Nadi nahara mem gima Allah nyohou yok
54
1 Doia nibingginau di Daud pai ei mem no di bie tut doia nimpung. Ipai doia dini ba, ibibit nggong mbrei nibimbiti. 2 Daud ba doia dini bikiek mpe dino mben Zifi ikwei pai bak Saul bipia Daud no ku no bit yok.3 Allah e, ateu dani bidingwes ngun tug hon Ade nisindemti. Ambrap gau dingon ngunti tug hon Ade nisindemti.
4 Allah e, amiap kep nadi di dahara biNani. Angig atingou mem dihyet di dindat kep hwou biNani.
5 Lewo ngkiai nya sindi ikiju kwei bihwen da. Yo di ikon yonti inyeng injei siceu bigyai nimai bida ba, ingkek ndok tut Allah cem.
6 Noro Allah ne No di mpu da ri. TUHAN ne No di ya srak ko hagau da ri.
7 Noni mikes hukum ei Nide siceu nya dip tug hon yonti ide niyai munti di kinei bibor nya. Noni micok tut yok cem lewo ningon gom tut da.
8 TUHAN e, asingat kei. Midiba dingon titut bibon midut nindig mindhe ei nimbar hum dokti mem gima dibikuk da biNani ba, dibipai sigyo.
9 Ateu da leu mun di buhun tak da hagom bidingat lo, abindei timek ditde siceu bou diyai him tu.