin gi ingat ingwes ei ningat di itug ndei tug hon ide midyai di igyai nya. Ba, dingon huk niti bipia gima cem mun di Allah yai binye ri. 25 Gino Allah mpu nye bi lene bit bon igyem njita ba, ingon nggei-hi-nggei cem kan bi. 26 Allah yai ningon kiti kin nintin kimboti kin ningon nggei-hi-nggeisi bak no di pwoi Allah ningona. Noro Noni cuk yo di ibon sisar nya igyai midyai ba, inggok njita bigyai ningat keyam kui ig gudan mem gima ikes bak no di pwoi Allah ningona. Gima hagom ne mun di bit bon dingon dorti tut kan bi rin ba, dem kep nok niyon igkep hou nimig.e