Allah ninyeng tak kep dihyeisi dini
98
1 Ma jipai doia di nijep bak TUHAN drek dip Nide niyai munti di bibon ninggap leusi nya! Noni ba Nide ninyeng jeisi kin nisindemti bibindei timek siceu nya tu.2 TUHAN tri tut bipia Noni bindei timek siceu dima bibindo tut Nide niteu nye bingwes ngunti bak ngkiai nya.
3 Noni krau kep ningon gomti kin ningon ngakeisi di preu ei mem Nide limwa di mben Israel. Tungwatu nya di igya bidem dihyei nisurti-nipekti yahagom ingat Allah nibindei timek siceu nyati bou igyai him tu.
4 Tungwatu dihyeisi dini hagom e, ma jimbos-hi-mbos mem TUHAN bijiba ningon di nggei-hi-nggei bipai doia bijibikon ninyenga.
5 Ma jipai doia nibinggei sut TUHANti ba, jiba nggong mbrei bikon ninyeng cem.
6 Ma jimiep pun mbrei kin kambir bou nggai ba, jibimbos-hi-mbos mem TUHAN di ide Nibou Ndig.
7 Muk ndigsi kin mun di joti nya e, ma jide kru nibimbiti bong. Dihyeisi dini kin mun di joti nya e, ma jipai doia.
8 Minyei pmem nya e, ma jittem jinda. Mbigdip nya e, ma jiba nimbos-hi-mbos bipai doia nibinggei sut TUHAN ei Noho bei.
9 Lewo TUHAN kwei bigwam nok nikei di ba ningon sren-srausi kin nisingatti bimbus ngkiai nya ingonti.