Zofar pingok Ayub ningonti
11
1-2 Leu api Zofar buhup <<Hi dima mibuhup no di nikibou bei mbrai dini nihyet bi e? Aji di nggan bibor dima bindei ba, angon ngun e?3 Ayub e, akan bipia bit bon nibuhup ahyet kan bi e? Akan bipia tirigi aba ahyet bicig nye lene nisok kep na drek dip bi e?
4 Apai bipia atunggwei sut ambrapti nya bi ba, angon kwes kin Allah cem.
5 Noro dingon ya mem Allah Nonti buhup bina tut apaisi pima pijum,
6 bipai bina bipia ningon ki dima bon nitta nya mang. Bit bon tungwatu nya ingon huk niti tut hagom kan bi. Ma angon huk niti tut ninghuisi wei di aum ei nijam dini. Gino abinai sut lene wer poi mien tirigi abinai sut hukum di suar atug ndei a.
7 Bit bon akan bidem tut Allah ningon bei kanti nya kan bi. Angon huk niti tut Nide nisindemti cem kan bi.
8 Nisindemti dima jo anai dor njiriek mpia-bbed him ba, dem tut asu anda ba, akrau cem bi. Nide nisindemti jut bibor dor njiriek minu nimai nya ide ei dihyei jou cem. Bit bon angon huk niti tut kan bi.
9 Allah de nisindemti nibresti dor njiriek dihyeisi dini nisurti-nipekti nibresti lene ninyanti dor njiriek muk ndigsi ninyanti.
10 Gino Allah kat na ug ei nikei noho bei lene tou ribrim ningkek bibigen ser No di yai nibou tut mun dima i?
11 Allah ngat igbit yo di iris mun igkei nya ba, ide nibon mun di kinei biborti jo nding leu niyai him bi.
12 Yo di ingon mbum nya kindi migyai ingon di ki ei mpe dino keledai bigbehei nipmem bep nipmot di muhup kei.
13 Ayub e, ma acok angonti bipwoi leu ba, attin ser ade sisar! Angat nadi bak Allah!
14 Abindei sar sisar bingwig leu angonti ba, acom nisibut biborti ei minu ting leu ade ig cem.
15 Leu api bon aba angon di nddong kin ninghig-niker biya um mun di pek kep mem na. Ginok lene bon aya ngkiem kei ba, mimbri mikui angkek.
16 Mpe dima lene ade ninghuisi wei dini mipren hanyen leu abou ngwakti ba, noyam kin minyei di su bisri hanyen apino tungwatu nya igiyok ngon kep gima bu bi.
17 Ade niyaijoti mipiga kei dor njiriek mpia huk pijum nipigati. Nijam di ade niyaijoti wer dindi-kai mipiga dem kep mpia di pri mem njap tekti.
18 Mpe dima lene angon nddong ba, ade niba ningon comti ngkiem kei. Allah minyohou nani bibindei ba, abong kei agwam kei cem.
19 Mpe dima lene adigit tut ade nitok joti nya bi. Imang bibor miyahara na leu binhyepo ampu yok.
20 Noro yo di isibut nya miba ingon di ttai-ttai bou biput-put nyen bingat lo, mem yoni ne hi dima mpu yok bi. Ba, yo dima igyok ingon mem ide njap ningwigsi tau kep yok bimai hak ug.>>