10
1 Dingon kou sut diyaijoti ba, diyaijoti dini biyai ningon him wei bida cem. Gima rino midilua sok bak Allah drek dip dingon mpo-mpamti.2 Allah e, ma apai kep da au. Ma apai brei bida tut Ade nihwen bit dati!
3 Nggon rino aba nico kep dati kin nicom da di Nanti abon bou anda him i? Nggon rino ausap yo di isibut nya ingon kanti kin ikos tutti nya i? Gima yok bon ninyeng e?
4 Angig ayai kepti noyam kin tungwatu ingig igyai kepti bi.
5 Ade njap cem cun noyam kin tungwatu nya ide njap bi.
6 Lene nggon rino anut bram ditde sisar nya hagom ba, ahuk bikwop ditde mun di diyai tunggwei i?
7 Ningat ne akan tut ba, angon huk niti cem bipia dibon mun di igbit he bidiyai mun tunggwei bi. Akan tut bipia bit bon hi dima sindem mem gima teu da leu anda nsi bidingwes ngun kan bi.
8 Nipou ne abon da bou anda him. Tini bu ne ma abindei sar da e?
9 Ma ayok ngon kep bipia aba dihyei igtuyap bipai tes da. Abindei da bidingkwei ba, dinok dihyei ndung hanyen e?
10 Abindei ba, dicig bon da bidinok nipmot. Abindei bu ba, dindig ei dipmem ninghopti.
11 Aba dinjum kin dinggiluk bibon nok dingut dini. Aba dinghui bikrau dinjum lene aba dingkek binggai ser hagom.
12 Ayai niyaijo bida ba, angon ngakei da cem. Aba Ade ningondut dati binyohou dingwes cem.
13 Noro tini bu ne dikan tut bipia atin ei angon kanti nyahan mem da ei nijam pima leu binhyepo akes mun di buhun ei da dip.
14 Amian huk da leu binhyepo angat ditde nitunggweisi nya leu binhyepo akou sut gima akos ser ditde sisar.
15 Gino dibon sisar ne mun di buhun bibor cut igkep da! Ne gino diyai mun di igbit ne abibon da nok no di bon sisar! Dikon dibou kan bi lewo dingon ngguk bidinok nisuwok.
16 Hammi tirigi dinggei ngwig sut diyai munti rino ahuk da dem kep mindhe singa. Aba Ade mindur nya biyai dingon di ttin nitu he.
17 Abindei ba, no di kan tut dibon munti nya pai kep dani kikau. Ba, Ade nigga dati cem bikum eisi kikau. Acuk Ade tentara nijep mem gima igyon ttai da bikon pran bit da.
18 Asindui sut ba, disrek kwei ei dihyeisi dini mem mindei i? Gino dimai hak nipou tirigi tungwatu nya ingat da bou igyai him bigyo ne gima bindei bidingon llei.
19 Ba, gima dem kep nok gino dipmem srek tut da bi sren ba, disrek kwei bidibisau ug ei jui nsi cem e?
20 Nnaba jei bi lene midimai ug ri. Gima rino ma asindui sut dangkom ngat ba, dingat dingwes ei ditde nijam niken dino jo yo dini.
21 Jei bi ne duug rin ba, dingkwei hanyen kwei bi sren. Duug ei mpia di dindi-kai di bon nipigati cem bi,
22 bimpung tut nindibutti kin nisinsiousi. Ei mpia dima ne nipigati dem kep nok nidinditi ri.>>