Ezra miap tut limwa Yahudi nya kin mben ngkiai di iwak yam srig yamti
9
1 Tirigi ibon mun nyeng dima yok hagom biput tu lene nibou mben Israel ibou poi ikwei pai bida bipia limwa Israel nya bitut imam nya kin Lewi nya igimbres yonti leu mben ngkiai di ibong ttai yok nya bi. Ngkiai dima yok ne mben Amon kin Moab kin Mesir kin Kanaan kin Het kin Feris kin Yebus kin Amori ri. Ningat ne imam kin Lewi nya igyai bram mun di kinei-kinau di ngkiai dima yok ibon kep nya. 2 Pinai Yahudi nya iwak sop mben ngkiai apino map kui TUHAN de limwa pijum nya tu. Yo di ibon mun dima nimbie him ngat hak rino nibou mben Israel kin yo di inyeng jei nya. 3 Tirigi dimiap ipaisi dima lene dingon kei sut gima bi bibor. Gima rino dirik sinsun di jo dingkekti bidibrim dibou nta kin duhui nta cem leu api digwam hak jug ba, dingon kinei-kinau kei. 4 Digwam nok gima kikau ug bipek mmunti mem jam di ibon midut nindig mindhe ei nimbar hum dokti bak TUHAN leu api tungwatu nya ikwei ya bingwig ttai da. Yo dini ne gi hi di ingon buhun drek dip mben Israel ide Allah nihyet di cuk Nide limwa Israel po ingkwei hanyen kwei leu ingkiaisi pima ri. Lewo Allah cuk yok bipia suar imbres yonti leu mben ngkiai di ibong ttai yok nya ide sisar di ibon nya.5 Tirigi ikinyon ei nibon midut nindig mindhe ei nimbar hum dokti bak TUHAN mem mmunti lene dikiju hak leu dingon ngguk eisi ba, dijuk sinsun di rik pima hanyen leu api diba dibiau bicom mpia ba, disu dinda kui gwamti bak ditde TUHAN Allah cem. 6 Lene dibipai bak Allah <<Ditde Allah e, dimmai sut gima dikon dibou kui ei Aho bei a. Nyende sisar jo-jo yam dip bijo anai nyeni nibousi kikau ug bingget mpia-bbed him. 7 Ade limwa di nyeni nibon sisar tut Nani habiei leu nijam di nidigup bat-nidigai bat nya igyaijo yo pima kikau kwei bipek ammani kep. Gima rino bindei di nibou ndig mben ngkiai ibindei timek nyeni kin nyende nibou ndig nya kin imam nya bitut nye dini yok cem ug a. Ba, igyai nimai binye cem ikri nye nok awak di ipian nye ug ei minu ngkiai ide cem ug a. Iba ighyet bicig nye bijo kikau noyam kin mun di nuum ei njap di ammani. 8 Noro nyende TUHAN Allah e, sindi asingat tut nye ba, akwek nyeni nibou poi leu gi yuubon nye nok awak pima leu api abindei ba, nibong kei nigwam kei ei mpia di apigig sut pijum ei dini ba, ayai niyaijo nijep binyeni cem. 9 Mbro nok gino mben ngkiai yuubon nye nok awak lo, agikes nyeni ei bi. Abindei ba, nibou ndig Persia nya ingondut nye apino isindui sut nye ba, niyaisi jo cem niwin Ade Ig di wer cou ngwam tu dini hanyen cem ug a. Lene anyohou nye ba, nibong kei nigwam kei ei hanjop Yehuda kin minu ndig Yerusalem cem hanyen tu.
10 Noro TUHAN Allah e, nogindini mun nyeng di kinei dima yok hagom cut igkep nye lene notou nibuhup hanyen biNa i? Nyeni nitunggwei sut acuk nyeti nya, 11 di ayai binye tug hon Ade awak di nabi ngot pima yok hanyen ba, itri tut binye bipia dihyei ninda rom dini ne dihyei di mpung tut sisar ri. Lewo timiei ngot di ibong ser minu dini nisurti-nipekti nya ibon mun di bindei ba, niyai ngkek tin kin mun di suwok bibor cem. 12 Nabi dima yok icuon ser nye leu binhyepo niyai ipmisop bat nya biwak yam srig yamti bibor ba, nimpu yok tut ide niyemti kin ide nimati dem kin ide nibong kei nigwam keisi au. Gino nibit ahyet dima lene miniyai nisindemti ba, miniyem ningat di ntun dihyei dini him ba, nibikes dihyei dini ei mem nyende nintun him yamti di bram yam nya binok ide dihyei ninda rom bijo ninno bijo kikau cem. 13 Mbro nok gino nibon sisar ba, nitunggwei sut Ade nicukti cem apino aba mun di buhun bihwen nyeni drek dip tu lo, nikan tut bipia mun di buhun di abihwen nye dima buhun bibor binjiriek leu mun di buhun di suar nuum rin bi. Noro no ateu nye ba, ningwes ngun tu. 14 Apino notou mem gima ninjiriek acuk nyeti bu ba, nisirig yo di ibon mun di kinei bibor dimati biniwak yam srig yamti bibor nok gima bu i? Gi nibon nok gima lene jo nibreisi bipia agga nyeni drek dip leu api acok tut nye krebou-krebai hak ug rin leu ba, agisindui sut tungwagom ngat ba, ningwes ngun cem bi. 15 TUHAN Allah Israel e, Nangkom angon sren-srau kei. Mbro nok gima lo, asindui sut ba, nyeni ningwes ngun yo. Dem tut gima nidideu Nani ba, niya ei Aho bei bi. Noro abon nituti mem nyeni tu leu api nipai jit nitunggweisi nya biNa.>>