39
1 Ayub e, akan tut nijam dino kambir nungug him nya ipmem bat nya ibep yok e? Angig ayai kep rusa bigbehei nya tirigi ibep imien bat nya tu e?2 Akan bidem tut nijam di mindhe-ndhe dima nghop nipou tirigi ibep imien bat nya bigyo nijeisi e? Akan tut tto bou mem inghim dut ba, ibep imien bat nya e?
3 Akan bidem tut jam dino yoni mikuk yok bibep imien bat nya e?
4 Tirigi imien bat nya imahan ei iggum ndigsi ne mimbri kui ingkek ba, intek bingwig leu ipmem bat nya bingkwei hanyen bi sren.
5 Tou rikwek keledai bigbehei nya leu mun di kat yok i? Tou pas kuk tut yok bisindui sut yok ba, igya hak i?
6 Disindui sut yok ba, ibong-bong nyen ei iggum ndigsi bigya bidem ngoi nsim nghousi di briep bou him cem.
7 Keledai dima yok yoom yo nyahan ei minu ting bibor leu minu ndig nya di bon nilueng kwopti. Tungwa hi dima pijuk yok bimuhup lene ba yok biyai midyai bi sren.
8 Igya nyen bigyem kep abris ei abris ninghousi di jo nungug him nya binggok mahai meng di hei ugwai-gwai nok ide njita.
9 Mindhe lembu di muhup bi mice tut gima apijuk noni leu api aba noni biyai midyai e? Mindhe dima misindui sut ba, ajem noni ug ei ig kandanti leu api mibong eisi e?
10 Aba kuk mbrei bikim noni leu api abidip ba, abikkin dihyei mem nanti lene miba akikam bikam ade ngoi dumti cem mem na e?
11 Aba angon com noni tut nide nisindemti ba, ayok ngon mem gima noni yai kep ade midyai di buhun bibor e?
12 Ayok ngon mem gima noni ug yai gandum kwei leu beisi bikon hagom ei ninghat dip lene mbut tut ug ei ninsi di allet ningan leu nisina bai eisi e?
13 Mindhe ha unta ninyehei tittem sindem bibor noro bit bon ha unta dima mba noyam kin kindus mbrei kan bi.
14 Noni bep nidinggwei ei dihyei ninjek dip lene kes bijo ei sirima bimbut leu leu api bigum di dut mipijuk.
15 Ningon hukti tut gima tungwagom mico kep nidinggwei e, he mindhe di niten-pos mibindei kki nidinggwei cem bi e nya bi.
16 Noni bibon nimien tereu nok mun di nonti bep bi. Ningkek ndok tut gino noni com nahanggwap tut mikuisi.
17 Dani rino dibindei ba, ha unta dima ningon mbum lewo dipai tes ningon ki hi mem noni bi.
18 Noro gino noni dor sindem lene bit bon kuda nindigsi bitut yo di ibri bigwam dip nya yahagom yuhuk biyahatap noni kan bi.
19 Ayub e, nani rino abindei di kuda nya imbut sindem bibor e? Nani rino apai tes inta jei di ntun inggibi dip e?
20 Nani rino abindei ba, kuda nya ipri-pri nyen dem kep nok hai ceng nya lene yahara bibindei ba, tungwatu nya idigit tut e?
21 Nipou tirigi kuda nya ibipbur bibrim ingkek mem gi ikon pran lene ingon nggan mem gima ipri-pri nyen biroi dihyei ei mbang briepti.
22 Bit bon kuda nya ittin tut pran ba, inghuisi mpig sut kan bi. No di mem ninghat tut simeda sindem mem gima bindei ba, kuda nya ingkwei hon bi.
23 Yo di ibri bigwam dip ikrau minggwen di nggileng ba, jimjit cem ei indati.
24 Kuda dima yok iba itta di drui sut kin ingon di llei sut bimbut sindem tirigi pun mbrei tibim. Bit bon igiya igyati kan bi.
25 Tirigi pun mbrei tibim lene yahara leu mbro nok gino ikinyon ei nikon pranti bigyo lo, pran ninghap tibim ei ihwap nsi cem imiap nibou tentara di nihyet sra tut pran cem.
26 Ayub e, angginau hacam leu binhyepo ko-ko nyen tirigi kieng ninyehei bimba ug ei mpia nibiho kan e?
27 Hacam krubri bet ningon ei mem nicukti di tibim ei ahui him nipou tirigi noni tot naham ei mbigdip ei anai e?
28 Noni tot naham ei bor ngug di jo anai ei mbigdip nya ba, ku no nyahan ei hak di nggwen bibor nikieti.
29 Noni teu ei sirima bimian ser ug ei hantou-hantou binggok ser mun di yem.
30 Hacam krubri nya induk yam kwei bipuk nimai ngut di mpiei su lo, nimien bat nya idut ninggroma.