Nehemia om kep mben Yahudi ide siceu nya
4
1 Tirigi Sanbalat kan tut bipia mben Yahudi ikinyon ei nikinding ngug tigti tu lene ningon sibui sut nye ba, nihyet wer mpiahi tut nye. 2 Noni ya ei nisut bat nya kin tentara Samaria yahagom yoho bei bisimbot dat bipai <<Mben Yahudi di isindem mem igyai midyai dini bi inggon i? Igyok ingon mem ikinding minu ndig dini bikei hanyen e? Ikan bipia isindem mem igyai hagom biput mem njap gom ngat gino ibon midut nindig mindhe-ndhe ei nimbar hum dokti e? Isindem mem iba tig di hum yem dini biprion nok ngug tig di bikrop ttai ide minu ndig e?>>3 Tobia cem ya tut noni bibinut nihyet bu bipai <<Jingat ngug tig di ikinding hanyen dima i! Nsien bigbehei sindem mem gima nggek ngug tig dima bingwig!>>
4 Lene dingat nadi <<Allah e, ma angig atingou mem yo di ighyet wer mpiahi tut nye. Abindei ba, ide nicug nyeti micut igkep yonti bu. Asindui sut ba, ninggimang mun cig nya ipos ide mun di inyeng tut nya hagom ba, mben ngkiai mihwen yok lene ikat yok ug ei ingkiaisi hak ug. 5 Ma akos ser ide sisar ba, angon prion ser ide mun di mbuk au. Lewo ighyet wer mpiahi tut nye di nikinding ngug tig dini hanyen.>>
6 Nok lene nyeni ninda jo kep midyai dima kikau. Jei bi lene nikinding ngug tig di jo-jo yam dip ug ei nijeisi niken lewo ide limwa nya ita ibou ei midyai dimati.
7 Mpe dima lene Sanbalat kin Tobia kin mben Arab kin mben Amon kin mben Asdod yahagom imiap nyeni ninghapti tut gi nikinding ngug tig di bikrop ttai minu ndig Yerusalem kikau ug bipek niket ei yamti apino ingon sibui sut nye nindig bibor. 8 Gima rino yahagom yuhum yam nsi ba, ipi bihwen minu ndig Yerusalem ba, ibinggek nye. 9 Noro ningat nadi bak Allah leu api nita tentara di igya ser nye mem mmun-njap nya.
10 Mbro nok gima lo, timiei Yehuda nya sindi inso-nso nyen bipai doia,
<<Mun di buhun di nikon ei ninghat dip bindei ba, ninghuisi wei lewo mumpiang kui sur mpia. Nindei midyai nikinding ngug tig di bikrop ttai minu dini kan bi.>>
11 Mpe dima lene nyende siceu nya ikan bigya ningat yok ba, nikan tut ingon kanti bi bibou ihwen nye ug e. Leu gi nok lene bit bon ninda jo kep midyai dini bu kan bi. 12 Noro mben Yahudi di ibong timiei srig siceu nyati imig jo kep nyen kwei bimbot kep binye tut siceu dima ingon kanti. 13 Gima rino dikwas simeda kin micim kin hampiap tut yo di inda jo kep midyai dima leu api dita yok bit leu nok ide pung nikim yamti ei ngug tig nikineisi hammi mpia di ngug tig put bigyo.
14 Tirigi dingat lo, limwa nya ingon bos-bos nyen lene dipai biyok kin ide nibou nya <<Ma jittin tut ide siceu nya au. Jiyok ngon kep bipia Tuhan sindem bibor lene ma jibrim jingkek bijinyohou jisut bat timiei minu dini kin jimunggwom bat nya kin jitnem bat nya yahagom bitut ig jide nya cem hagom.>> 15 Siceu pima yok imiap tut bipia nikan tut mun di yoni yuhum yam nsi tut tu. Apino jo nibreisi mem yok bipia Allah bindei cut ide nuhum yamsi dima. Gima rino nahagom nita nibou ei midyai pimati hanyen.
16 Hon kep njap dima kui lene ditde limwa nya ikwas yam ba, bihi inda jo kep midyai nikinding ngug tig lene bihi ijuk sinsun pran bikrau micim kin mun di ibipukep ser tibor ninggwenti kin ikrau hampiap ei indati bigya ser ide siceu nya. Nibou nya di inyeng tak kep limwa dima yok yahati tut, 17 yo di ikinding ngug tig dima nindig bibor. Yo di ipian tig kwei cem iba inda nite hi yai kep midyai lo, ikrau minggwen ei inda nite hi bu ba, ibitindei ser siceu nya. 18 Tukan nya di ikinding ngug tig dima cem iba bang bikri simeda kin intig bou lo, no di miep kep pun mbrei tin ei mem gima miep pun mbrei bitto siceu itausi ya kui da hak. 19 Dipai bak yo di inyeng jei nya kin nibou nya kin ide limwa nya <<Midyai nikinding ngug tig dini bindei ba, igya ting leu yam. 20 Gino jimiap pun mbrei nisu bong lene ma jinduk yam kwei ndam da. Ide Allah mikon pran mem nye bit ide siceu nya.>> 21 Gima rino nikwas yam ba, bihi ikinding ngug tig lene bihi igya ser ide siceu nya bikrau micim ei indati bikwop njap ngwa hagom mem ha yausi kikau ug bipek mmun tirigi ham mpia-bbed him nya jimjit.
22 Dicuk mindor mem midyai dima kin ide limwa nya leu binhyepo ibong ser minu ndig Yerusalem kikau mem nijam di ikinding ngug tig leu binhyepo igya-ya nyen ser siceu nya mem mmun lene inda jo kep midyai mem njap. 23 Dani kin disut bat nya kin ditde awak nya kin tentara di igya kui da nahagom nijuk sinsun binibiyai midyai kikau mem njap cem mem mmun cem ba, niba minggwen nya bitindei ser siceu nya cem.