Hizkia nggek tut ig kwar nya lene bidimig puig Yehudi ningginausi di nijit
31
1 Tirigi ibon midut kep Njap Ndig Paskah ba, ikes inda tut leu su lene limwa nya intek bigya bikwop minu ndig ngot di jo bidem hanjop Yehuda hagom. Igya kep kwar nidihim ndig di itas pijum nya hagom bikki bindung-ndiem kei. Igya kep kwar ngot di ibon mem kwar Sop Asyera cem ba, ibindei tti ug ei dihyeiti. Igya kep nimbar hum dok nya kin mpia di ikuk yo bak kwar nya eisi cem bitimek hak ug. Igyai ibou tut gima ei mpia ttou nsi hiter ei minu Yehuda kin keret Benyamin kin Efraim kin Manasye nya ide hanjop nsi cem hagom. Gima leu api yahagom ingkwei hanyen ug ei ide minu ndig di ibong ser nya gom-gom.2 Nibou Ndig Hizkia bindei mbut nimpung imam nya kin nimpung Lewi nya hanyen bibit leu midyai di igyai nipou su pima. Midyai dima yok ne nibon midut nindig mindhe-ndhe kep humti kin nibon midut nibiyai ningon kwes kin Allahti rin ba, yahati tut midyai nikuk no bak TUHAN ei Nide Ig ba, iba doia bikon TUHAN ninyeng ba, ipai sigyo bak Noni cem ei mpia ttou nsi poi ei Nide Ig. 3 Nibou ndig njei mindhe-ndhe di isuar leu nide mindhe-ndhe nimuhup tu nya mikuisi mem nibon midut nindig mindhe-ndhe titut kep humti bikwop njap tekti kin mmunti cem lene mem mindhe-ndhe di indig kep hum bak TUHAN ei Njap Nigwam Kep Ninghuisi kin midut Bed Jep kin nibon midut nindigsi nya hagom bit leu nok TUHAN De niggai serti pai sut nya.
4 Ter leu gima lene nibou ndig cuk timiei minu ndig Yerusalem nya ba, ittei munkwas di ikos tut nya bak imam kin Lewi nya bigyai biyok leu binhyepo iba yoho rok midyai di igyai ei TUHAN De Ig bit leu nok TUHAN De niggai serti pai sut nya. 5 Tirigi itri nibou ndig nicukti dima tut yam lene mben Israel ittei ningat gi nimbie him di igyai leu ide miaisi binok ide munkwasl ba, yuug sut ug ei TUHAN De Ig. Ningat gi nimbie him di igyai leu miaisi dima rino tepun kin ba anggur ngei kin mini zaitun kin ahwei lon bitut ningat hiter di igyai leu miaisi nya cem. Lene ikus ide ndigbanm di jo bak yoni gom leu ningot gom lene nok bikwas tut Lewi nya nok mun di bimpu yok. 6 Yo di ibong bidem minu Yehuda yahagom ikwas ide mindhe-ndhe nimuhup tu di nok sapi nya kin domba nya ningut gom leu ningut simnai lene nok kin mun nindigsi nya mang bibor bu cem ba, ikwas hagom tut ide TUHAN Allah. 7 Ibindei ba, ndigban di ikwas bram yam dima hagom coi kikep ug ei TUHAN De Ig bijo kikau ei bed gi niningai kikau ug bipek bed gi nimuhwindacan. 8 Tirigi Nibou Ndig Hizkia kin yo di igya kui noni ingat ndigban nindig bibor di limwa nya ikwas dima bou igyai him tu lene inggei ngwig sut TUHAN ba, ibinggap leu TUHAN de limwa mben Israel tut ndigban nindig bibor di ikwas dima. 9 Nibou Ndig Hizkia mbrap bit imam nya kin Lewi nya tut ndigban ngot di limwa nya ikwas dima, 10 leu api Azarya di Imam Nibou Ndig di ntun Zadok him pai <<Leu nimbie him tirigi limwa nya ittei munkwas hagom kwei ei TUHAN De Ig dini lene njita kin mun nindigsi kum eisi ba, mang bibor. TUHAN njei mun di kei bak nide limwa nya lene gima bindei ba, nyeni nitug ndei njita niken binibet ei mem nyenti.>>
11 Gima rino nibou ndig cuk yok ba, itin ei ig gudan nya bijo ttai TUHAN De Ig, 12 leu api inju ndigban di limwa nya ikwas dima kin ndigban di ikwas gom leu ningot gom hagom ei ig gudan dima yokti ba, ibindo Konanya di ntun keret Lewi him ba, noni ya ser ndigban dima yok. Lene ibindo nikinjoi Simei ba, hati tut nikindigya. 13 Lene ibindo Lewi nya ibou simnai bu bigyai midyai ei Konanya Simei nya inda behei. Ibou simnai dima inyeng rino Yehiel kin Azazya kin Natan kin Asael kin Yerimot kin Yozabad kin Eliel kin Yismakhya kin Mahat kin Benanya. Ikrau kep mun dini yok hagom bit leu Nibou Ndig Hizkia kin Imam Nibou Ndig Azarya nya ide nikos tutti. 14 Ikon Kore di Yimna nipmot bindo midyai bak leu binhyepo su ninda mem munkwas di ibikuk yok bak TUHAN biyok hagom keyam. Leu api mikwas tut tungwatu nya bu. Kore ntun keret Lewi him ba, noni rinok nibou mem yo di igya ser Dimbou Pmem Nite Bei Mpia Nipriti. 15 Lene Lewi nya hi kin bu impu Kore tut nide midyai pima ei minu ndig di imam nya ibong ser nindigsi nya. Yo di impu Kore dima yok inyeng rino Eden kin Minyamin kin Yesua kin Semaya kin Amarya kin Sekhanya. Ikwas njita dima sur yam tut imam andigpoi ug bipek pilei nya di intun keret Lewi him bit leu ide midyai di igyai nya lene bit leu insi de nya bi. 16 Pinai di ide njap ug ei ari bingwam ningot ningain bikui di igyai midyai ei TUHAN De Ig bikwop njap-njap itug ndei njita bit leu ide midyai di igyai nya kin nimpung di igya coi nya. 17 Ipas kep imam nya inyeng ba, ibibit leu insi de di intun him nya. Lene ipas kep Lewi nya di ide njap ug ei ari bingwam nyatungwagom bikui keyam bit leu ide midyai di igyai nya kin ide nimpung di igya coi nya. 18 Ipas kep yo dini inyeng bitut imunggwom bat-itnem bat nya inyeng cem. Ipas kep nimpung di ibong bit yok ei ide ig gom-gom nindigsi nya dima inyeng cem. Lewo suar imam nya kin Lewi nya itin ei mem igyai kep ide midyai di igyai pijum nya mem TUHAN bikwop mmun-njap. 19 Indo imam nya ibou poi di ibong ei minu ndig di idimig ei mem yo di intun Harun him nya cem imam nya ibou poi di ibong ei ngoi dumti di jo ttai minu ndig dima yok ikieti cem. Leu binhyepo ikwas njita tut pinai nya di ingat rin ei imam ide ig yahagom cem ikwas hi tut bikwop tungwagom-gom di ninyeng tibim kin daptar Lewi nya.
20 Nibou Ndig Hizkia bindei mbut nikei nikos tutti di sren kei nya lene ba ningon di sren bibon mun ba, pwoi TUHAN Allah ningon cem bidem minu Yehuda nisurti-nipekti hagom. 21 Ningat di kei ntun him mun di Nibou Ndig Hizkia bon nya hagom. Lewo ba ningon di gom kin ningon di ngakei nide TUHAN Allah bibindei mbut midyai ei TUHAN De Ig bibit TUHAN niggai serti nya cem.