Haman tin ei ningon di mbuk mem gima bindei sar mben Yahudi
3
1 Nijam poi gi nidipti bu lene Nibou Ndig Ahasyweros kon Haman ba, yai ninyeng jei dor njiriek nibou di igya kui noni nindigsi nya yahagom. Haman ne Hamedata nipmot di ntun Agag him ri.b 2 Nibou ndig cuk nibou di igya kui noni yahagom leu binhyepo iba ibiau bicom mpia ei Haman noho bei ba, ikuk yok bak. Apino nindigsi nya yahagom ibit nibou ndig nicuk yokti noro Mordekhai kou sut ba, gikuk no bak bi. 3 Gima rino nindigsi nya ihig ser noni <<Nggon rino atunggwei nibou ndig nicuk nati i?>> 4 Ipingok kep ningonti bikwop njap-njap leu binhyepo bit nihyet hak ug. Noro Mordekhai sem tut ide nipingok noti bipai biyok <<Dani ne Mben Yahudi ri. Gima rino gi mbun diba dibiau bicom mpia bidikuk da bak tungwatu dihyeisi dini bi.>> Leu api yo dima ibakilak noni bak Haman lewo ijoi sut itou kep mun di Haman bibon bak Mordekhai. 5 Tirigi Haman miap tut Mordekhai di kou sut gima ba nibiau bicom mpia bikuk no bak noni lene ningon sibui sut Mordekhai nindig bibor. 6 Lene gima he bi. Lewo tirigi Haman miap tut bipia Mordekhai ne mben Yahudi rin lene kos tut mem gima kes hukum nimai ei Mordekhai nongkom he dip bi noro miya kep mben Yahudi di ingat rin ei minu Persia nisurti-nipekti yahagom ba, isar bingwig hak ug.7 Tirigi Nibou Ndig Ahasyweros ninyeng tak kep minu Persia mem ari bingwam simnaibrimigcan ug bipek Bed Nisan di bed gi nigom lene Haman bindei ba, hi ba niko nibinggok tutti di ninyeng Purim bikan tut njap kin bed di dem mem gima noni bindei mbut nikos tutti di kinei bibor di tin ei nipou su pima. Leu api Purim bindo tut njap gi nisimnaibrimigningai ei Bed Adar di bed gi nisimnaibrimigcan.
8 Leu api Haman pai bak nibou ndig <<Na Di Anyeng Jei e, mben gom di titer leu mben nindigsi nya ibong timiei srig nyeti bidem hanjop nsi hagom ei ade ninyeng tak kepti dini. Igyai kepti nya cem titer leu ade limwa nya igyai kepti nya. Gima he bi lewo yo dini ibit niggai ser tungwatu nyati di tibim bidem anyeng tak kepti dini bi. Gima rino Na Di Anyeng Jei e, ma acigit yo di ibon mun bit leu ingon kanti dima au. 9 Gino Na Di Anyeng Jei angon buhun tut bi lene ma abindei hei srat nibicukti mem gima ade limwa nya icok tut yo dima yahagom bihigom hak ug. Gino Na Di Anyeng Jei ace tut dipingok nati dini lene midibindei coi mitiei perak kilo sribu sratus ningai ningot bitai binjiriek ei kintror di igyok kep perak eisi leu binhyepo Na Di Anyeng Jei abinyohou dimig ade ninyeng tak kepti dini.>>
10 Tirigi Nibou Ndig miap nihyet dima lene pas srak mas di bijuk ninda pijum di bitak buk kep srat nicuk kep nide limwa nyati leu ninda pijum leu api su bak Haman di nok mben Yahudi ide nitok di kinei sut yok bibor. 11 Lene noni pai bak Haman <<Dikes mben dima bitut ide mitiei di inyeng tut nya hagom ei andati ba, abibon yoni bit leu angon kanti hak ug.>>
12-13 Ug ei njap gi nisimnaibrimigningai mem bed gi nigom lene Haman jem nibou ndig de sekertaris nya kwei bidem yam bit noni. Noni cuk yok leu binhyepo ipas srat bit leu mun nyeng hagom di cuk yok tut nya. Leu api iluei srat dima ei nihyet kin nipas kepti di timiei nya ikrau kep ei Ahasyweros ninyeng tak kepti dima nisurti-nipekti. Ipas srat dima gau Ahasyweros ninyeng lene iba srak mas pima bitak buk ei srat dimati. Leu api ibipbur bipinak srat nicuk yokti dima bak yo di inyeng jei nya kin nibou nya kin andigpoi ndig nya bidem hanjop nsi nya yahagom. Nipas kepti di jo srat dimati bicuk timiei nya yahagom bipia ug ei njap simnaibrimigningai mem Bed Adar ne suar icok tut mben Yahudi yahagom bitut ndigpoi nya kin pinai pilei nya kin sop nya kin munggwom nya ba, hi ningwes ngun bi. Leu api suar ipos ndigban di ide nya hagom cem. 14 Suar itri tut nicukti dini bidem hanjop nsi nya hagom leu binhyepo timiei nya yahagom injei siceu bigya kep mben Yahudi mem ngon bou di Haman nya ikos tut ei su.
15 Lene yo di ipwoi srat di imbut tut pima yok ibipbur bidor tut leu binhyepo itri tut nicukti dima bidem hanjop nsi nya ei nibou ndig ninyeng tak kepti dima nisurti-nipekti hagom. Itri tut nicukti dima ei minu ndig pmem Susan cem leu api Nibou Ndig kin Haman igwam-gwam nyen ba, ibidut ba anggur ngei. Gima leu lene nicukti dima bindei ba, timiei minu ndig pmem Susan ingon buhun. Gima rino tungwatu nya ighyet ngwig kep yam.