Mben Israel imbres yonti leu ngkiai nya
13
1 Mpe dipo Imam Ezra kwop kep Musa Nicuk yokti nya bak limwa nya pima ne noni um nipas kepti di nibimbiti pai <<Harin dima mben Amon kin Moab ibicom yam bit Allah de limwa nya a. 2 Lewo tirigi po mben Israel yehei leu minu Mesir ba, ingat rin ei puig sinon pima ne mben cin dima ikwas njita kin minyei tut yok bi. Noro ingot kep Bileam leu binhyepo sigion mben Israel. Noro nyende Allah bindei ba, nisigionti dima cut igkep nye bi noro Noni njei mun di kei bak nyeni.>> 3 Tirigi mben Israel yuum nipas kepti nibimbiti dima lene icom ngkiai nya yahagom leu ikieiti.Nehemia kinyon ei nikinding mben Israel igyai munti di kinei nya
4 Imam Elyasib ya ser ninsi di inju ndigban eisi nya ei TUHAN De Ig bijem nisut bit Tobia wer mimbrek tu. 5 Noni ndo nghim nsi ndig gom di ibet pijum ei mem gima inju munkwas nok gandum kin biei nggrai di ui-gwang kei kin nimbumbati di ibiyai midyai ei TUHAN De Ig kin munkwas mem imam nya bitut gandum kin ba anggur ngei kin mini zaitun ngei di ikwas gom leu ningot gom lene nok tut Lewi nya kin yo di iba musik bipai doia nya kin yo di igya ser TUHAN De Ig bak Tobia bibongti. 6 Mpe di Elyasib yai gima ne dingat rin ei minu ndig Yerusalem bi. Lewo duug ei minu Babel tirigi Artahsastao nok nibou ndig mem minu Babel mem ari bingwam gi ningot ningai ba, can tu. Duug ei sirima leu binhyepo dipai binoni tut midyai di diyai nya. Ei njap poi gi nidipti bu ne nibou ndig ce tut ba, 7 dingkwei hanyen kwei ei minu ndig Yerusalem. Dikwei krau tu lene dingwes mba tirigi dimiap tut bipia Elyasib kes nghim nsi gom ei TUHAN De Ig bak Tobia bibongti. 8 Lene dingon sibui bibor drek dip bidikam Tobia de ndigban dima yok bidicom hagom ug ei nisai hak ug. 9 Leu api dicuk Elyasib leu binhyepo bon midut nibindei kwes ninsi dima. Gima leu api dibindei ngkwei nimbumbati mem TUHAN De Ig kin gandum di ikwas tut TUHAN kin biei nggrai di ui-gwang kei hagom ei ninsi dima hanyen.
10 Ter leu gima ne dingat lo, yo di iba musik bipai doia kin Lewi nya imbut bintek leu minu ndig Yerusalem bingkwei hanyen ug ei itimieisi bigyai miai ei idihyei bidem yok hanyen lewo limwa Israel nya igimpu yok tut isuarti nya bi. 11 Gima bindei ba, disok kep nibou nya drek dip lewo isindui sut TUHAN De Ig bijo hak ei. Dijem Lewi nya kin yo di iba musik bipai doia ba, ingkwei hanyen kwei ei minu ndig Yerusalem leu binhyepo igyai kep ide midyai ei TUHAN De Ig hanyen. 12 Gima bindei ba, limwa Israel yahagom ikinyon ei nikwas gandum kin ba anggur ngei kin mini zaitunti ba, ikwas gom leu ningot gom lene nok tut TUHAN De Ig hanyen bittei hagom ug ei ninsi ninju ndigban ngug-ngau eisi. 13 Dindo midyai niya ser ninsi di inju ndigban ngug-ngau eisi dima bak imam nya di inyeng rino Selemya kin Zadok di ningon ki tut Musa nikos tutti nya kin Pedaya di ntun Lewi nya him. Ba, dita Hanan di Zakur nipmot lene Matanya nignyon cem bimpu yok. Diba dingon com yo dini lewo idem mem gima iba ingon di gom bikwas munkwas dima yok tut isut bat di igyai kep midyai dima.
14 Lene dingat nadi <<Ditde Allah e, ma ayok ngon kep mun nyeng hagom di dibon dima. Aba Ade ningon ngakeisi di nindig bibor bingondut da.>>
15 Ei nijam dima cem dingat lo, limwa Yehuda nya igyai midyai nipot ba anggur ngei ei Njap Nigwam Kep Ninghuisi ba, ibihi bu ikon gandum kin ba anggur ngei kin ba anggur ngat kin biei ara ningat kin ndigban nindigsi nya ei ide keledai ninghim dip bibittei hagom ug ei minu ndig Yerusalem cem. Diggai ser yok leu binhyepo itri mun-bipek ndiyok ei minu ndig Yerusalem mem Njap Nigwam Kep Ninghuisi au. 16 Ibou poi leu minu ndig Tirus di ibong timiei ei minu ndig Yerusalem ittei wau kin ndigban nitri hi gom hi gomti kwei ei minu ndig Yerusalem mem Njap Nigwam Kep Ninghuisi leu binhyepo itri bak limwa Yahudi nya bibipek ndiyok. 17 Lene dinjei mun dima yok hagom kep nibou Yehuda nya ba, dibipai biyok <<Apo jingon hukti tut gi jibon mun di kinei bibor tug hon gi jibindei di map kui Njap Nigwam Kep Ninghuisi bi e? 18 Sisar dima rino bindei di Allah kes hukum ei idigup bat-idigai bat nya dip tirigi po Noni bindei sar minu ndig dini pima. Jijoi sut jikum ei Allah nigga limwa Israelti bu tug hon gi jibindei di map kui Njap Nigwam Kep Ninghuisi tug hon jiyai munti dima e?>>
19 Gima rino dicuk yok leu binhyepo bikwop las muhwi mmunti lene ikinyon ei Njap Nigwam Kep Ninghuisi.p Ba, suar inggam dimbou pmem minu ndig Yerusalem hagom haninyai hak ug. Lene ma ikau dimbou hanyen au bibou Njap Nigwam Kep Ninghuisi njiriek leu ei las muhwindagom mem mmunti ug e. Dikes ditde limwa nya ibou poi bigya ser bidem dimbou pmem nya hagom ser nhyema tungwa hi ttei ndigban nitri-nibipek bicoi ug ei minu ndig mem Njap Nigwam Kep Ninghuisi au. 20 Mpe hi ne nitri-nipek mun cig nya kin yo di igya di itri ndigban nitu nya ibong hak ei ngug tig nisai ei las muhwi mmunti. 21 Noro disok kep yok <<Gino joom jingon bijigwam ei ngug tig nisai kikau ug bipek njap tekti lene gima mikui-kausi he. Gino jiyai nok gima mbigom kin bu lene midiyai dibou tut je bibor! Hon kep njap dima kwei ne yo dima ikwei hanyen mem Njap Nigwam Kep Ninghuisi bu bi sren. 22 Leu api dicuk Lewi nya leu binhyepo ibon midut nibindei kwes yonti leu api suar igya ser dimbou pmem nya leu binhyepo map kui Njap Nigwam Kep Ninghuisiti bi.>>
Lene dingat nadi <<Allah e, ma ayok ngon kep mun nyeng hagom di dibon dima. Aba Ade ningon ngakeisi di nindig bibor bingondut da.>>
23 Ei nijam dima cem dingat lo, limwa Yahudi imang bibor di iwak sop ngkiai di mben Asdod kin Amon kin Moab nya. 24 Imunggwom bat nya nite hi ingon huk niti tut nihyet Yahudi bi. Noro gi ingon huk niti tut rino nihyet mben Asdod kin mben ngkiai hiter nya ighyet. 25 Gima rino disok kep yok bidisigion yok cem leu api dibui bihi bidibrim bihi ibou. Lene dicuk yok leu binhyepo yeheng bitug hon Allah ninyeng bipia yoni migya tut imunggwom bat nya ba, iwak sop ngkiai srig yamti hanyen bu bi. 26 Dipai biyok <<Apo Nibou Ndig Salomo cut ei sisar di nok giniti bi e? Nibou ndig nindigsi ei dihyeisi dini hi ninyeng jei dor njiriek Salomo bi. Allah ningon ngakei noni ba, kon bikui bigwam nok nibou ndig di ninyeng tak kep limwa Israel yahagom. Mbro nok gima lo, sop ngkiai nya ihwen Salomo ningon bibindei ba, noni cut ei sisar dimati. 27 Jibon mun di kinei bibor jit tu! Jibrim jingkek kep Allah bijihwen bit Noni tug hon gi jiwak sop ngkiai nya dima!>>
28 Yoyada ne Imam Nibou Ndig di Elyasib nipmot rin noro nipmot gom jem nipmang bit Sanbalat di nitimieisi leu minu ndig Bet-Horon. Gima rino dijji Yoyada leu minu ndig Yerusalem bihigom.
29 Lene dingat nadi <<Ditde Allah e, ayok ngon kep imam dima yok di ibindei ba, map kui midyai imam nya ideti kin Ade gi preu po apreu ei tug hon yoni kin Lewi nya pima.>>
30 Lene dibindei pwoi limwa Israel leu mun nyeng di kim ninyeng ngkiai nya hagom. Lene dikes tut nikos tutti nya poi mem imam nya kin Lewi nya leu binhyepo bikwop yo dima tungwagom-gom yai kep nide midyai binonti. 31 Dinyohou dimig nikos tutti leu binhyepo limwa nya irop biei mui mem imam nya ibindig mindhe-ndhe ei humti bak TUHAN bikwop njap ba, limwa nya ittei ide ningat gi nimbie him leu ide miaisi ba, ibikuk yok bak TUHAN.
Lene dingat nadi <<Ditde Allah e, ma ayok ngon kep mun nyeng hagom di dibon dini ba, anjei mun di kei bak dani drek dip.>>