Mazmur 67

Doia nibipai sigyo bak Allahti

1 Doia mem no di ba nikek nggong mbreisi bibie tut doia nimpung.

2 Allah e, ma angon nggriu sut nye ba, anjei mun di kei binye cem. Ma aba angon di nem bitou kep nye,

3 leu binhyepo tungwatu dihyeisi dini hagom mikan tut angon kanti mem yok bikan tut bipia asindem mem gima ateu yok leu sisar ba, ayai niyaijo nijep biyok.

4 Dijoi sut gima tungwatu dihyeisi dini inggei sut Na di Allah ba, yahagom inggei sut Na.

5 Dijoi sut gima ngkiai nya yahagom ingon llei bibor ba, iba ingon di nggei-hi-nggei bipai doia lewo aba angon di sren-srau bigwam nok nikei mem tungwatu nya ba, abie tut bibikwop mben di ingat rin ei dihyeisi dini hagom.

6 Dijoi sut gima tungwatu dihyeisi dini inggei sut Na di TUHAN ba, yahagom inggei sut Na.

7 Njita ngat ningat bidem ide miaisi nya hagom tu. Nyende Allah njei mun di kei binye tu.

8 Allah njei mun di kei binye tu. Dijoi sut gima tungwatu dihyeisi dini hagom ikon ninyenga.