Ayub pai ningwigsi tut nide munhyet brei biyok
29
1 Lene Ayub binut nipaisi bipai,2 <<Dindwau sut gi dingkwei hanyen kep ditde nibong kei nigwam keisi di nipou pima mpe di Allah nyohou dani pima hanyen hak ug o!
3 Noni mpu kep dani bikwop mmun-njap. Mpe di dimbut mem nidinditi lene nide nipigati piga digai dimbutti nya.
4 Mpe dima lene dibong kei digwam kei ba, Allah ninggre kin dati bicuon da kin ditde ig bei nsi nya.
5 Mpe dima lene Allah Di Sindem Bibor nggre kin da yo ba, munggwom de nya cem ingwig ttai da yo.
6 Ditde mindhe nimuhup tu nya igyai ido ngei mang bibor bida. Mbro nok gino dita biei zaitun nya ei ning dip lo, dipuk ningat mang bibor di ntun him.
7 Mpe di nibou nya ei minu ndig dima igwam bimbrap bit yam lene dani cem dinggre kin yok bidigwam ei ikieti.
8 Tirigi pinai pilei nya iba igyai nghuisi jik kep da lene yoom yonti leu mpia dima. Lene ndigpoi nya cem ikiju bigya um da ba, ibou cut bida.
9 Dikweisi bindei ba, nibou nya ei minu ndig dima cem ikes ighyet tut mun di imbrap kep tut biyam leu ba,
10 yo di inyeng jei nya cem igimbrap bi.
11 Tungwatu nya di imiap dinghapti yahagom inggap leu da tut ba, yo di ingat da bou igyai him yahagom inggei sut da tut diyai munti nya.
12 Lewo dimpu kep nuhui mbum nya tirigi itindei dindati tut munkwas bidimpu kep moibihi nya di bihi ingondut yok bi cem.
13 Yo di ingon buhun bibor cem inggei sut da tut diyai munti nya. Kibom nya cem ibong kei igwam kei lewo dimpu kep yoni cem.
14 Diba ningon sren keisi bibon mun tut tungwatu nya ba, mun di kinei hi rap da bi. Diba dingon gom bimbus bikwop munhyet hagom kikau.
15 Dibon danti bidinok niyai mem yo di igyai tu nya ba, dinok nimig mem yo di imig lit nya cem.
16 Dibon danti bidinok yo di yuhui mbum nya icig lene dimbrap gau mben ngkiai cem.
17 Noro dibindei timek yo di isibut nya bitut ide nisindemti leu api diteu yo di ipos yok di ihwen bit yok nya ba, ingwes ngun leu inda nsi.
18 Ei nijam dima ne diyok dingon mem gima duug krau ditde njap di jei apino dinnei mikimbas nyahan ei danti ditde ig.
19 Dinok biei di com nigau ug ei minyei nibiamti ba, nggou kui nindati bindot cem.
20 Ei nijam dima ne tungwatu nya yahagom inggei sut da. Ditde nisindemti gicut bi sren.
21 Mpe di dipingok tungwatu nya ingonti ne yahagom ikimut yuhui bingig itingou mem dihyet di dindat kep nya mungkun kei.
22 Tirigi dikes dihyet hon ne hi gibikum eisi bu bi. Ditde nipingokti dima tot ingonti noyam kin yop di diem ba,
23 yahagom iba ingon di nggei-hi-nggei bicigit dihyet bit leu nok yo di igyai miai di igya um biget ei nijam di biget waisi mitou bibindei ba, hagom kieng.
24 Ei nijam dima ne gino ingon cut leu lene diba dingon di nggriu bihumpo bit yok. Ditde ningon keisi kin ningon lleisi di piga digai diimaisi biwin kep ingonti bisindem tut yok.
25 Dittei nibou tut gi dikos tut mun nyeng hagom mem yok. Dibie tut yokti noyam kin nibou ndig di ningat rin ei nide tentara nya ikieti ba, dibiwin kep ingonti ei mpe di ningon nggukti buhun tak yok.