Daptar tut imam nya kin Lewi nya inyenga
12
1 Daptar dini tibim tut imam nya kin Lewi nya di ingkwei hanyen leu ingkiaisi pima bit Zerubabel di Sealtiel nipmot kin Imam Nibou Ndig Yesua kwei inyeng. 2-7 Imam nya inyeng,Yoni inyeng rino Seraya kin Yeremia kin Ezra kin Amarya kin Malukh kin Hatus kin Sekhanya kin Rehum kin Meremot kin Ido kin Ginetoi kin Abia kin Miyamin kin Maaja kin Bilga kin Semaya kin Yoyarib kin Yedaya. Yo dini yo di inok nibou mem isut bat di imam nindigsi nya ei nijam di Yesua yai midyai nok Imam Nibou Ndig ri.
8-9 Lewi nya inyeng,
Nibou di ibie tut doia nipai sigyoti nya inyeng rino Yesua kin Binui kin Kadmiel kin Serebya kin Yehuda kin Matanya. Yo di icoi bit nimpung di ipai doia nibuhupti nya inyeng rino Bakbukya kin Uni kin isut bat di Lewi nindigsi nya.
Yo di intun Imam Nibou Ndig Yesua him
10-11 Yo di intun Imam Nibou Ndig Yesua him pijum inyeng rino Yesua kin Yoyakim kin Elyasib kin Yoyada kin Yonatan kin Yadua.
Nibou mem imam ninsi de nya
12-21 Gini ne daptar di tibim tut imam ide nibou nya insi de nya ei nijam di Yoyakim yai midyai nok Imam Nibou Ndig ri. Meraya ne nibou mem Seraya ninsi de nya ri. Hananya ne nibou mem Yeremia ninsi de nya ri. Mesulam ne nibou mem Ezra ninsi de nya ri. Yohanan ne nibou mem Amarya ninsi de nya ri. Yonatan ne nibou mem Melikhu ninsi de nya ri. Yusuf ne nibou mem Sebanya ninsi de nya ri. Adna ne nibou mem Harim ninsi de nya ri. Helkai ne nibou mem Merayot ninsi de nya ri. Helkai ne nibou mem Merayot ninsi de nya ri. Zakharia ne nibou mem Ido ninsi de nya ri. Mesulam ne nibou mem Gineton ninsi de nya ri. Zikhri ne nibou mem Abia ninsi de nya ri. Tungwagomm ne nibou mem Minyamin ninsi de nya ri. Piltai ne nibou mem Moaja ninsi de nya ri. Samua ne nibou mem Bilga ninsi de nya ri. Yonatan ne nibou mem Semaya ninsi de nya ri. Matnai ne nibou mem Yoyarib ninsi de nya ri. Uzi ne nibou mem Yedaya ninsi de nya ri. Kalai ne nibou mem Salai ninsi de nya ri. Heber ne nibou mem Amok ninsi de nya ri. Hasabya ne nibou mem Hilkia ninsi de nya ri. Netaneel ne nibou mem Yedaya ninsi de nya ri.
Daptar tut imam nya kin Lewi nya ide ig bei nsi
22 Gini ne daptar tut nibou ig bei nsi di Lewi nya kin nibou ig bei nsi imam nya ei nijam di Imam Nibou Ndig dini yok inyeng tak kep yokti ri. Imam Nibou Ndig nya inyeng rino Elyasib kin Yoyada kin Yohanan kin Yadua. Daptar di ipas kep dima ngwig hon nohonti mpe di nibou ndig Darius ninyeng tak kep Persia.
23 Noro daptar di ipas kep tut nibou ig bei nsi Lewi nya pima jo kep ug bipek nijam di Yonatan di Elyasib nignyon gwam nok Imam Nibou Ndig he.
Nikwas midyai di igyai ei TUHAN De Ig tut yamti
24 Ikwas midyai tut Lewi nya di igyai midyai ei Hasabya kin Serebya kin Yesua kin Binui kin Kadmiel yoni inda behei bikwop nimpung nya. Ikwas nimpung nya ba, nimpung can dima ikiju ipai doia nibuhup-buhup nyen biyamti bipai doia bibinggei sut TUHAN ninyeng cem bibipai sigyo biNoni cem sindam bit leu Nibou Ndig Daud di Allah de awak pima nicuk yoti.
25 Yo di igya ser TUHAN De Ig di indo yok mem midyai niya ser ninsi nya di inju ndigban eisi nya dideu dimbou pmem ei TUHAN De Ig inyeng rino Matanya kin Bakbukya kin Obaja kin Mesulam kin Talmon kin Akub.
26 Yo dini yahagom igyaijo ei nijam di Yoyakim di Yesua nipmot lene Yozadak nignyon niyaijo yo pima lene sur nijam di Nehemia nok nibou hanjop nindig kin Imam Ezra di ningon ki tut Allah de nikos tutti nya igyaijo yo cem.
Nehemia piga ngug tig di jo ttai minu ndig Yerusalem
27 Tirigi ipiga ngug tig di jo ttai minu ndig Yerusalem lene ijem Lewi nya ba, ikwei leu ide minu di ibong niti hagom leu binhyepo iba doia nipai sigyoti bikon TUHAN ninyeng ei njap nipiga ngug tig dimati. Yo dini iba yeng beng nya kin nggong brei nya bikon TUHAN ninyenga. 28 Nimpung ig bei nsi Lewi nya di ipai kep doia igkei induk yam kwei leu ide minu di ibong niti ttai minu ndig Yerusalem cem leu minu mien ngot ttai minu ndig Netofa, 29 kin Bet-Gilgal kin Geba kin Asmawet cem. 30 Imam nya kin Lewi nya dima yok ibon midut nibindei pwoi yonti nipou ug e leu api ibindei pwoi limwa nya kin dimbou pmem nya kin ngug tig ttai minu ndig dima cem.
31 Dani dinduk nibou Yehuda nya kwei bidikes yok bigya ei ngug tig dip leu binhyepo idimig nimpung di nindig bibor dima bingig nipuig can lene ittei yam bibigahai minu ndig ba, iba doia nipai sigyoti binggei sut Allah mem njap dima.
Nimpung gi nigom idimig yam bigya ei ngug tig dip leu api ittei yam ndam nite anda com biyuug ndam Dimbou Pmem Mumpiang.n 32 Hosaya ya abia kep yo di ipai kep doia nya inghim dip. Leu api nibou Yehuda nya nite hi injei bram. 33-35 Imam Azarya kin Ezra kin Mesulam kin Yehuda kin Benyamin kin Semaya kin Yeremia nya igya abia kep yok ba, ibimiep pun mbrei nya bijo kikau. Zakharia di Yonatan nipmot lene Semaya nignyon ya abia kep imam dima yok inghim dip. Ibou poi di intun Zakharia nidigup bat-nidigai bat nya him inyeng rino Matanya kin Mikha kin Zakur leu Asaf ninsi de nya. 36 Yo di igya abia kep Zakharia ninghim dip bu ne nimpung leu bibikwop Semaya kin Azareel kin Milalai kin Gilalai kin Maai kin Netaneel kin Yehuda kin Hanani yoni insi de nya ri. Yo dini yahagom ikrau mun di ibikek doia noyam kin gi hi po Nibou Ndig Daud po Allah de awak bikek pima ei indati. Lene Imam Ezra di ningon ki tut Allah de nikos tutti nya bie tut nibou mu. 37 Tirigi yuug krau Dimbou Pmem Minyei Bousi lene ikrop yok ba, ikui lin di ug ei Daud De Minu Ndig ba, ibitunggwei Daud de ig nibou ndig. Leu api ijuk hanyen bikinyon ei ngug tig dip ba, yuug krau Dimbou Pmem Minyei ei minu ndig nite bei mpia nipriti.
38 Nimpung di ipai doia gom kin bu idimig yam bigya ngug tig dip ba, imbut ndam nite anda prak. Leu api diya tut limwa nya dima nite hi ba, nibit yok. Nyeni ningig nipuig ba, ninjiriek Ig Komfor Di Jo Nai ba, ug bipek kin Ngug Tig Gi Nyan. 39 Leu api nimbut kikau bininjiriek Dimbou Pmem Efraim kin Dimbou Pmem Mimbrek Ngan kin Dimbou Pmem Wau kin Hananeel De Ig Di Bon Ninggre Di Jo-jo Yam Dip kin Mea De Ig Di Bon Ninggre Di Jo-jo Yam Dip cem. Ba, nibimbut kikau ug ei Dimbou Pmem Domba lene nyende nipuig niya niyati dideu Dimbou Pmem Niya Ser dideu TUHAN De Ig.
40 Leu api nimpung nipai doia cin dima yuum yam bikwei krau TUHAN De Ig him.
Ter leu nibou di ibicom yam bit ditde nimpung pima yok, 41 lene yo di imiep pun mbrei di ibibit nye nya inyeng rino Elyakim kin Maaseya kin Minyamin kin Mikha kin Elyoenai kin Zakharia kin Hananya. 42 Yo di igya abia kep imam nya inyeng rino Maaseya kin Semaya kin Eleazar kin Uzi kin Yohanan kin Malkia kin Elam kin Ezer. Yizrahya ninyeng tak kep yo di ipai doia nya ba, ipai doia ei ninda behei.
43 Njap dima ne ibui mindhe-ndhe ngot bindig ei nimbar hum dokti bak TUHAN. Limwa nya igyai nillei lewo Allah bindei ba, ingon nggei-hi-nggei su. Sop nya kin munggwom nya cem ibit yok tut pesta dima lene ighyet di ibigyai nillei dima tibim ug ei minu ting bijo ninno.
Munkwas mem nibikuk yok bak Allah ei TUHAN De Ig
44 Mpe dima lene indo ibou poi mem gima igya ser ninsi di inju munkwas ngug-ngau ngot di mem TUHAN De Ig ba, igyok eisi. Gima ne bitut munkwas di ikwas gom leu ningot gom lene nok kin ningat ei miaisi gi ngat nimbie him ngat di ikwas bikwop ari bingwam cem. Suar yo di igya ser dima imbus munkwas dima yok leu miai di igyai sir minu ndig kin minu mien nya hagom keyam leu api ittei hagom bikes bak imam nya kin Lewi nya dem igbit Musa nicuk yoti. Apino limwa Yehuda nya iba ingon com imam nya kin Lewi nya dima yok, 45 lewo ibit midut nibindei kwes limwa nyati kin midut nindigsi nya di Allah cuk yok tut nya cem. Yo di iba musik bipai doia kin yo di igya ser dimbou pmem nya cem inda jo kep ide midyai bigyai bit leu Nibou Ndig Daud kin nipmot Salomo ide nicuk yoti. 46 Habiei leu nijam Nibou Ndig Daud kin Asaf di ningon ki tut doia ne yo di ipai kep doia iba doia dima bikon Allah ninyeng ba, ibipai sigyo bak Noni cem kikau kwei bipek ammani kep. 47 Ei nijam Zerubabel kin nijam Nehemia ne limwa nya yahagom ikwas munkwas tut Allah mem gima ibimpu yo di ipai kep doia kin yo di igya ser TUHAN De Ig ide mun di isuar nya bikwop njap-njap. Limwa nya igyai mun di ikwas pijum tut Allah bak Lewi nya leu api Lewi nya igyai munkwas pijum di itug ndei dima nite hi bak imam nya bit leu Allah de nikos tutti.