Agur nisimbot datti nya
30
1 Agur di nicig Yake leu minu ndig Masa simbot dat ningon kanti nya bipai <<Allah e, dinghuisi wei. Aye! Dinghuisi wei! Ditde nisindemti ngwig leu da!2 Dingon mbum noyam kin mindhe ba, dingon dorti tut mun nyeng hi bi.
3 Dingon ki bi bidingon mbum tut Allah.
4 Tou rikui ug ei gwamti bijuk hanyen kwei su i? No dima kat hou nimig ei ninda bia bei tu e, he tau minyei binggai hagom ei nide sinsun nindati tu e, he kos tut dihyeisi dini nohon keti nya e? Gino akan tut no dima ninyeng kin nimunggwom bat nya inyeng ne tou yo i?
5 Allah yai mun nyeng hagom bit leu nok gi Noni preu ei mem nye tu. Noni noyam kin mun di ibipukep tibor ninggwenti nya mem yo di ikwei gwam coi Noni. 6 Gino aba ahyet bikum ei Noni nihyetti ne Noni misok kep na lene bindo brei bipia nani ne niris kep mun cig ri.>>
Nisimbot datti hi kin bu
7 Allah e, dahara na tut mun nyeng can nipou tirigi dimai bigyo. 8 Ma asindui sut ba, diris ei tungwatu nyati bidoom ser au. Lene ma asindui sut ba, dinyeng bibor ba, duhui mbum bibor cem au. Ayai mun di dindwau sut he bida lene ma abikum eisi au. 9 Leu gino abikum eisi ba, dinyeng bibor lene midikan ei dingonti bipia disuar na di Allah bu bi. Ne gino duhui mbum bibor ne leu ma dinggimang ndiyok lene gima bindei ba, tungwatu nya ingwes pri gau Na.
10 Ma aba ahyet yai awak hi ei niceu noho bei au. Leu ma awak dima nihyet miwer mpiahi tut na leu api ade nitunggweisi dima buhun mem na.
11 Tungwatu nya bihi ighyet wer mpiahi tut icig bat nya ba, ingkek ndok tut ipmem bat nya.
12 Tungwatu nya bihi ikan bipia ingon kwes-kwau noro irom ndok.
13 Tungwatu nya bihi ikan bipia yoni ne ikei-kau-kei. Mei! Ingon jo kep ide nikei-kau-keisi!
14 Yo di isibut bibor nya ima mun di bahati tut yonti tug hon nipos mitiei kin ndigban leu yo di yuhui mbum nya kin yo di inghuisi jet nya.
15 Adrom bon nipmisop bat nya ibou can bijem yahacem inyeng <<Mem dani!>>
Mun nyeng bitai di bit bon ingon cut hon mun di jo biyoni kan bi no rinaha. 16 Minu nimai nya ide kin sop pijet kin dihyei di ngga-nggau di nggobiau sut biget kin hum di bit bon hi mu kan bi.
17 Gino tungwagom nihyet wer mpiahi tut nicig-nipmem nya di inghim koi su lene ma tungwatu nya injei noni ug ei nisai leu binhyepo mini wou nya ipuk niyai njep leu ba, hacam krubri nya ipuk ningut nok ide mun di igyem.
18 Mun di mindur ninyeng bitai nggruk bibor ba, bit bon dingon dorti tut kan bi.
19 Hacam krubri di ko-ko nyen ei mpia-bbed him kin wou di srei ei tig ninjek dip kin kibar minyei di piar bimbut ei minyei ngwa dip kin pinai pilei-sop gwam nitta pilei di impig bou keyam cem. 20 Sop wak cam di ningon gom tut nijjep bi yem njita tut pinai hiter leu su lene ug kek minyeiti leu api kan <<Sibon mun tunggwei hi bi.>> Gima ne niyai kepti ri. 21 Nggruk bibor mem tungwatu dihyeisi dini hagom isindui sut mun nyeng bitai dini juug. 22 Awak di ya luei nibou ndig nohoti kin no di ningon mbum di ma mun nyeng hagom di ningon pri kep, 23 kin sop di tungwatu nya yahagom ingon kinei sut lo, ug wak nijjep kin awak sop di pos nide inyinai nigwamti biya luei nohoti. 24 Mindhe ninyeng bitai di ingut mien lo, intin kimbo yo rinaha ei dihyeisi dini. 25 Ako nya di isindem bi noro inju njita keyam ei mem yonti mem bed di biang mpia ngeisi. 26 Minmei mbrei nya di isindem bi noro itot yaham ei mbigdip ei tig nggreti. 27 Hai ceng nya di ibon ide nibou ndig bi noro ide nimpung nya injei bram yam. 28 Mipigig nya di jiba jinda bikat he noro ingat rin ei nibou ndig de ig. 29 Mun nyeng bitai imbutti bon ninggap leusi. 30 Mindhe singa di sindem bibor dor njiriek mindhe-ndhe nindigsi nya ba, gittin tut mun nyeng hi bi. 31 Kambir nikre nya kin guli hacig nya di iba ingon di jei bimbut. Kin nibou ndig nya di ikiju bigya ei ide limwa nya yoho bei. 32 Gino ade ningon mbumti bindei ba, angon ndig apino abitin ei mem ayai mun di kinei lene ma asok kep nanti! 33 Gino ampig-mpig nyen sapi do ngei di jo ei ampouti lene abindei ba, ntan bibor binok mentega. Gino abui hiter nuhwap ne ninggrom dimba. Gino abindei ba, tungwatu nya igga yam ne nani cem mporo asrig ide nibui yamti.