Nitok joti nya igyok ingon gom drek dip Nehemia niyai munti nya
6
1 Mbro nok gino nigikinding dimbou pmem nimeng nya bitut nidihim nya ei ngug tig dima biput mem mpe dima bigyo lo, nitok joti nya di inyeng rino Sanbalat kin Tobia kin Gesyem kin nyende siceu nindigsi nya imiap tut gi nisien ser ngug tig nimihyeti nya hagom tu leu api ingon kinei sut nye. 2 Sanbalat Gesyem nya ipas srat nibijem ba, ipinak kwei bida leu binhyepo duug um yok ba, nidem yam ei minu mien gom ei Briep Bou Him Ono. Noro dikan tut bipia icom biei mpup ris da leu binhyepo bon nituti mem gima ihwen da. 3 Gima rino dibuhup ide srat bidipinak dibuhupti hanyen biyok. Dipai biyok <<Bon nituti mem gima dihwou ngat je bi. Lewo dinda jo kep midyai di bon ninyeng yo. Gino dikes midyai dini ei ba, dihwou ngat je leu lene midyai dini mbut sindem bi.>>4 Yo dima ipinak srat di ibijem da dima mbitai bram yam kwei bida. Noro dibuhup srat dima yok hagom noyam kin gi dibuhup nipou su pima.
5 Lene Sanbalat pas srat gi nimuhwi bipinak kwei bida tug hon no di ya kui noni gom lo, krop kep srat bokti dima bi.h 6 Srat dima nibimbiti pai,
<<Gesyem krau kep mimpui hyet di tibim bidem ngkiai nya di ibong ei hanjop di gahai dini kou ikieti di pai bipia aya tut limwa Yahudi bijiwin ngug tig ninggekti ttai minu ndig dima ba, jitin ei jingon kanti mem gima jaham jimbuk kep Nibou Ndig. Lene na di Nehemia atin ei angon kanti mem gima limwa Yehuda nya ita na nok nibou ndig mem yok. 7 Lene abidip huk nabi nya ei minu ndig Yerusalem leu binhyepo itri tut nimbot kepti tut na bipia anok nibou ndig ei hanjop Yehuda cem tu. Jei bi lene mimpui hyet di srig-srig nyen dima mitibim ug ei nibou ndig nitingou nsi. Gima rino suar akwei ngat nye ba, isimbot kep biyam tut ug e.>>
8 Noro diba srat bibuhup hanyen bak <<Mun di apai dima yok hagom igbit bi ba, aris nanti nitu he.>>
9 Lewo dikan tut bipia iba srat dima bicug nye leu binhyepo nidigit tut ba, nikes ninda tut midyai di niyai kep dini. Nok rino dingat nadi <<Allah e, ma abindei ba, dingon ngkiem!>>
10 Mpe dima lene duug cem kep Semaya di Delaya nipmot ba, Mehetabeel nignyon. Mun nyeng gom bigen ser no ba, bit bon gikwei ngat da kan bi. Duug krau lene noni pai bida <<Akwei ba, suug ku sa nyahan ei TUHAN De Ig. Leu api silit ser dimbou nya hagom bingkiem lewo yo di imbuk nya bihi itin ei mem gima igyai nimai bina. Mpaba mmun di ammani migyai nimai bina e?>>
11 Noro dibuhup hanyen bak <<Dani ne no di ttin di nang-nang wai rin bi. Dani ne tungwatu he rin ba, dem tut gima diku da ei TUHAN De Ig leu binhyepo dingwes ngun ei sirima bi. Da dikou!>>
12 Tirigi dikan-kan nyen tut Semaya nihyet nghwak him dima lene dingon huk niti bipia nipai cuk dati dima kwei leu Allah bi. Noro Tobia Sanbalat nya ingot kep noni leu binhyepo pai sut mun di pek kep ei nidipti bu dima bida. 13 Lewo itin ei ingon kanti mem gima noni pai nok bibindei ba, dittin tut bidibit ingon kanti dima leu api dibicut ei sisarti. Igyai munti dima mibon nituti mem yok ba, ibindei bidinyeng kinei drek dip leu api tungwatu nya mipui-pui nyen dinghapti tut.
14 Lene dingat nadi <<Allah e, ma ayo ngon kep Tobia Sanbalat nya ibon munti dima ba, akes hukum ei yok dip drek dip! Lene ayai nok gima tut nabi sop Noaja kin nabi nindigsi nya di ijoi sut yahak nittin ei dati dini.>>
Ikes inda tut niwin ngug tig
15 Niwin ngug tig nikineisi hanyenti dima yem njap nitindur ningot muhwi ba, can. Midyai dima put hak ei njap nyatungwagom ba, muhwi mem Bed Elul. 16 Tirigi mben di iba nitok binye di ibong ttai nye imiap tut lene idigit tut ba, igyaisi mmai lewo yahagom ikan tut bipia Allah mpu nye tut midyai dima tu.
17 Ei nijam dima ne nibou Yahudi imang bibor kin Tobia ipas srat biyam nyen. 18 Tobia nipmang ne Sekhanya di Arah nipmot rin ba, Yohanan di Tobia nipmot wak Mesulam di Berekhya nipmisop ba, limwa Yahudi nya imang bibor itti kin Tobia drek dip gima. 19 Nibou mem timiei Yahudi nya pima indat kep Tobia nibon munti di kei nya ei ditingou nsi bimbot kep tut dihyet hagom hanyen bak noni. Ninda jo kep srat bipas bida mem gima biyai ningon di ttin bida.