10
1 No di tak buk nimbie him ngat rino nibou hanjop di Nehemia di Hakhalya nipmot. Leu api Zedekia tak buk bram bu. Cin dini itak buk bibie leu api limwa dini yok itak buk bram yok bram yam bu.2-8 Imam di itak buk bram yam nya inyeng rino Seraya kin Azarya kin Yeremia kin Pasyhur kin Amarya kin Malkia kin Hatus kin Sebanya kin Malukh kin Harim kin Meremot kin Obaja kin Daniel kin Gineton kin Barukh kin Mesulam kin Abia kin Miyamin kin Maazya kin Bilgai kin Semaya.
9-13 Lewi nya di itak buk bram yam nya inyeng rino Yesua di Azarya nipmot kin Binui di ntun Henadad ninsi de him kin Kadmiel kin Sebanya kin Hodia kin Kelita kin Pelaya kin Hanan kin Mikha kin Rehob kin Hasabya kin Zakur kin Serebya kin Sebanya kin Hodia kin Bani kin Beninu.
14-27 Nibou mem mben Israel di itak buk bram Lewi nya inyeng rino Paros kin Pahat-Moab kin Elam kin Zatu kin Bani kin Buni kin Azgad kin Bebai kin Adonia kin Bigwai kin Adin kin Ater kin Hizkia kin Azur kin Hodia kin Hasum kin Bezai kin Harif kin Anatot kin Nebai kin Magpias kin Mesulam kin Hezir kin Mesezabeel kin Zadok kin Yadua kin Pelaca kin Hanan kin Anaya kin Hosea kin Hananya kin Hasub kin Halohes kin Pilha kin Sobek kin Rehum kin Hasabna kin Maaseya kin Ahia kin Hanan kin Ana kin Malukh kin Harim kin Baana.
Srat gi preu nicom nigau ei yamti ningat
28 Nye di limwa Israel kin imam nya kin Lewi nya kin yo di igya ser Dimbou Pmem ei TUHAN De Ig kin yo di iba musik bipai doia igkei nya kin yo di igyai midyai ei TUHAN De Ig nya kin nyeni nitnem bat-nimunggwom bat nya di wer imahan di ingon huk niti tu kin yo di ibit Allah de nicukti nya yahagom kin yo di yoom yonti ter leu mben ngkiai di ibong timiei ei nyende minu dini, 29 nahagom nibicom yam bit nyende nibou nya ba, nahagom niba neheng bipreu ei mem gima niba nyeni niyai munti nya bibit Allah Nicukti di niyai tug hon Nide awak di Musa. Gino niyai bipek kep mun di nipreu sut ei Allah Noho bei dini bi lene ma Noni sigion nye hak ug.
Nyeni niba neheng bice tut mem gima nibit nyende TUHAN Allah nicuk nyeti nya kin Nide nikos tutti nya kin ningginau nyeti nya hagom.
30 Nyeni neheng tut bipia miniwak yam srig yamti bit ngkiai nya di ibong timiei ei nyende minu dini bi sren. 31 Gino ngkiai nya ijoi sut itri gandum kin ndigban hiter nya binye ei Njap Nigwam Kep Ninghuisi cem njap di kwes nindigsi nya cem lene minipek mun nyeng hi leu yok bi sren.
Bikwop ari bingwam gi nimuhwindacan lene miniyai miai njita ba, minibrim nyende ningwam di jo bak yo di hiter ei ari bingwam dima cem bi sren. 32 Bikwop ari bingwam hagom minikwas nyende perak nibuhunti gram muhwi ba, nibahati tut TUHAN De Ig. 33 Minitin ei mun di imam nya isuar mem ibibon njap nibon midut nya ei TUHAN De Ig. Mun dima yok ne roti di idis ei TUHAN Noho bei kin njita mem nibon midut nibipai sigyo bak Allahti di indig ei nimbar hum dokti bak Noni bikwop njap-njap kin mun di isuar mem midut di ibon kep Njap Nigwam Kep Ninghuisi kin midut di ibon kep Bed Jep kin midut nindigsi nya kin mindhe-ndhe di indig ei nimbar hum dokti mem midut nibiyai nikos ser sisarti cem rin ba, nirop ninda ndigsi ne mun nyeng di isuar mem TUHAN De Ig hagom.
34 Nye di limwa nya kin imam nya kin Lewi nya minikus bit bikwop ari bingwam ba, nibinggok tut keret di tou rima mirop biei mui mem indig mindhe-ndhe kep hum ei nimbar hum dokti bak nyende TUHAN Allah bit leu Nide nikos tutti pai binyeti.
35 Minittei gandum di len nimbie him ngat kin biei ngat di nggwop nimbie him ngat nya bikwop ari bingwam ug ei TUHAN De Ig. 36 Minibuwak nipmot bat mighumbou nya bak imam nya ei TUHAN De Ig leu binhyepo nidimig yok pijum ei mem Allah bit leu Nide nikos tutti nya. Minikwas sapi kin domba kin kambir nipmot bou nya cem tut Allah. 37 Minittei tepun di niba gandum di nikos nimbie him ngat biniyai bak imam nya ei TUHAN De Ig bikwop ari bingwam. Miniyai nok gima tut munkwas nindigsi nya nok ba anggur ngei kin mini zaitun ngei kin biei ngat nindigsi nya cem.
Minikwas ningat leu miaisi gom leu ningot gom lene nok leu api nikes hagom ei Lewi nya indati. Lewo yoni ingon ya mem gima imbus munkwas nya gom leu ningot gom lene nok gima bidem minu ndig di niyai miai eisi nya hagom. 38 Mpe di Lewi nya ingon ya mem munkwas dima yok di imbus keyam ei ne suar imam gom di ntun Harun him pijum ningat rima bit yoni bingig niyai kep. Suar Lewi nya ikwas mun di limwa nya ikwas dima yok gom leu ningot gom lene nok ba, ibindei coi ug ei ninsi di inju kep munkwas eisi ei TUHAN De Ig. 39 Suar limwa Israel kin Lewi nya ittei munkwas di ikwas kep ngan-ngan tu nya nok gandum kin ba anggur ngei kin mini zaitun ngei hagom ug ei ninsi di inju njita kikep eisi. Ninsi dima mem inju nimbumbati di mem TUHAN De Ig cem kikep eisi. Imam di igyai kep midyai kin yo di igya ser TUHAN De Ig kin yo di ipai doia kan nya ibong ser ninsi dima.
Minitunggwei sut ninyohou nyende TUHAN De Ig bi sren.