Yoahas di nok Nibou Ndig mem timiei Yehuda nya
(2Raj. 23:30-35)
36
1 Timiei Yehuda nya ikon Yoahas ba, kui bigwam nok nibou ndig biya luei Yosia nohoti bu. 2 Tirigi Yoahas kui bigwam nok nibou ndig dima ne nide njap ug ei ari bingwam nyatungwagom ba, ningai ba, ninyeng tak kep timiei Yehuda nya mem bed nitindur ningai ei minu ndig Yerusalem. 3-4 Nekho di nibou ndig mben Mesir kat Yoahas. Noni cuk timiei Yehuda nya leu binhyepo iba perak di nibuhunti kilo sribu ningai sratus bitai kin mas kilo ningot ningai ba, bitai bigo belasten gau yonti kin ide minu bak noni. Leu api noni kon Elyakim di Yoahas nikinjoi kui bigwam nok nibou ndig mem timiei Yehuda nya biya luei Yoahas nohoti. Noni bises ninyeng Elyakim bijem ninyeng Yoyakim bu leu api kri Yoahas buug sut ug ei minu Mesir.Yoyakim di nok Nibou Ndig mem timiei Yehuda nya
(2Raj. 23:36--24:7)
5 Tirigi Yoyakim kui di gwam nok nibou ndig mem timiei Yehuda nya dima ne nide njap ug ei ari bingwam nyatungwagom ba, muhwi. Ninyeng tak kep timiei Yehuda nya ug ei ari bingwam simnaibrimiggom ei minu ndig Yerusalem. Noro bon sisar tut nide TUHAN Allah. 6 Tirigi Nebukadnezar di nok nibou ndig mem mben Babel coi biyai minu Yehuda biyati tu lene kat Yoyakim leu api ba lante biteu nimig-ninda bikri buug sut ei minu Babel. 7 Mpe dima lene Nebukadnezar ya kep ndigban di nibok kak ei TUHAN De Ig nya bicat nite hi bimbut tut krebou-krebai ba, ug kon hagom ei nide ig nibou ndig ei minu Babel.
8 Nipui sut Yoyakim nindigsi nya hagom bitut nibon munti di suwok nya kin nibon munti di kinei bibor nya hagom jo ei srat Nibohon Nibou Ndig Mben Israel kin Nibou Ndig Mben Yehuda Nyati. Nipmot Yoyakhin kui bigwam nok nibou ndig mem timiei Yehuda nya biya luei nohoti bu.
Yoyakhin di nok Nibou ndig mem timiei Yehuda nya
(2Raj. 24:8-17)
9 Tirigi Yoyakhin kui bigwam nok nibou ndig mem timiei Yehuda nya ne nide njap ug ei ari bingwam simnaimuhwidip brimigtehiningai. Ninyeng tak kep timiei Yehuda nya ug ei bed nitindur ningai ba, njap simnai ei minu ndig Yerusalem. Noni cem bon sisar tut TUHAN. 10 Ug cut ari bingwam nikwas yamti lene Nibou Ndig Nebukadnezar kri Yoyakhin ug ei minu Babel leu api noni sima ei sirima. Lene Nebukadnezar ya kep ndigban di nibok kak ei TUHAN De Ig nya hanyen bu bicat leu api mbut tut krebou-krebai. Leu api noni kon Zedekia di Yoyakhin nipmumq kui bigwam nok nibou ndig ba, ninyeng tak kep timiei Yehuda nya kin timiei minu ndig Yerusalem.
Zedekia di nok Nibou Ndig mem timiei Yehuda nya
(2Raj. 24:18-20; Yer. 52:1-3a)
11 Tirigi Zedekia kui bigwam nok nibou ndig mem timiei Yehuda nya dima ne nide njap ug ei ari bingwam nyatungwagom ba, gom. Ninyeng tak kep ug ei ari bingwam simnaibrimiggom ei minu ndig Yerusalem. 12 Noni cem bon sisar tut nide TUHAN Allah lene kou sut gi om nonti tirigi Nabi Yeremia tri tut TUHAN nisok kepti bak noni cem.
Minu ndig Yerusalem nicutti
(2Raj. 25:1-21; Yer. 52:3b-11)
13 Nibou Ndig Nebukadnezar bidip huk Zedekia leu binhyepo heng bitug hon Allah ninyeng bipia ningon gom tut Nebukadnezar. Noro niabiati bu lene Zedekia ham nimbuk kep Nebukadnezar hanyen. Zedekia ningkek ndok tut TUHAN Allah mben Israel ba, kou sut gima tin ser nide sisar bingkwei hanyen ndam TUHAN cem. 14 Mun di kinei hiter bu rino nibou nya di inok nibou mem timiei Yehuda nya kin imam nya kin limwa nya yahagom ibindei ba, map kui TUHAN De Ig di TUHAN Nonti dimig pijum ei mem Nonti. Yo dima icut ei nikuk yo bak kwar nyati ba, ibon mun bibit leu mben ngkiai di ibong ttai yok nya ibonti di kinei bibor nya cem. 15 Idigup bat-idigai bat nya ide TUHAN Allah pinak Nide nabi nya bingkwei-ngkwei nyen kep Nide limwa nya mem gima isok kep yok. Lewo TUHAN ningon ngakei yok bitut Nide Ig cem. 16 Noro iba tungwatu nya di TUHAN pinak yok kwei nya bikek ba, ipa tut Nide nabi nya bico kep nihyet cem. Apino bitig di TUHAN gga yok dino bitbon puig hi mem gima ingwes ngun leu hukum di Noni mikes ei yokti dima bi a.
17 Gima rino TUHAN pingok ei nibou ndig mben Babel ningonti leu binhyepo njei bihwen yok. Nibou ndig dima yai nimai bak limwa Yehuda nya di ipilei yo nya bitut yo di ingat rin ei TUHAN De Ig nya cem ba, gingondut tungwagom ngat cem bi. Noro yai nimai bak andigpoi nya kin pilei nya bitut pinai-sop nya kin yo di inggwen nya kin yo di inghuisi kwes nya yahagom hak ug. Allah kes yo dima yahagom ei nibou ndig mem mben Babel ninda nsi. 18 Nibou ndig mem mben Babel dima pos TUHAN De Ig nimbumbati kin ndigban di nibok kak nya kin nibou ndig de ndigban nya kin yo di igya kui nibou ndig nya ide ndigban ba, pian hagom buug sut ei minu Babel. 19 Noni ya kep ngug tig di bikrop ttai minu ndig Yerusalem binggek lene bindig minu ndig Yerusalem bitut TUHAN De Ig kin nibou ndig de ig nya bitut ndigban ngot di nibok kak di jo niti nya hagom cem ningwig a. 20 Noni kri limwa ngot di ingwes ngun nya yahagom ug ei minu Babel. Lene ibinok awak mem nibou ndig mben Babel kin yo di intun noni him nya ei minu Babel kikau ug bipek nijam di nibou ndig Persia ninyeng tak kepti kiju ba, sindem bibor. 21 Gima pek kep mun di TUHAN tri tut tug hon Yeremia bipia minu dini micut ei ningoi-ngati kikau mem nijam ari bingwam ningot muhwindacan ba, biluei Ari Bingwam Gi Nimuhwindacan Nikes Sidumti Pijum Hak Ei Mem TUHANtir po inyohou bi pima.
Kores cuk mben Yahudi bingkwei hanyen ug ei itimieisi
(Ezr. 1:1-4)
22 Ug ei ari bingwam nimbie him ngat di nibou ndig Kores kiju ba, ninyeng tak kep Persias leu api TUHAN bindei ba, nihyet po Noni sok ei Yeremia dip bak mben Yahudi pima pek mem yok tirigi ingat rin ei minu Babel. TUHAN pingok ei Kores ningonti leu binhyepo bindei hei nicukti gom ba, suar ikwop kep nicukti dima bidem nide ninyeng tak kepti nisurti-nipekti hagom. Nicukti dima nibimbiti pai,
23 <<Gini ne Kores di nibou ndig Persia nicukti ri! TUHAN Allah di ninyeng tak kep gwamti kon da bidigwam nok nibou ndig di ninyeng tak kep dihyeisi dini nisurti-nipekti hagom. Noni ndo da pijum ei leu binhyepo dingot ig gom mem Noni ei minu ndig Yerusalem ei minu Yehuda. Gima rino suar je di jinok Allah de limwa nya jahagom jingkwei ug ei jitimieisi hanyen! Handei kon ba, jide TUHAN Allah minyohou je.>>