Mben Israel ipai jit ide sisar
9
1 Ug ei njap gi ningot can ba, bitai ei bed dima lene mben Israel yahagom induk yam kwei bisindui njita mem nituti poi ba, ijuk sinsun kron cem yahap dihyei ndung ei ibou nggram him cem di bindo bipia ittin ser ide sisar. 2 Timiei minu Israel dini yok imbres yo leu ngkiai nya nipou su. Lene yahagom ikiju ba, igya ter bipai jit ide sisar kin idigup bat-idigai bat nya ide sisar cem. 3 Ezra kwop leu Srat Nicukti kikau mem jam nitindur ningai leu api yahagom ingig itingou mem nihyet. Lene yahagom ipai jit ide sisar kikau mem jam nitindur ningai bu. Gima ngwig lene ikuk yok bak TUHAN di yoni ide Allah binggei sut Noni.4 Keret Lewi di inyeng rino Yesua kin Bani kin Kadmiel kin Sebanya kin Buni kin Serebya kin Bani kin Kenani yahagom igya nai ei impek gomti ba, iba ighyet nindig bibor ngat nadi bak TUHAN di yoni ide Allah.
5 Yo di ibie tut yok mem njap ndig dima rino keret Lewi nya di inyeng rino Yesua kin Kadmiel kin Bani kin Hasabneya kin Serebya kin Hodia kin Sebanya kin Petahya yahagom ipai,
<<Ma jahagom jikiju bijiya leu api jinggei sut TUHAN di nyeni ide Allah! Ma jinggei sut Noni bijo ninno bijo kikau! Ma tungwatu nya yahagom inggei sut ninyeng di jei bibor ba, sindem bibor cem! Ninyeng jei bibor dor njiriek ighyet di ibinggei sut Noni.>>
Nadi di tibim ei mben Israel yuhui him
6 Lene mben Israel ingat nadi,
<<TUHAN e, Nangkom anyeng jei bibor. Apai tes mpia-bbed him bitut ham di joti nya kin dihyeisi kin muk ngeisi bitut mun di joti nya hagom leu api abindei ba, igyai niyaijo ba, anyohou yok cem. Nisindemti nya ei mpia-bbed him hagom ikuk yok binggei sut Na.
7 TUHAN e, Nangkom ne Allah ri. Adimig Abram leu nide mben ikieti leu api abuwak noni kwei leu minu ndig Ur ei minu Babel. Hon kep njap dima bikui ne ajem ninyeng Abraham.
8 Jo nibreisi mem Na bipia noni ningon gom tut Na ba, bit ahyet cem. Gima rino Na di TUHAN kin Abraham jibon gi preu nicom nigau ei yamti. Apreu ei mem noni bipia mporo ma ayai minu di mben Kanaan kin Het kin Amori kin Feris kin Yebus kin Girgasi ide di ibong ser nya hagom binoni leu binhyepo nide nintun him di bram yam nya migyai dihyei hanjop nsi dima yok hagom bibong ser nok ide dihyei ninda rom. Lene ayai hagom bit leu nok apreu ei mem noniti lewo angon gom.
9 Angig ayai kep nyeni nidigup bat-nidigai bat di igyai inghuisi wei ei minu Mesir nya leu api angig atingou mem ighyet tirigi ikwei ya hon Muk Lipig ba, yahara Na.
10 Abindei mun di mindur di buhun bibor cut igkep nibou ndig mem mben Mesir kin yo di igya kui noni kin nide limwa nya yahagom lewo angig ayai kep Ade limwa nya tirigi mben Mesir ihwen bit yok. Mun dima bindei ba, anyeng jei bibor kikau kwei bipek ammani kep.
11 Atin puig mem Ade limwa nya ei muk ngeisi ba, abie tut yok bimbut kak ninggati. Noro minyei dima kot yo di yuhuk bram yok bisar bingwig ei minyei jou dem kep nok tig di cut ug ei muk mpoti.
12 Aba bumbuhui ttou bibie tut yok mem njap lene aba cou hum bipiga digai ide puig mem mmun.
13 Asrek kwei leu mpia-bbed him ei Nungug Sinai leu api ambrap bit Ade limwa nya ba, ayai Ade nicukti kin Ade nikos tutti kin Ade nipingok yokti di nijit-jau nya bak yoni ei sirima.
14 Apingok ingonti tut Njap Nigwam Kep Ninghuisi leu binhyepo ipigig sut ei mem Na di TUHAN. Ba, ayai Ade nikos tutti nya bak yoni tug hon Ade awak di Musa.
15 Tirigi po inggum ba, njita ngwig leu yok pima lene abindei juk roti kwei leu gwamti mem yok. Tirigi po inggobiau pima ne abindei ba, minyei bousi biam kwei leu bor ngug mem yok. Acuk yok leu binhyepo icoi ug ei minu po aba neheng bipreu sut ei mem yok nipou su pima ba, ibong kei igwam kei eisi.
16 Noro jei bi ne nyeni nidigup bat-nidigai bat pima yok ingon jei ba, ingkek ndok cem ba, ingon mpo tut Ade nicukti nya cem.
17 Iprinder bibor cem ibbwe ser mun di kei di ayai biyok hagom cem ingon prion ser mindur di abon mem yok cem. Iba ingon di jei bidimig tungwagom ei bita noni nok nibou di bie tut yok hanyen ug ei minu Mesir bingkwei nok awak. Noro Na di Allah ne nikos ser sisar cig kin noom ningon cig ri. Nani ne ningondut tungwatu nya cig kin ningon sibui sut yok haninyai bi cig cem ri. Ade ningon ngakeisi nindig bibor bibindei ba, akes yok ei bihigom bi sren.
18 Yoni ibon kwar di noyam kin sapi nikre bou inda him lene isimbot dat bipia kwar dima ne mun di ikuk yok bak di bie tut yok kwei leu minu Mesir ri! Allah e, yo dima ighyet wer mpiahi tut Na nindig bibor!
19 Noro akes yok bihigom ei iggum ndigsi bi lewo angondut yok nindig bibor. Abrim bumbuhui ttou kin cou hum di piga digai ide puig mem njap kin mmun ningwig leu yok bi sren.
20 Aba angon di nggriu sut yok nyohou pingok ingonti ba, ayai njita manna kin minyei biyok cem.
21 Ayai mun di isuar nya hagom biyok ei iggum ndigsi kikau mem ari bingwam ningot bitai. Ide sinsun rik bingwig leu yok ba, imig jou dwoi bidut cem bi.
22 Asindem tut yok leu binhyepo ihwen ide siceu di mben ngkiai ei hanjop nsi di bikrop ttai ide minu jep nya. Icoi bigyai nibou ndig Sihon de minu ndig Hesybon kin nibou ndig Og de minu Basan bigyati.
23 Abindei bidigek kep mpia ba, igyai imunggwom bat nya imangti noyam kin ham mpia-bbed him nimangti. Apek dihyei hanjop nsi nok gi dem mem idis yam eisi bibong kei igwam kei eisi bit leu nok apreu ei mem idigup bat-idigai bat nyati nipou su.
24 Yo di intun him yok nya ihwen mben Kanaan di ibong ei minu dima bingwig tug hon Ade nisindemti di sindem tut yok. Ayai nisindemti biyok leu binhyepo Ade limwa nya ibibon nibou ndig mben Kanaan bitut ide limwa nya yahagom bit leu ingon kanti.
25 Ade limwa nya ipos minu ndig di bon tentara nibousi di igya coi nya kin dihyei di nnum kei kin ig di mpung tut ndigban di nibok kak kin minyei bousi nya kin biei zaitun nghousi nya kin biei di ngat ningat nghousi nya kin ba anggur nghousi hagom. Igyem njita di ndei yok bit leu ingon kanti apino immau ndok. Ingon llei sut mun di kei nyeng hagom di ayai biyok tu.
26 Noro Ade limwa nya ikiek imig jo tut Na bibit ahyet bi. Yoni iba inghim bak Ade nikos tutti nya. Igyai nimai bak nabi nya di isok kep yok bipia suar ikwei kuk yok bak Na di Allah hanyen bu. Ade limwa nya ighyet wer mpiahi tut Na bikwop nok ug.
27 Gima rino asindui sut ide siceu nya bihwen yok leu api inyeng tak kep yok. Tirigi mun di buhun cut igkep Ade limwa nya lene yahara Na di Allah leu binhyepo ampu yok. Leu api abirop ighyet hanyen kwei leu gwamti. Angondut yok ba, ata nibou kin nikon pran cig nya mem gima iteu yok bingwes ngun leu ide siceu nya inda nsi.
28 Tirigi ibong kei igwam kei hanyen tu lene ibon sisar sindam apino asindui sut yok ba, icut bak ide siceu nya hanyen bu. Noro ittin ser ide sisar dima ba, yahara Na ei gwamti leu binhyepo ateu yok bingwes ngun leu api angig atingou mem ighyet nyen-nyen ba, angondut yok cem leu api ateu yok bingwes ngun cem.
29 Asok kep yok leu binhyepo ibit Ade nipingok yoti. Mbro nok gino ikan tut bipia yo di ibit Ade nicukti nya migyai niyaijo lo, ingon jei ba, ikou sut Ade nicukti nya. Isem tut ahyet lewo ingkek ndok cem ighyet prinder cem.
30 Aba angon di jo nyahan sok kep yok bikwop ari bingwam hagom sindam ba, Ade Ninnei pingok ei ingonti tug hon nabi nya ighyet cem noro Ade limwa nya itingou nam ser. Gima rino asindui sut yok ba, icut bak tentara ngkiai.
31 Mbro nok gima lo, acom yok ba, acok tut yok bihigom bi lewo angondut yok nindig bibor. Ningat ne hi noyam kin Na di Allah bi. Asingat tut Ade limwa nya nindig bibor ba, angondut yok kikau!
32 Nyende Allah e, asindem bibor! Anyeng jei cem abindei ba, tungwatu nya ittin tut Na cem! Aba angon gom biyai hagom bit leu nok apreu ei mem nyeti tu. Abindei mbut ba, abindei bipek kep mun di apreu ei mem nye cem. Tirigi po nibou ndig mben Asyur mbuk tut nye pima kikau kwei bipek ammani kep ne nahagom nitug ndei mun di buhun bibor! Nyende nibou ndig nya kin imam nya kin nabi nya kin yo di inyeng jei nya nidigup bat-nidigai bat nya nahagom nitug ndei mun di buhun bibor! Ma ayok ngon kep mun di buhun tak nye!
33 Aba angon di sren-srau bibibon nye tirigi akes hukum ei nye di nibon sisar dip. Mbro nok gino nicut ei sisarti lo, angon gom kikau.
34 Nyeni nidigup bat-nidigai bat nya kin nibou ndig nya kin yo di inyeng jei nya kin imam nya yahagom ipwoi angon bitut acuk nyeti nya bi. Yahagom itingou ndok ser Ade nicuk nyeti nya kin Ade nisok kep nyeti nya.
35 Anjei mun di kei bak nibou ndig nya di inyeng tak kep Ade limwa nya tirigi ibong kei igwam kei ei minu di bres bibor ba, nnum bibor po ayai biyok pima. Noro igikes igyai munti di mbuk bibor nya bijo ei leu bikuk yok biNa bi.
36 Gima rino nogindini ninok awak ei nyende nitimieisi di ayai binye nipou su. Ningat ne suar nyeni ningon llei bibor tut minu di nnum kei cem di mpung tut njita cem dini noro bi.
37 Lewo nibou ndig di abindei ba, inyeng tak kep nye igyem njita ngat leu beisi dini hagom sindam lene ibibon nyeni kin nyende mindhe-ndhe nya bit leu ingon kanti. Ningat ne mun dini yok hagom cut igkep nye drek dip nyende sisar. Nibou dima yok inyeng tak kep nye kin nyende mindhe-ndhe nimuhup tu nya bit leu yonti ingon kanti. Leu gima rino nogindia nitug ndei ninghuisi wei ba, ningon kinei bibor lewo ico kep nye.>>
Mben Israel itak buk kep gi preu nicom nigau ei yamti
38 Mun di cut igkep nye di mben Israel hagom bindei ba, niba neheng bi preu ei tug hon srat bokti dini leu api nyende nibou nya kin Lewi nya kin imam nya yahagom itak buk ser srat dima ninggrupti.