Nipingokti mem nibou ndig nya
31
1 Gini ne Lemuel di nibou ndig mben Masa nipmem ningginausi mem nimunggwom ri.2 Dimunggwom na e, nani ne dingon kieti rin ba, ditde nisrek tut nati ne nibuhup ditde naditi ri. Midipai mindei bina i? 3 Ma aba sop nya bikek ade nisindemti ba, agimahap ade mun di amati biyok au. Lewo nibou ndig imang bibor isar drek dip sop nya tu. 4 Lemuel e, ma ayok ngon kep! Ma nibou ndig nya idut ba anggur ngei di pu yok ba, ingon pri kep pes ngei di idut bipu yok cem au. 5 Leu gino nibou ndig nya idut pes ngei di pu yok ne ibbwe ser nikos tutti nya apino igiyok igyai kep yo di isindem bi bitut ide mun di isuar nya bi. 6 Pes ngei mem yo di inggwen di ison dideu igyaijo ningwig honti tu kin yo di ingon dahat leu drek dip ide ningon ngguk biborti. 7 Idut pes leu binhyepo ibibbwe ser ide nuhui mbumti kin ide mun di buhun di biyai ide ningon ngguk biborti.
8 Ma ambrap gau yo di iji buhun di imbrap gau yonti bi nya. Ma aya srak ko hagau yo di isindem bi nya yahagom. 9 Ma ambrap gau yok lene anok nikei di ba ningon di gom bimbus ingonti. Ma anyohou mun di bitut nuhui mbum nya kin tungwatu di yo di hiter ico kep yok nya.
Sop di joi bibor
10 Nggruk bibor mem tungwagom um sop di joi bibor ba, wak noni nok nitnem. No di um sop dima ba, wak nok nitnem noyam kin no di tau kep tig permata di bon ninggap leusi.
11 Nijjep ndwau sut mun nyeng hi bi lewo ba ningon com nitnem nindig bibor.
12 Nitnem ba nimbuk bikak noni bi sren noro singat tut noni kikau ug bipek niyaijo ningwig honti.
13 Nitnem ta nibou ei ninggok mong rami kin domba nintati leu api ninda jo kep minyahas ba, bien kikau.
14 Noni ba ninyeng bitit njita kwei leu minu ting bibor noyam kin nitri-nipek mun cig ide kibar minyei nya.
15 Noni kiju mem ha yausi bingei njita mem nide ig bei nsi nya leu api ndo midyai nya bak nide awak nya.
16 Noni yok niyai kep mpia ttou nsi gom bipek hanjop nsi gom lene ba mitiei di noni tug ndei bita ba anggur nikioi eisi.
17 Noni joi bibor ba, sindem cem ba, ta nibou ei midyai nyati.
18 Noni kan tut bipia mun di bon bou ninda him hagom bon ninyenga. Ninda jo kep midyai nide nya kikau ug bipek mmun mau.
19 Noni dip mong ba, bibien nide minyahas kan.
20 Noni drui bou ngwak tut mun di nyeng tut bi noro ngondut nuhui mbum nya bimpu yok tut indwausi nya.
21 Noni krau ningon tut bed di biang hou nitausi bi lewo nap sinsun dut bak nide ig bei nsi nya yahagom tu.
22 Noni bien ban di ndok bingig kep nibongti bijuk sinsun nghei nta di ba minyahas linen di dia-diau kei binap mem nonti.
23 Nijjep ninyeng jei ba, noni srig nibou nya di inyeng tak kep minu ndig dima ikieti.
24 Nitnem nap sinsun kin bang di ibikri kep intig bou bitri bak nitri-nipek mun cig nya.
25 Nihyet buhun ba, tungwatu nya ikon ninyeng cem lene gikrau ningon tut mun di mipek kep mem noni ei nidipti bi.
26 Noni ba nihyet di nem-nnai kin ningon kiti cem bipingok tungwatu nya ingonti.
27 Noni brim ningkek bikwop njap ngwa hagom binyohou nide ig bei nsi nya.
28 Nimunggwom bat nya inggap leu noni ba, nijjep cem nggei sut noni.
29 Nijjep pai <<Sop nya imang bibor igyai munti nya kei noro ayai munti nya kei bibor kei dor njiriek nindigsi nya yahagom.>>
30 Niimaisi di kei ne iba ingon com bi lene nuubbuti mipror yon noro sop di bit TUHAN nihyet ne suar ma tungwatu nya ikon ninyenga.
31 Ma jibirop bak noni drek dip niyai munti di kei bibor nya lewo dem mem gima tungwatu nya bidem minu ikon ninyenga!