Yosia bon midut kep Njap Ndig Paskah
(2Raj. 23:21-23)
35
1 Leu api Nibou Ndig Yosia bon midut kep Njap Ndig Paskah ei minu ndig Yerusalem leu binhyepo binggei sut TUHAN. Ibui domba mem midut dima ei njap gi nisimnaibrimigtai ba, bed gi nigom. 2 Yosia ndo igbit midyai di suar imam nya igyai kep nya ei TUHAN De Ig lene bipingok ingonti tut cem leu binhyepo igyai midyai dima nok gi igbit. 3 Noni cuk Lewi nya po idimig yok pijum ei mem TUHAN ba, inok guru mem mben Israel cem pima bipai biyok <<Ma jikon TUHAN De Brua Gi Preu di kwes pima ba, jikes ei TUHAN De Ig di Nibou Ndig Salomo po Daud nipmot ngot ei pima ninsi hak ug. Lene ma jikon-kon nyen Brua dima leu Ig dima bu au. Noro ma jinda jo kep midyai di jiyai mem jide TUHAN Allah kin Nide limwa mben Israel. 4 Jitin ei jenti ei TUHAN De Ig ba, jibibit leu jide nimpung nya dem igbit midyai di Nibou Ndig Daud kin nipmot di Nibou Ndig Salomo nya ikwas di ikos tut nipou ei mem je tu nya. 5 Jidimig jide nimpung dima yok ei bijibon nimpung bijiya jiyati leu binhyepo jibihi tin ei mem gima jimpu kep yo di Israel insi de nya gom-gom tirigi ikwei kuk yok ei TUHAN De Ig kikau. 6 Suar bikwop jahagom jikos domba kep nibon midut Njap Ndig Paskah. Tut gima lene jibindei pwoi jenti nipou ug e leu binhyepo jikuk je bak TUHAN. Jibitin ei mindhe-ndhe di jindig ei nimbar hum dokti mem gima jibikuk je bak TUHAN cem. Leu binhyepo tug hon nisinati dima lene limwa mben Israel nindigsi nya cem idem mem gima ibindei mbut TUHAN De nicuk nyeti di tug hon Musa.>>7 Nibou Ndig Yosia kwas nide mindhe-ndhe nimuhup tu nya tut yo di idem yam ei mem Njap Ndig Paskah leu binhyepo ibibon midut nindig mindhe-ndhe kep humti ba, ibikuk yok bak TUHAN. Noni kwas domba di mahan tu kin domba mien kin kambir nehen pap ba, nimangti ug ei ningut sribu ningot ningai bitut sapi nikre ningut sribu ningai tut yok. 8 Lene yo di igya kui Yosia ikwas ide mindhe-ndhe nimuhup tu nya tut limwa nya kin imam nya kin Lewi nya. Yo di igya kui nibou ndig ibou ningai di yahati tut midyai ei TUHAN De Ig inyeng rino Imam Nibou Ndig Hilkia kin Zakharia kin Yehiel. Yo dini ikwas domba pmot kin kambir nehen pap ningut sribu can sratus muhwindagom tut imam nya. Lene ikwas sapi nikre ningut sratus ningai tut yok mem gima ibindig kep hum bak TUHAN ei midutti dima. 9 Lene Konanya kin Semaya di inok nibou mem Lewi nya bitut Nataneel di nide adig-ajoi kin Hasabya kin Yeiel kin Yozabad ikwas domba pmot kin kambir nehen pap ningut sribu muhwi kin sapi nikre ningut sratus muhwi mem gima indig kep hum bak TUHAN ei midutti dima.
10 Tirigi itin ei mun nyeng hagom bidem mem nibon midut kep Njap Ndig Paskah tu lene imam nya kin Lewi nya ibon nipui bigya igyati bit leu nibou ndig nicuk yoti. 11 Ibui mindhe-ndhe kep nibon midut Njap Ndig Paskah. Lewi nya yeet mindhe ningkek leu lene imam nya iba mindhe ninggrom bigimahap nimbar hum dok nidip hu kwei. 12 Bikwop nimpung ig bei nsi di idem yam ei dima itug ndei mindhe ngot di mibui kep nibon midut nindig mindhe titut kep humti bak TUHAN dima ningut gom-gom bidem yok kei. Tug hon nisinati dima lene bon yoni yahagom ibon midut nindig mindhe titut kep humti ba, ibikuk yok bak TUHAN bit leu nikos tutti nya di tug hon Musa De Srat Nicukti Nya. 13 Lewi nya indip mindhe-ndhe di ibui ei Njap Ndig Paskahti dima yok ei humti bit leu nikos tutti di jo tu. Mindhe-ndhe di ibui pijum mem ibikuk yok bak TUHAN lene ikwen he ei yengkuong kin yeng dihyei kin yeng nituti. Mikwau dima mui su leu api ikwas haninyai tut tungwatu nya bigyem. 14 Gima leu api Lewi nya itin ei mikwau di mem yonti kin gi hi di mem imam di intun Harun him nya. Igyai nok gima lewo imam nya inda jo kep niyai midyai kikau ug bipek mmun kep. Midyai dima ne nibon midut nindig mindhe-ndhe titut kin nindig nimmau ndok leu mindhe-ndhe di ibui nya cem kep hum bak TUHAN ri. 15 Lewi nya ibou poi itin ei nibon midut kep Njap Ndig Paskah mem yo di ingon ki tut nikek musik di igya coi Asaf ninsi de nya di intun keret Lewi him di ingat rin ei mpia di igyai midyai dima eisi po Nibou Ndig Daud ndo ei mem yok tu pima. Yo dima inyeng Asaf kin Heman kin Nabi Yedutun di ya kui nibou ndig bitut yo di igya ngkiem ser dimbou pmem nya di igikes ide dikti ei bi ri. 16 Njap dima ne inda jo kep bidem mun nyeng di Nibou Ndig Yosia cuk yok tut nya hagom leu binhyepo iba mindhe-ndhe ngot di ibui di indig kep hum bak TUHAN bibon kep midut Njap Ndig Paskah dima. 17 Limwa mben Israel di idem yam ei dima yahagom ibon midut kep Njap Ndig Paskah kin Njap Ndig Roti Dwoi Bi kikau mem njap nitindur muhwindacan. 18 Njap Ndig Paskah di nok gima ne igibon hi bigyo habiei leu nijam Nabi Samuel kwei bipek njap dini kep. Nibou ndig gi nipou nya hi bon midut kep Njap Ndig Paskah noyam kin gi Nibou Ndig Yosia nonti kin imam nya kin Lewi nya kin timiei Yehuda nya kin mben Israel kin timiei minu ndig Yerusalem nya ibon dima bi sren. 19 Ba, midut di ibon dima pek kep mem yok ei ari bingwam gi nisimnaimuhwidip brimigtehiningai di Yosia ninyeng tak kep.
Yosia ninyeng tak kepti ningwig honti
(2Raj. 23:28-30)
20 Tirigi Nibou Ndig Yosia bon gima yok hagom mem TUHAN De Ig leu su lene Nibou Ndig Nekho ya tut nide tentara nya mem gima ikon pran bit nide siceu nya ei Karkemis di jo dideu Minyei Efrat. Lene Yosia njei siceu bipi bikon pran bit noni. 21 Noro Nekho sok nihyet kwei bak bipai <<Nikon pranti dini bitut na di anok nibou ndig mem timiei Yehuda nya bi! Dikwei mem gima dikon pran bit ditde siceu nya. Allah bidip huk da leu binhyepo dikon pran didiyam ba, Noni tti kin da. Gima rino ma abigen ser Allah ningon kanti dini au. Leu ma Allah bindei mai nani.>> 22 Noro Yosia tin ei bita nibou ei pran dimati bibit mun di Allah pai tug hon Nibou Ndig Nekho dima bi. Noni bungwam mem gima ya tut Nibou Ndig Nekho bikon pran hak ug. Yosia bon nonti nok tentara nitu nya ba, bungwam mem gima kon pran bit timiei Karkemis nya ei briep bou him Megido.
23 Noro tibor gom ndei Nibou Ndig Yosia ei pranti dima. Noni cuk awak nide nya leu binhyepo ikrau kroba pran bikiek tut noni bipri leu pran nicut eisi dima lewo nibok buhun. 24 Ikon noni leu nide kroba pran ba, ikes ei kroba pran hiter bibuwak noni hanyen ug ei minu ndig Yerusalem. Lene niyaijo ngwig hon bimai ei minu ndig Yerusalem ba, itig ei nibou ndig nya ijui dip. Lene timiei Yehuda nya kin timiei minu ndig Yerusalem nya yahagom ingon ngguk bram noni ei nimaisi dima.
25 Mpe dima lene Nabi Yeremia ba doia ningon ngguk tut gom bikiek Nibou Ndig Yosia ei nimaisi dima. Ba, pinai nya kin sop di ipai doia igkei nya ikrau kep doia dima mpe di ibon midut nibiyok ngon kep ningon di ngguk tut Nibou Ndig Yosia kikau kwei bipek ammani kep ba, ibindei coi doia dima ei nimpung srat doia nibwos-bwos nyenti. 26 Nipui mun tut Yosia nindigsi nya bitut ningon ngakei TUHANti kin nibit TUHAN Niggai Serti Nya cem 27 lene gi irop nipmem tut leu nimbie him kikau ug bipek ningwigsi kep ba, hagom jo ei srat Nibohon Nibou Ndig Mben Israel kin Nibou Ndig Mben Yehuda Nyati.