Ezra tin ei mem nggek tut niwak yam srig yamti nyen dima
10
1 Tirigi Ezra ba nipim bingat nadi bipai jit sisar ei TUHAN De Ig nuhui cem bisri lene limwa Israel nya imang bibor idem yam. Yo dima ne pinai nya kin sop nya kin munggwom nya cem. Nimpung dini yahagom ikwei ngwig ttai Ezra bipim nggruet bit noni cem. 2 Lene Sekhanya di Yehiel nipmot leu Elam ninsi de nya pai bak Ezra <<Nibon sisar tut TUHAN drek dip gi niwak sop ngkiai nya srig yamti. Mbro nok gima lo, no bon nituti mem Israel igyai nikos ser ide sisarti yo. 3 Jikwei ba, iba neheng bipreu ei mem Allah bipia mporo ikes sop dima yok yahagom bitut imunggwom bat nya cem ba, ingkwei hanyen ug ei itimieisi. Minibit ade nipingok nyeni ningonti nya kin limwa hiter di ibit Allah nicukti nya kin nipingok ningonti nya cem. 4 Suar ayai abou tut mun di buhun dini leu api nyeni nuusap na tut mun nyeng di ayai abou tut dima hagom. Suar ayai abou tut sindem kikau ug bipek ningwigsi kep hak ug!>>5 Leu api Ezra kinyon ei ninggek tut niwak sop sirig yamti bicuk nibou imam nya kin nibou Lewi nya kin nibou limwa Israel nindigsi nya yahagom leu binhyepo iba neheng bipai bipia yoni cem mibit Sekhanya nihyet nghwak him dima. 6 Tirigi iba neheng bipreu mun leu su lene Ezra kiju bimbut leu TUHAN De Ig nuhui ba, coi ug ei Yohanan di Elyasib nipmot de nghim nsi bibong ei sirima. Ezra bong ninghop-ngwak ei ninsi dima ba, giyem njita ba, gidut ndia ngei cem bi. Lewo kan-kan nyen tut yo po inok awak ei ingkiaisi lo, ingkwei hanyen kwei pima ibon munti dima. Lene gima biyai ningon di ngguk binoni ser njita di yem.
7 Leu api nibou nya itri tut nihyet di buhun bidem minu ndig Yerusalem kin minu Yudea nisurti-nipekti bak yo di ingkwei hanyen leu ingkiaisi pima yahagom leu binhyepo yahagom induk yam kwei ei minu ndig Yerusalem. 8 Tungwa tou rino kwei ei ninsi njap ningai bi lene nibou nya migyai nide ndigban ba, ima hak leu noni leu api iciu ser no dima ninyeng leu daptar di limwa mben Israel inyeng joti. Nibou nya iba inda ceti bipas ei srat di tibim tut nihyet di buhun dimati. 9 Tirigi tto bou ei njap ningai pima dem lene pinai di ibong bidem hanjop Yehuda kin Benyamin yahagom ikwei dem yam ei minu ndig Yerusalem ba, induk yam ei mpia di jo bas hak di iba ngug tig bikrop ttai ei TUHAN De Ig him. Idem yam ei njap gi nyatungwagom ei bed gi nimuhwindatai. Mpe dima lene biget cem but mbras bikui yahagomti leu api hou cut ba, idigok bibor. Idigit-digoi drek dip gi yuum yam ei di bon ninyeng mem yok cem.
10 Ezra kiju biya lene tri tut nihyet biyok bipai <<Jahagom jibon sisar ba, jibikum ei Israel de nitunggweisi bu tug hon gi jiwak sop ngkiai nya srig yamti tu. 11 Gima rino ma jipai jit jide sisar dima bak TUHAN Allah di idigup bat-idigai bat nya ikuk yok bak leu lene jibon mun di biyai TUHAN ningon di kei hanyen. Ma jimbres jenti ei minu ting leu ngkiai nya di ibong srig jikieti ei jitimieisi dini lene ma jikes jitnem bat ngkiai nya dima bingkwei hanyen leu jikieti ug ei itimieisi hak ug.>>
12 Lene yo dima yahagom ighyet kui yam bibuhup nok gom <<Minibit apingok nyeti dima.>> 13 Leu api isum ighyet eisi bu bipai <<Lo, yo di ingat rin ei mpia di jo bas hak di iba ngug tig bikrop ttai dini imang bibor ba, biget cem but mbras. Bit bon niya niyati kikau ei mpia dini kan bi. Nok gima cem munhyet dini ne munhyet di ikwam minggwen bit yam ser hak ei njap gom can kan bi. Lewo sisar dini srou nimang bibor tu. 14 Gino ace tut lene nibou nya ibong hak ei minu ndig Yerusalem bimbrap bit yam tut munhyet dini. Leu api suar bikwop tungwagom-gom leu nyende minu dino wak sop mben ngkiai ngkwei hanyen mem bitto bou di itto ei mem noni ba, nibou nya kin nikei nya miyehei sut noni kwei leu nitimieisi di bong ser hak ug. Tug hon nisinati dima lene Allah migga nyeni drek dip munhyet dima bu bi.>> 15 Lene hi di srep tut nipingok yokti dima bi. Noro mben Lewi ibou can rino isrep tut ba, inyeng rino Yonatan di nicig ninyeng Asael kin Yahzeya di nicig ninyeng Tikwa. Mben Lewi cin di yuusap cin pima tut ide nisrep tutti dima inyeng rino Mesulam kin Sabetai.
16 Yo di ingkwei hanyen leu ingkiaisi pima ikrau kep Ezra nihyet nghwak him dima. Gima rino imam Ezra dimig nibou ibou poi bibikwop leu nibou insi de nya ikieti ba, pas kep inyeng ei sratti. Ikinyon ei nidimig yokti dima ei njap gi nigom mem bed gi nisimnai leu binhyepo nibou nya ipigot bram munhyet dima. 17 Ei ninsi bed ningai gi nidipti bu ne ikes hon gi ipigot bram munhyet di srou pinai di iwak sop ngkiai nya pima ba, tug hon nikwesti tu.
Yo di iwak sop ngkiai nya pima inyenga
18-22 Gini ne daptar tut yo di iwak sop ngkiai nya pima inyeng ri. Yo dini rino ipreu sut gima ikou itnem bat ngkiai nya leu api indig domba nikre ningut gom ei nimbar hum dokti bak TUHAN mem ibon midut nibiyai nikos ser ide sisarti.
Ipas kep imam nya inyeng bit leu insi de nya ba, yo dima ne Maaseya kin Eliezer kin Yarib kin Gedalya di intun Yesua ninsi de nya him bitut nide adig-ajoi nya di Yozadak nipmot bat nya kin Hanani Zebaja nya di intun Imer ninsi de nya him kin Maaseya kin Elia kin Semaya kin Yehiel kin Uzia di intun Harim ninsi de nya him kin Elyoenai kin Maaseya kin Ismael kin Netaneel kin Yozabad kin Elasa di intun Pasyhur ninsi de nya him.
23 Lewi nya inyeng rino Yozabad kin Simei kin Kelaya (di ijem ninyeng hi Kelita) kin Petahya kin Yuda kin Eliezer.
24 Elyasib leu nimpung di ipai kep doia nya.
Yo di igya ser dimbou pmem ei TUHAN De Ig inyeng rino Salum kin Telem kin Uri.
25-43 Limwa Israel nindigsi nya inyeng rino Ramya kin Yezia kin Malkia kin Miyamin kin Eleazar kin Malkia kin Benaya di intun Paros ninsi de nya him kin Matanya kin Zakharia kin Yehiel kin Abdi kin Yeremot kin Elia di intun Elam ninsi de nya him kin Elyoenai kin Elyasib kin Matanya kin Yeremot kin Zabad kin Aziza di intun Zatu ninsi de nya him kin Yohanan kin Hananya kin Zabai kin Atlai di intun Bebai ninsi de nya him kin Mesulam kin Malukh kin Adaya kin Yasub kin Seal kin Yeramot di intun Bani ninsi de nya him kin Adna kin Kelal kin Benaya kin Maaseya kin Matanya kin Bezaleel kin Binui kin Manasye di intun Pahat-Moab ninsi de nya him kin Eliezer kin Yisia kin Malkia kin Semaya kin Simeon kin Benyamin kin Malukh kin Semarya di intun Harim ninsi de nya him kin Matnai kin Matata kin Zabad kin Elifelet kin Yeremai kin Manasye kin Simei di intun Hasum ninsi de nya him kin Maadai kin Amram kin Uel kin Benaya kin Bedeya kin Keluhu kin Wanya kin Meremot kin Elyasib kin Matanya kin Matnai kin Yaasai di intun Bani ninsi de nya him kin Simei kin Selemya kin Natan kin Adaya kin Makhnadbai kin Sasai kin Sarai kin Azareel kin Selemya kin Semarya kin Salum kin Amarya kin Yusuf di intun Binui ninsi de nya him kin Yeiel kin Matica kin Zabad kin Zebina kin Yadai kin Yoel kin Benaya di intun Nebo ninsi de nya him ri.
44 Pinai dini yok yahagom iwak sop ngkiai nya apino ikou itnem bat dima yok ba, ijji yok bingkwei hanyen ug ei itimieisi bitut imunggwom bat nya cem.