41
1 Adem mem gima aba simper nindig bipos unggor di ninyeng Lewiatanc ba, aba kuk ngot nidwep kan e?2 Adem mem gima aba kuk mbrei bisrou nuhwap lene aba nikoisi bisrou niji kan e?
3 Noni hara na leu binhyepo akes noni bimbut e? He mikon ninda ser na e?
4 Noni mitto ei mem na e, he mipreu kep na bikuk no nok ade awak bijo ninno bijo kikau e?
5 Noni dem kep nok ha bigbehei di hek di angot nimig ba, apijuk di bindei ba, ade awak sop nya ingat ingwes eisi e?
6 Nipos kep wau cig nya ikwai mikkin tut noni e, he ma nitri-nipek mun cig nya mikos noni kukiau bibitri tungwatu nya e?
7 Adem mem gima aba ndra bidat ningkek kan e, he ma aba micim bidat nibou bitau nite hi e?
8 Gino angget noni mbigom he lene mporo ma angget noni bu bi sren. Bit bon angon prion ser minjina di cut igkep na dima kan bi!
9 Bikwop no di ngat unggor di ninyeng Lewiatan bou niyai him ningwes mien leu api mai tirimpoi.
10 Gino hi win noni lene noni ugwa-kwei ba, cig-cai. Mimbri kui no dima ningkek biya ei minjina dima noho bei kan bi.
11 Tou rihwen noni leu api ningwes ngun leu nuhui him i? Bitbon tungwatu bidem dihyeisi dini hagom ihwen noni bingwes ngun leu nuhui him kan bi.
12 Akwei ba, dipui mun bina tut unggor di ninyeng Lewiatan nimbumbati nya kin nisindemti nya.
13 Bit bon hi yai nide sinsun dut leu noni bidat sinsun pran di noni juk kan bi.
14 Tou ridem mem gima bindei ba, unggor dima hap niji di mpung tut nikwai di sindem bibor i?
15 Ninghim dem kep nok mun di tentara ibipukep ser tibor ninggwenti nya ba, hagom rap yam ba, nghai bibor noyam kin tig mma cem.
16 Hagom rap yam bingkiem-kiau. Bit bon hou coi ug ei ninggreti kan bi.
17 Bit bon hi nggek ninghim tuti nya di rap yam bingkiem bibor kan bi.
18 Tirigi unggor di ninyeng Lewiatan mihin lene ninjeng srei. Niyai piga kei ba, noyam kin mpia njap bigyoti.
19 Hum njeng di cig-cai kin hum mbom di jek nya hei leu nuhui a.
20 Hum mmup di noyam kin hum mmup di brou leu yeng jou tau leu nuhwap nsi.
21 Ninnei bindei njeng hum mbom ba, hum ninjeng srei kwei leu nuhui cem.
22 Nikra sindem bibor bibindei ba, yo di ittau kep noni yahagom ingon digit bibor.
23 Ningkek dip bon ninggriusi hi bi. Hagom ngkiem-kiau noyam kin ngkimom nitu di bit bon tungwatu nya inggek kan bi.
24 Ningon nddong kei binoyam kin tig ba, nghai bibor nok tig huk mbrei cem. Noni ttin tut nide siceu nya bi sren.
25 Tirigi noni kiju lene yo di isindem bibor nya ingwes mien ba, inghuisi jet cem.
26 Bit bon hi ba singau simeda kin micim kin singau tibor biyai nibok bak kan bi.
27 Lewo noni bibon ngkimom nitu noyam kin mintu-minta di mui ba, ngkimom-tembaga noyam kin biei di nggun cem.
28 Bit bon tungwa hi ba hampiap bijji noni kan bi. Gino hi ba tig bihwen noni lene noni ngat tig dima noyam kin mahai lep he.
29 Gino hi ba tom bibui lene noyam kin ba sinai meng gom bibui. Tungwatu nya iba micim bidat noni noro noni pa ndip yok.
30 Ninnan di nggai kep ninghopti noyam kin ampou kki di nggwen bibor bikilis igkropti binoyam kin biei ner di bon ninggwenti ba, tungwatu nya ibico kep gandum nintama.d
31 Noni bindei ba, muk ngeisi kiak noyam kin gungei biyon gau noyam kin mini di nirai kui biyon gau yeng.
32 Noni bindei ba, nohoti piga mpia ei ninghim dip ba, nirai kieng kep muk ningwa dip.
33 Bit bon ibinai noni kin mindhe-ndhe nindigsi ei dihyeisi dini kan bi. Noni ne mindhe di bit bon ttin tut hiter kan bi.
34 Ningwes om kep mindhe-ndhe di inggei-nggwang tut yonti nindigsi nya hagom lewo noni bon nonti tereu nok nibou ndig di ninyeng tak kep mindhe-ndhe di iten-pos nya hagom.>>