37
1 Sigau bindei ba, dinghuisi mpig sut ba, dingon cem pri.2 Jahagom jimiap kep Allah nihyet. Jimiap kru di tibim kwei leu nuhui him a.
3 Noni kes Nide kigyei bininjeng kieng kep mpia-bbed him. Noni pinak Nide kru di kigyei bong niti ug ei dihyei nisurti-nipekti.
4 Niabiati Allah nihyet di nok kru bong tug hon kigyei di ninjeng srei kin kru di cut ba, nugwei bong. Lene kigyei cut ba, ninjeng srei bram-bram yam bibit Allah nihyet di tibim dem kep kru di cut pimo.
5 Mindur nya pek kep bit Allah nicukti. Bit bon nyeni ingon dorti tut Nide mindur nya kan bi.
6 Es cut kwei ei dihyeisi dini bit Allah nicukti. Noni pinak biget di but mbras kwei.
7 Tug hon nisinati dima ne Allah bindei ba, tungwatu nya ikes hon bigyai kep ide midyai nya bi. Leu binhyepo ingon hukti bipia ninda no jo kep midyai di yai nya.
8 Mindhe-ndhe di yehek bi nya inang bicoi ug ei ide dihyei nyemti kin hak behei nya cem. Icoi yaham ba, ibong nding leu.
9 Hou sigau cut kwei leu mpia nibiho lene hou es di nimig ten cut kwei leu mpia nijjai.
10 Allah ninnei bindei ba, minyei ngwa dip di bres ntan bibor binok es tig di ngkiem ba, sur yam kei.
11 Allah bindei ba, minyei ut ei bumbuhui bigetti. Kigyei cut bipiga digai bumbuhui,
12 di bit hou ba, mbut bikieng kep dihyeisi dini nisurti-nipekti dem igbit Allah nicukti.
13 Allah kes biget bibiprok dihyeisi dini ba, bikes hukum ei tungwatu nya dip cem. Mpaba Noni kes biget mem gima bindo tut Nide ningon ngakeisi di nindig bibor di nggek jei bi bijo ninno cem biyok.
14 Ayub e, agwam nyahan mbigom ba, angig atingou mem dihyet. Aba angon bisrip huk Allah de mindur nya.
15 Apo akan tut notou Allah pai nihyet bibindei ba, kigyei cut kwei leu bumbuhui rom e?
16 Apo akan tut notou hou yai bumbuhui di kieng-kieng nyen ei mpia-bbed him e? Gima ne Allah nibibon jausi di tungwatu nya inggap leu tut ri.
17 Akan tut bi. Noro alua sok tut hou di nimig ten di cut kwei leu mpia nibiho di cut bihwen dihyeisi dini niwamti.
18 Anoyam kin Allah e? Bon angig mpia-bbed him ba, abindei bingkiem dem kep nok kisina ngkimom-tembaga di mimmun kan e?
19 Angginau nye tut mun di suar nipai sut bak Allah. Mun di nipai sut bak hi bi lewo nyeni ningon mbum he.
20 Dikou sut gima dahara bak Allah mem gima dimbrap bit Noni. Leu ma hi rino Noni mibon nituti mem gima kes hukum ei da dip e?
21 Tini bu ne nipigati ei mpia-bbed him piga kei apino bindei di igyai nggimop. Hou kui ne ba ninnei bicok leu mpia-bbed him bibindei ba, kwes kei.
22 Nipigati di piga kei dem kep mas mbrawin tau hak ei nite bei mpia nijjai. Allah de nikei-kau-keisi bindei ba, nyeni inggap leu.
23 Ide Allah de nisindemti nindig bibor. Isindem mem gima idideu Noni bi. Ningon sren-srau lene ba ningon di gom bibon tungwatu nya bijo ninno bijo kikau. Noni co kep tungwatu nya bi sren.
24 Gima rino suar yahagom inggei sut Allah. Lene Noni ba ningha bak yo di ipai sut yonti bipia ingon ki.>>