36
1-2 Ayub e, mun di dimbrap tut no rinaha yo. Aom angon ba, angig atingou mem dihyet mbigom bu lewo diya hacan mem Allah.3 Diba ditde nikan tutti di nindig bibor bindo brei bipia No di pai tes da ningon sren-srau.
4 Nihyet nitrowai hi srig dihyetti bi. Ningon ki tut mun cig ningat rin ei aho bei dini.
5 Allah ne Allah di sindem bibor ri! Ningon dorti tut mun nyeng hagom. Ningwes om tungwatu nya igom cem bi.
6 Noni gisindui sut yo di isibut nya bigyaijo ninno bi. Noni ba ningon sren bibon nuhui mbum nya di itug ndei ninghuisi wei.
7 Noni nyohou ngig niyai kep yo di ingon gom nya lene bindei ba, inyeng tak kep limwa nya noyam kin nibou ndig nya cem leu api tungwatu nya inggei sut yok bijo ninno bijo kikau.
8 Noro gino ba lante ngkimom biteu yok bigyai inghuisi wei ne igyai inghuisi di wei drek dip igyai mun tunggweisi nya,
9 lene Allah ndo ide sisar kin ide ninggei-nggwang tut yontiti brei biyok.
10 Noni wit huk yok leu binhyepo imiap kep nisok kep yokti ba, ikes hon ide nisibutti.
11 Gino ibit Allah nihyet ba, inok awak di inggei sut Noni ne yoni ibong kei igwam kei ba, mun di isuar nya dem mem yok ug bipek ide njap ningwig honti.
12 Gi bi ne yoni mimai drek dip ide ningon mbumti.
13 Yo di ikuk yok bak Allah bi dima iku-ku nyen ide nigga biborti. Mbro nok gino Noni kes hukum ei yok dip lo, yahara bak mem gima Noni mpu yok bi.
14 Imai bijet-jop ei nijam di ipilei yo lewo igyaijoti mpung tut ide nimmai sut yonti.
15 Allah ba ninghuisi wei bingginau tungwatu nya. Noni ba mun di buhun biyai ningon huk niti biyok cem.
16 Allah kwek nani leu mun di buhun bibor apino abong kei agwam kei ba, ade meja niyem njita eisi mpung bibor tut njita di mmau kei.
17 Noro tini bu ne abiang ayai munti nibuhunti drek dip ade nimbuk biborti.
18 Asok kep nanti ser nhyema mitiei ningot kepti ris na ba, acut au. Asindui sut ba, ninyeng tut ndigbanti bindei srawir na cem au.
19 Bit bon ade nahara mem nimpu nati kin angkek di sibui kin ade nisindemti nya dem mem gima cuon ayaisi leu hukum di micut igkep na kan bi.
20 Ma ayok angon mem mmun di dindi-kai kin tto bou tirigi mben nya isar ningwig hak nitausi au.
21 Ma asok kep nanti ser nhyema aba angha bak nihyet ba, aham ambuk kep au. Lewo Allah ba ninghuisi wei dima bibindei ba, akes hon ade nibon munti di kinei.
22 Ma ayok ngon kep bipia Allah ne Allah di sindem bibor ri. Guru di mipbor ngat noyam kin Noni hi ningat rinaha e?
23 Tou rima ndo Nide midyai bak Noni bipai kep Noni bipia bon mun tunggwei i?
24 Niyai munti bindei ba, Nide nipai testi nya hagom inggei sut Noni bijo kikau. Gima rino suar nani cem akon ninyeng bijo nai.
25 Yahagom ingat nibon munti nya tu. Noro tungwa di ningon huk niti tut Noni mungkun kei hi bi.x
26 Allah dia-diau jit ba, bit bon nyeni ingon dorti tut Noni kan bi. Bit bon ikwop Nide ari bingwam nimangti cem kan bi.
27 Allah rino brim nimihip leu dihyeisi lene bindei ba, bumbuhui tap leu api bindei ba, bumbuhui dima nok biget ngwa di cut kwei leu mpia-bbed him.
28 Noni siber biget ningei di but kwei leu bumbuhui di jun mpia-bbed him ba, biprok tungwatu dihyeisi dini hagom.
29 Tungwa hi di ningon dorti tut bumbuhui nimbutti nya ba, ningon dorti tut kru di cut kwei leu mpia-bbed him ei mpia di Allah gwam niti nibimbiti cem bi.
30 Noni pinak kigyei ninjeng di srei bipiga mpia-bbed him titut yam noro muk jou ne dindi-kai bijo nok.
31 Noni ba biget di but biyai njita bak tungwatu nyay Ba, binjei njita di nindig bibor bak yoni.
32 Noni ba ninda bikat kigyei lene bindei ba, ninjeng tot mpia di Noni ndo ei su.
33 Kru di cut dima ne bitto bipia sigau mihwen dihyeisi dini ug ri. Mindhe-ndhe nimuhup tu nya ikan tut bipia jei bi ne hou di nimig ten micut.