30
1 Noro tini bu ne yo di igyati nddong bigyo nya iba da bikek. Icig bat nya inok nikinei-kinau di idem mem gima inyohou ditde domba nya bimpu ditde nsien di igya ser domba dima yok bi.2 Yo dima ibon inyeng ei diyai him bi. Lewo ide nisindemti ngwig leu yok tu.
3 Imai inggum biwer mindhe bibor apino bitig dino inis ndia gau mem mmun igbit iggum ndigsi di ha he bong.
4 Yohom kep biei war dino cun-cun nya ei iggum ndigsi bigyem nimeng kin nigau cem.
5 Nindigsi nya iba ighyet di ten bijji yok noyam kin gi ijji ninggimang kep mun kin nimbrai kep mun cig nya.
6 Yo dini ibong-bong nyen bidem hak mihyeti nya di itig ei tring behei binok ide ig.
7 Lene idinyang-dinyang nyen ei bigbehei nindibutti noyam kin mindhe di ibon nimpung ei biei war behei igbit susti.
8 Yo dima ibon inyeng ba, inyeng jei bi cem. Timiei nya ijji yok leu minu dima tu.
9 Tini bu ne yo dima ikwei pa tut da. Dinok mun di balor yok bou igyai him ba, ipa ndip da.
10 Ibibon da nok nikinei-kinau kin nisuwok cem bitig dino itrai diimaisi cem.
11 Igyai inda leu da bingon sibui sut da lewo Allah sindui sut ba, dinghuisi wei bidisindem bi cem.
12 Nimpung nihwen bit da dima ihwen da bei doho bei ba, yuhum yam nsi tut dicutti cem.
13 Isrin ser dinangti ba, igruap mem gima ibindei sar dani. Tungwa hi di bigen ser yokw ei mpe di ihwen bit da kan bi.
14 Yoni inok minyei di su dino tu ditde ngug tig niya ngkiemti. Ibram yam kwei biyoom da noyam kin muk di rus di om da.
15 Ningon di ttin bibor om kep da dem kep hou di cut. Dinyeng di jei cut hak. Nituti mem gima dihwen ditde siceu nya pren leu da dem kep hou di cut ninjiriek dati.
16 Son dideu nicunti mem gima dimai lewo niwei kin nidut di hwen da wer cut leu da binggan bi.
17 Dibong mem mmun lo, dinjum nya hagom dut bibor. Nidut di dem kep mup tukti pimo jo kep da buug hon nohonti bi.
18 Allah kat kep sinsun di nggai kep dikimam bipek kin dikimam bingkiem apino sinsun de njui kok yam ei dingutti.
19 Lene ba da bitoi igkrop ba, diwer igkrop apino mumpiang cem kui da!
20 Allah e, dahara bak Nani noro agibuhup dihyet bi. Gino dingat nadi bak Nani lene agiyok atingou kep dihyet bi.
21 Ambuk tut da ba, aba ade nisindemti titut yam bihwen bit da cem.
22 Asindui sut ba, hou yai da nyen. Aba sigau di nimig ten bibor bittem-ttem nyen da.
23 Dikan tut bipia akri da ug ei minu nimai ide. Gima ne mpia di mporo yo di yahagom midem yam eisi ri.
24 Dihwen bit no di cut ei nikineiti di hara mem gima dingondut noni bi sren.
25 Apo dipim tut yo di yuum mun di buhun bibor bi e? Apo dingondut yo di imati kin igyemti dem bi nya bi e?
26 Dingon ya mem ningon nggei-hi-ngeisi kin nipigati nikweisi noro mun di buhun kin nidinditi he rino tau kep da.
27 Ningon di buhun kin ningon di ngguk bibor bindei ba, dingon a tut danti bidiyai ninghuisi wei bikwop njap ngwa hagom.
28 Ditibap-tibap nyen ei nidinditi lo, nipigati com digai da bi. Dikiju bidiya ei yo di imang bibor yoho bei ba, dahara mem gima hi mpu da.
29 Dihyet di ngguk di kiek hiter ningon dem kep nok nsien bigbehei kin ha unta ipimti.
30 Dingkek noyam kin mun di prab yem ba, ningkek di dut tigut dingut titut yam.
31 Nipou yo ne dimiap kep doia di ipai di ibikiek-kiek nyen di biyai dingon nggei-hi-nggei noro tini bu ne dimiap kep nipimti di iba nicot pai ningkom he.