Timiei nya di ibong ei minu ndig Yerusalem
11
1 Nibou nya ibong hak ei minu ndig Yerusalem. Noro limwa nya ikus bit ba, idimig bibikwop nimpung ig bei simnai ei leu api iba bit nimig mbus bidimig nimpung ig bei gom leu ningot gom ei lene nok. Suar nimpung ig bei di ikus bit di ibimig mbus dima ibong hak ei minu ndig Yerusalem di Allah dimig ei mem Nonti. Leu api nimpung ig bei nindigsi nya yahagom yuug bong ei minu ndig kin minu mien hiter nya. 2 Ba, limwa nya inggei sut yo di ice tut gima ibong hak ei minu ndig Yerusalem nya. 3 Limwa Israel nya bitut imam nya kin Lewi nya kin yo di igyai midyai ei TUHAN De Ig nya kin yo di igyai midyai mem Salomo ide nintun him yamti di bram yam nya pima yahagom ibong ei itimieisi ei minu ndig hiter nya di nok yonti ide dihyei nipou su.4-6 Nibou nya ibou poi di intun keret Yehuda kin Benyamin him ibong timiei ei minu ndig Yerusalem. Gini ne daptar di tibim tut nibou dima yok inyeng ri.
Yo di inggre kin keret Yehuda inyeng,
Ataya di Uzia nipmot ba, Zakharia nignyon. Ibou poi di inggre kin Ataya nidigup bat-nidigai bat nya inyeng rino Amarya kin Sefaca kin Mahalaleel kin Peres kin Yehuda. Mimbri kui yo dini ingkek ba, imangti ibou sratus bitai ningot muhwindagom ba, muhwindaningai. Maaseya di Barukh nipmot lene Kolhoze nignyon. Ibou poi di inggre kin Maaseya nidigup bat-nidigai bat nya inyeng rino Hazaya kin Adaya kin Yoyarib kin Zakharia kin Syela kin Yehuda.
7-9 Yo di inggre kin keret Benyamin inyeng,
Salu di Mesulam nipmot lene Yoed nignyon. Ibou poi di inggre kin Salu nidigup bat-nidigai bat nya inyeng rino Pedaya kin Kolaya kin Maaseya kin Itiel kin Yesaya. Yo cin di Gabai kin Salai ne yo di imbier kim Salu him hak ri. Yo di intun Benyamin him dini yahagom imangti ibou sratus muhwindatai ningot can ba, muhwindaningai. Nibou di ibie tut yok inyeng rino Yoel di Zikhri nipmot kin nitom di ya kui Yehuda di Hasenua nipmot.
10-14 Imam nya inyeng,
Yedaya di Yoyarib nipmot lene Yakhin nipmum.k
Seraya di Hilkia nipmot lene Mesulam nignyon. Ibou poi di inggre kin Seraya nidigup bat-ndigai bat nya inyeng rino Zadok kin Merayot kin Ahitub di kui bigwam nok Imam Nibou Ndig. Imam di igyai midyai ei TUHAN De Ig dini yok imangti ibou sratus muhwindaningai ningot can ba, can. Adaya di Yeroham nipmot lene Pelalya nignyon.
Ibou poi di inggre kin Adaya nidigup bat-nidigai bat nya inyeng rino Amri kin Zakharia kin Pasyhur kin Malkia. Nibou ig bei nsi di intun ninsi de nya him dini imangti ibou sratus can ningot bitai ba, can.
Amasai di Asareel nipmot lene Ahitub nignyon. Nidigup bat-nidigai bat nya bihi inyeng rino Mesilemot kin Imer. Yo dini ibou sratus gom ningot can ba, muhwindaningai di intun ninsi de nya him ne yo di mimbri kui ingkek nya ri. Zabdiel di Gedolim nipmotl ne nibou di bie tut yok ri.
15-18 Lewi nya inyeng,
Semaya di Hasub nipmot lene Azrikam nignyon. Nidigup bat-nidigai bat nya bihi inyeng rino Hasabya kin Buni.
Sabetai kin Yozabad. Yo cin dini ne Lewi nya di ibon inyeng ba, igyok igyai kep midyai di tungwatu nya igyai ei TUHAN De Ig him ri.
Matanya di Mikha nipmot lene Zabdi nignyon. Asaf ne nidigup ri. Noni nok nibou mem yo di ipai kep doia ningat nadi nipai sigyoti.
Bakbukya di ya kui Matanya.
Abda di Samua nipmot lene Galal nignyon ba, Yedutun ne nidigup ri.
Lewi nya imangti di ibong hak ei minu ndig Yerusalem di minu kwes dima yahagom ibou sratus can ningot muhwindaningai ba, bitai.
19 Yo di igya ser dimbou pmem nya inyeng,
Akub kin Talmon kin isut bat nya ba, imangti ibou sratus gom ningot muhwindacan ba, can.
20 Limwa Israel nya kin imam nya kin Lewi nya gi nindigsi nya yahagom ibong hak ei ide dihyei di jo bidem minu ndig kin minu mien ngot ei hanjop Yehuda nisurti-nipekti. 21 Yo di igyai kep midyai ei TUHAN De Ig ne ibong hak ei hanjop Ofel ei minu ndig Yerusalem. Yo dini igyai midyai ei Ziha kin Gispa inda behei.
22 No di yok niyai kep Lewi nya di ibong ei minu ndig Yerusalem ninyeng Uzi di Bani nipmot lene Hasabya nignyon. Nidigup bat-nidigai bat nya bihi inyeng Matanya kin Mikha. Uzi ntun Asaf ninsi de nya him binyohou dimig yo di iba musik bipai doia ei TUHAN De Ig. 23 Yo dima insi de nya ipai kep doia sindam ba, yahati tut musik di ibipai doia bikwop njap-njap bit leu nibou ndig nicukti.
24 Petahya di Mesezabeel nipmot di coi bit Zera ninsi de nya di ntun keret Yehuda him kui bigwam hacan mem mben Israel ei nikei Persia noho bei.
Limwa di ibong timiei ei minu ndig kin minu mien nindigsi nya
25-30 Limwa nya imang bibor intek ba, ibong bidem minu ndig kin minu mien ngot di jo dideu ide dihyei di igyai miai eisi nya. Limwa Yehuda nya bihi ibong ei Bersyeba nite bei mpia nibiho kin Mbang Briep Hinom nite bei mpia nijjai ikieti. Yo dini ibong bidem minu ndig kin minu mien Kiryat-Arba kin Dibon kin Yekabzeel kin Yesua kin Molada kin Bet-Pelet kin Hazar-Sual kin Bersyeba kin Ziklag kin Mekhona kin En-Rimon kin Zora kin Yarmut kin Zanoah kin Adulam kin Azeka kin Lakhis.
31-35 Keret Benyamin bihi ibong bidem minu ndig Geba kin Mikhmas kin Ai kin Betel kin minu mien ngot di jo dideu nya cem minu ndig Anatot kin Nob kin Ananya kin Hazor kin Rama kin Gitaim kin Hadid kin Zeboim kin Nebalat kin Lod kin Ono cem. Ibibong bidem Mbang Briep Tukan Nya cem. 36 Nibou nya icuk Lewi nya ibou poi di nipou yo ibong ei hanjop Yehuda ba, yuug bong bit limwa Benyamin nya bu.