Nehemia ngondut nuhui mbum nya
5
1 Njap poi bu ne pinai nya kin sop Yahudi nya imang bibor inso isut bat limwa Israel nya. 2 Ba, bihi ipai <<Nyende ig bei nsi nya imang. Nisuar njita gandum mem niyem bimpu nye ser nhyema nimai ninggum bi.>>3 Ba, bihi bu ipai <<Ninggum dini bindei ba, niba nyende miai njita kin miai ba anggur ngat nghousi kin nyende ig di nibongti bipek gandum mem gima niyem ser nhyema nimai ninggum bi. Apino jei bi ne gandum niceu mibrim mun di ninyeng tut pima yok hagom ningwig leu nye.>>
4 Ba, bihi bu ipai <<Nidahat mitiei mem gima nibigo belasten gau nyende miai njita kin miai ba anggur ngat nghousi bit leu nibou ndig nikos tut ei su. 5 Apo nyeni cem mben Yahudi bi e? Apo nimunggwom bat nya noyam kin munggwom Yahudi nindigsi nya bi e? Ningat ne nisindui sut nimunggwom bat nya ba, inok awak hak lene gima he bi lewo nitri nipmisop gwam nitta pilei nya ba, ibihi inok awak tu. Bit bon niyai nyendeti kan bi. Lewo niba nyende miai njita kin miai ba anggur nghousi nya bipek gandum lai-lai de leu yo di inyeng nya tu.>>
6 Tirigi dimiap tut insoti dima lene dingon sibui bibor, 7 bidiyai gi kos tut ei mem gima diyai dibou tut. Leu api dipai kep yo di inyeng jei nya kin nibou limwa nya bidisok kep yok <<Jico kep jide bat limwa mben Israel!>>
Leu api ditri tut bipia suar yahagom idem yam mem gima imbus tut munhyet dini. 8 Dipai biyok <<Jikan tut bipia iba ide nisindemti di jo binye biteu ide bat mben Yahudi nya di suar itri yonti nok awak bak mben ngkiai hanyen tu. Noro nogindi pa je di jinok limwa hanjop Yahudi gom jibidip huk jisut bat Yahudi nya bijibindei ba, itri yonti bije ba, inok awak hanyen tu!>>
Lene nibou ngot pima yok imiap dipingok yokti dima leu api yahagom indun bou leu api yahap iji bi lewo bit bon ibuhup ba, ipai mun mem ibisu tindei igyai munti dima kan bi.
9 Dipai biyok <<Jiyai munti dima kei bi! Suar jiba jiyai munti nya bindo bipia jittin tut Allah. Tug hon nisinati dima lene ibiyai nituti bak ide nitok joti nya kin yo di ikuk yok bak ide kwar nya yahagom ipai nye kinei. 10 Danti kin ditde adig-ajoi nya kin disut bat nya nahagom nidahat ide mitiei ngwam kin gandum ngwam bak limwa nya lo, hon kep ammani kui lene minibrim mun dima yok hanyen leu yok bu bi. 11 Suar jeni cem jidip tut ningwam mitiei kin gandum kin ba anggur ngei kin mini zaitun di jo bak limwa nya hak ug. Lene suar jingkwei ide ngoi dumti kin miai ba anggur dumti kin ide miai njita dumti kin ide miai mini zaitun dumti kin ig di ide nya hagom hanyen biyok haninyai!>>
12 Lene nibou dima yok ibuhup <<Minibit apingok nyeti dima. Miningkwei mun dima hagom hanyen bak yo dima lene minibidip huk yok tut gima igo mitiei hi binye cem bi.>>
Dinduk imam nya kwei leu api dicuk nibou pima yok leu binhyepo yeheng tut mun di ipai ei yuhui him pima ei imam nya yoho bei leu api suar ibindei bipek kep ide nipreu eisi dima nok mungkun kei. 13 Leu api dikwek minghas niboug di jo dintig bou bidimpig bidipai biyok <<Bikwop tungwagom-gom di bon mun bipek kep nipreu eisi dima bi lene ma Allah mpig no dima nok minghas di dimpig dini. Allah miyai mun di nyeng tut nya hagom leu no dima leu api noni minok nikinei-kinau hak.>>
Yo di idem yam ei dima ibuhup <<Igbit rin o!>> Leu api yahagom ikon TUHAN ninyeng a. Apino nibou nya yahagom ibon mun bipek kep ide nipreu eisi.
Nehemia singat tut ninttig-tta nya
14 Mpe dima lene Nibou Ndig Artahsasta ninyeng tak kep Persia habiei leu nijam ari bingwam nyatungwagom kikau ug bipek ari bingwam ningot ningai ba, can tu. Dinok nibou hanjop Yehuda mem nijam ari bingwam simnaibrimigcan dima lo, dani kin ditde adig-ajoi nya nibrim njita di ibahati tut da di nibou hanjop mem nijam dima bi sren. 15 Nibou hanjop di igyai midyai nipou tirigi diyai midyai bram yo bigyo dima yahagom ikes mun di buhun ei limwa nya inghat dip bibrim mitiei perak ningot bitai bikwop njap-njap mem njita kin ba anggur ngei leu yok. Lene yo di igya kui nibou pima yok cem ico kep limwa nya. Noro dittin tut Allah bidikuk da bak. Gima rino diyai bram igyaisi dima bi. 16 Dani kin yo di impu da cem nahagom nicom nahanggwap ei niwin ngug tigti bit nindigsi nya ba, digitug ndei dihyei poi mien ei minu dima nok dimuhup mem dinda rom tug hon midyai niwin ngug tig dimati bi sren. 17 Dikwen njita ei ditde ig mem limwa Yahudi ibou sratus gom ba, ningot muhwi kin ide nibou nya cem bigyem bit da bikwop njap-njap. Ba, imangti dima ne limwa Yahudi nya rin lo, ngkiai nya yahagom di ibong ei hanjop di gahai nya cem ikwei yem njita bit nye. 18 Diba ditde mitiei bipek sapi ningut gom kin domba di pap-nap kei nya ningut muhwindagom kin kuke nya mang bibor cem bikwop njap-njap. Bikwop njap gi nisimnai lene diba ditde ba anggur ngei bikum ei njita dimati. Mbro nok gima lo, dikou sut gima dibrim njita di ibahati tut da di nibou hanjop mem nijam dima. Lewo dikan tut bipia mun di buhun tak limwa nya dima dem mem yok tu.
19 Allah e, handei kon ba, ayok ngon kep mun di dibon mem limwa dini yok ba, anjei mun di kei bida drek dip.