Ayub krau kep ningon srenti
27
1-2 Ayub binut nipaisi bipai <<Dani deheng bitug hon Allah di Niyaijo di mbus dingonti igbit bi dima,3 ninyeng bipia ei nijam di Allah yai dinnei leu da bigyo yo di dinnei no jo da him yo dini,
4 lene nimbrap nihyet di igbit bi mitibim ei duhui him ba, didweb mipri tut niris munti bi sren.
5 Midipai ei duhui him bipia jibuhup bidati pima igbit bi sren. Midikrau kep dingon srenti kikau ba, duug bimai kep.
6 Dimpig bou kep dingon srenti leu api midiluei dingonti tut hanyen bi sren. Dingon mien cem pwoi-pwau bikwop njap ngwa hagom.
7 Dijoi sut bipia ditde siceu nya yahagom mitug ndei hukum noyam kin nisibut cig nya di itug ndei hukum ba, yo di ihwen bit da itug ndei hukum noyam kin yo di imbuk cem.
8 Mpe dino Allah yai no di bon mun di kinei hacican ninnei leu lene miningwes ngun leu Noni ninda nsi yo e?
9 Mpe dino mun di buhun cut igkep noni lene Allah mimiap naharati e? E bi!
10 Nikeisi rima suar noni ningon ya mem ningon di nggei-hi-nggei di Allah tin ei mem no lene ba nimbris biborti bingat nadi bak Noni bi.
11 Jisindui sut bidingginau je tut Allah nisindemti di nindig bibor. Midipai sut No Di Sindem Bibor ningon kanti di tin ei cem bije.
12 Noro ningat ne jahagom jingat gima bou jiyai him tu. Gima rino nggon rino jiyai nipingokti di bon ninyeng bi bida i?>>
Zofar nibuhuptit
13 Zofar pai bak Ayub <<Allah Di Sindem Bibor mikes hukum ei no di co kep nihyet kin no di sibut tug hon nisinati dini.
14 Gino ibon imunggwom bat nya imang lene yoni mimai ei pranti ba, ignyon bat nya imati kin igyemti midem mem yok haigtu bi cem.
15 Nimbier kimti nya di ingwes ngun nya mimai tug hon nsuwer ajar apino bon nituti mem kibom di imai leu yok nya igipim tut yok bi.
16 Mbro nok gino yo di isibut inju perak bikui sur mpia ba, inju sinsun nya cem bijo-jo yam dip lo,
17 yo di ingon sren minyeng tut perak kin sinsun dima yok hagom nok ide bu.
18 No di sibut de ig minggun noyam kin mimpam hamu kin ig jibei di awak nya yohok mem gima ibiya ser beisi.
19 No dima nok no di nyeng di ug bong nyahan bihigom noro mikiju hanyen bi sren. Noni da niyai bingat lo, ndigban di nyeng tut nya hagom sar bingwig leu no tu.
20 Mun di biyai ningon ttin biborti micut igkep no dem kep minyei di su bibor. Hou sigau di cut mem mmun mihwen noni bittei noni buug sut.
21 Hou mpia priti micut bikon noni bicok tut leu nide ig.
22 Mun dima yok mingondut noni bi noro micut igkep noni ba, suar nang binggok tring behei biya nding.
23 Noni nang sindem noro sigau ttem-ttem nyen no ba, hou huk-huk nyen no bidem ninangti nya hagom.>>