SRAT ESTER
Sop Nibou Ndig Wasti srep tut Nibou Ndig Ahasyweros nicuk noti
1
1-2 Ahasyweros ne nibou ndig di ninyeng tak kep minu Persia di bon minu ndig pmem Susan ri. Ninyeng tak kepti dima bon nide hanjop nsi nimangti sratus gom ningot can ba, muhwindacan lene nohonti ug bipek kin minu India kikau ug bipek kin minu Sudan cem.3 Nibou Ndig Ahasyweros ninyeng tak kep limwa nya ug cut ari bingwam gi niningai lene noni bon pesta di nindig bibor mem yo di inyeng jei kin yo di igya kui noni yahagom. Nibou pran minu Persia kin Media kin nibou hanjop nya cem bitut yo di inyeng jei ei hanjop nsi nya yahagom ibit pesta dima. 4 Nibou ndig ndo mun di nyeng tut nya ei nide ig nibou ndig kin nide ninyeng tak kepti di nindig bibor ba, sindem bibor cem bak yo di inyeng jei dima yok kikau mem nijam bed nitindur muhwindagom.
5 Gima leu lene noni bon pesta mem limwa nide di inyeng jei nya kin gi hi di yuhui mbum nya cem yahagom ei minu ndig pmem Susan. Pesta mem limwa minu ndig Susan dima mbut mem ari nitindur gom ei miai mitou nghousi ei ig him di nibou ndig de. 6 Nide awak nya igyai minghas mbrawin di iba minghas linen bibon di bon nisieng nidri kin nitiei ba, ibimau mpia di jo bas hak di iba ngug tig bikrop ttai ei ig him di nibou ndig de. Leu api iba nikuk minghas linen di bon nisieng nghei nta bingot ba, ibisrou srak di iba perak bibon di ipek kin cou di iba tig marmer bibon nya. Leu api iba mas kin perak bibon bilen di nggriu-nggrop kei nijei nya ba, ikon bikes ei minghas mbrawin pima nibehei ei igjou dip di iba tig marmer nitiei kin tig hablur ningwoi kin tig permata gewang di jimjit kei kin tig pirus nidri bimau dima hagom dip. 7 Nibou ndig tin ei ba anggur ngei nindig bibor di pot nipou ei su buhug kui nide mok hi gom hi gom bimpung mem yo di jem yok kwei nya yahagom. 8 Lene noni gipai ser yo di idem yam ei pima tut ba anggur ngei di idut bi. Noro sindui sut ba, bihi yuhui jo kep bidut didiyam lene bihi idut lai-lai de he cem. Noni cuk kep awak di igyai midyai ei ig nibou ndig leu binhyepo yuhug ba anggur ngei bak yo di ikwei dem yam ei su nya bidut bit leu ijoi sutti.
9 Mpe dima cem Sop Nibou Ndig Wasti di nibou ndig nitnem bon pesta mem sop nya ei ig nibou ndig ninsi hiter.
10 Ei njap gi nimuhwindacan lene nibou ndig nuhui jo kep ba anggur ngei bidut kikau bibindei ba, ningon nggei-hi-nggei bibor. Gima rino jem ibou muhwindacan dino impu kep no pijum nya. Yo di jem yo kwei dima inyeng rino Mehuman kin Bizta kin Harbona kin Bigta kin Abagta kin Zetar kin Karkas. 11 Lene cuk yok leu binhyepo ibuwak Sop Nibou Ndig Wasti pima kwei bikwei sut nide topi sop nibou ndig di bijuk nibou biya tut ei noho bei. Sop Nibou Ndig dima ne sop ubbu ngat kei rin ba, nibou ndig joi sut ndo nuubbu ngat keisi dima bak nibou di inyeng jei nya kin nindigsi di idem yam ei dima yahagom. 12 Noro tirigi ibou muhwindacan di impu kep nibou ndig pijum pima ipai nibou ndig nihyetti bak Sop Nibou Ndig Wasti pima lene noni kou sut gima bit yok apino Ahasyweros gga Wasti bibor.
13 Lene noni hig yo di ingon ki di ibuhup igbit ingon kanti tut nikos tutti kin munhyet kin hukum di limwa nya itug ndei cem ei nide ninyeng tak kepti dima. Gima rino noni jem nipingok kep ningonti cig nya leu binhyepo ibuhup igbit ingon kanti tut hukum di dem mem munhyet dini. 14 Yo dima inyeng rino Karsena kin Setar kin Admata kin Tarsis kin Meres kin Marsena kin Memukan ba, nibou ndig ba ningon com yahagom. Ba, igya kui nibou ndig minu Persia kin Media ba, inyeng jei dor njiriek nibou nindigsi nya. 15 Lene nibou ndig hig ser yok <<Disok dihyet ei ditde awak di impu kep da pijum nya dip bak Sop Nibou Ndig Wasti bipai dingon kanti bak leu binhyepo kwei ngat da noro kou. Gima rino nikos tutti di tug hon ditde ninyeng tak kepti dini pingok nye tut munhyet dini bidibon mindei bak i?>>
16 Leu api Memukan pai bak nibou ndig kin yo di inyeng jei nya <<Tug hon Sop Nibou Ndig Wasti niyai munti dima mibindei ba, Na Di Anyeng Jei Bibor anyeng kinei. Noro nangkom he bi lewo yo di igya kui nani cem kin pinai nya di ingat rin ei ade ninyeng tak kepti dini cem yahagom inyeng kinei. 17 Sop nya yahagom mimiap tut sop nibou ndig niyai munti dima leu api yoni cem mico kep ijjep bat nya. Yoni mipai biyam bipia Na Di Anyeng Jei ahig Sop Nibou Ndig Wasti mem gima kwei ngat na noro noni kou bikwei bi. 18 Gino nibou di inyeng jei ei minu Persia kin Media itnem bat nya imiap tut gima lene mipai sut bak ijjep bat nya cem haninyai. Leu gima mibindei ba, sop nya misrep tut ijjep bat nya ighyet lene ijjep bat nya migga itnem bat nya drek dip. 19 Gima rino nipai ningon kanti bak Na Di Anyeng Jei. Suar akos tut bipia Sop Nibou Ndig Wasti dima mikwei ya ei Na Di Anyeng Jei aho bei bu bi. Abindei coi nyeni nihyet nghwak him dima ei minu Persia kin Media nikos tutti nya di jo tu bihigom leu binhyepo gi mbun ikus hanyen leu kan bi. Gima leu lene ma acut atnem ninyeng Sop Nibou Ndig leu ba, ayai bak sop hiter di niyai munti nya kei dor njiriek noni bu. 20 Mpe dino Na Di Anyeng Jei ade nikos tutti dima tibim bidem ade ninyeng tak kepti di bres bibor dini nisurti-nipekti lene mporo sop wak cam nya yahagom mibibon ijjep bat gi inyeng nya kin gi yuhui mbum nya cem yahagom nok gi igbit.>>
21 Nibou ndig kin yo di igya kui noni cem yahagom ice tut Memukan nipingok noti dima leu api yai nibou tut, 22 bipinak nikos tutti dima bidem hanjop nsi ei ninyeng tak kepti dima tug hon bibikwop timiei nya ighyet kin ipas kepti nya hagom. Nicukti dima nibimti pai <<Suar bikwop pinai wak cam nya he rinok nibou mem ide ig bei nsi nya ba, idem mem gima ikos tut mun nyeng hagom.>>