Nitin ei mem Njap Ndig Paskahti
30
1-5 Limwa nya ibon midut kep Njap Ndig Paskah ei tto bou di cut ei bed gi nigom bigyo. Lewo imam nya di ibindei pwoi yonti tu nya imangti poi mien bibor ba, limwa nya idem yam ei minu ndig Yerusalem bigyo. Gima rino Nibou Ndig Hizkia kin yo di igya kui noni kin timiei minu ndig Yerusalem yahagom igyok ingon gom tut gima ibon midut kep Njap Ndig Paskah ei bed gi nican. Ide nikos tutti dima bindei ba, ingon llei bibor leu api nibou ndig pinak srat bak limwa nya yahagom di ingat rin ei minu Israel kin minu Yehuda bitut keret Efraim Manasye nya cem. Hizkia jem mben Israel yahagom leu hanjop Dan ei nite bei mpia nijjai kikau ug bipek kin Bersyeba ei nite bei mpia nibiho kwei ba, idem yam ei TUHAN De Ig ei minu ndig Yerusalem leu binhyepo ibon midut kep Njap Ndig Paskah ba, ibou cut bak ide TUHAN Allah bit leu Musa niggai serti nya. Igibon midut hi nok gima kep Njap Ndig Paskah bi sren. 6 Ipinak tungwatu nya bigya bidem minu Yehuda kin minu Israel titut yam bit leu nibou ndig kin yo di igya kui noni icuk yokti leu binhyepo ittei srat di nibimbiti pai,<<Limwa Israel jen, jingwes ngun leu mben Asyur inda nsi tu. Gima rino nogindini ma jingkwei hanyen ndam Abraham kin Ishak kin Yakub ide TUHAN Allah di yoni ikuk yok bak. Ba, joom jenti bijinok awak mem Noni leu binhyepo Noni cem mikwei bimpu jeni hanyen. 7 Ma jinok jidigup bat-jidigai bat nya kin mben Israel nindigsi nya di iba ingon di gom bibit ide TUHAN Allah bi pima au. Jo nibreisi mem je tu bipia Noni kes hukum ei yok dip tu. 8 Ma jingkek ndok noyam kin yoni au. Noro ma jibit TUHAN nihyet. Ma jinduk yam kwei ei minu ndig Yerusalem ba, jicoi ug ei TUHAN De Ig di Noni dimig pijum ei mem Nonti bijo ninno bijo kikau. Ma jikwei ba, jikuk je bak Noni leu binhyepo ningon cut leu Nide nigga jeti. 9 Gino jingkwei hanyen bijinok awak mem Noni lene Noni mibindei ba, mben ngkiai po ikat jide adig-ajoi nya bikri yok ug ei isimati tu pima mingondut yok ba, mikes yok bingkwei hanyen kwei ei itimieisi yo. Jide TUHAN Allah ne Allah di ningon nggriu rin ba, ngondut tungwatu nya cem. Gino jingkwei ndam Noni lene Noni micigit jeni ndam Nonti hanyen.>>
10 Tirigi tungwatu di ipinak yok ug dima ittei srat pima ba, ijo leu minu ndig hi ug ei minu ndig hiter nya ei hanjop Efraim kin Manasye ba, kikau ug bipek kin nite bei mpia nijjai ei keret Zebulon ide hanjop nsi cem rino timiei minu ndig dima yok yahagom ipa tut yok ba, ighyet kinei sut yok. 11 Noro yo di intun keret Asyer kin Manasye kin Zebulon him pima bihi ijoi sut induk yam ug ei minu ndig Yerusalem. 12 Nok gima cem Allah pingok ei timiei Yehuda nya ingonti bibindei ba, yahagom ingon gom tut gi ibit Allah ningon kanti mungkun kei tug hon gi ibit nibou ndig kin yo di igya kui noni icuk yokti dima.
Nibon midut kep Njap Ndig Paskah
13 Ug ei bed gi nican lene limwa nya imang bibor idem yam ei minu ndig Yerusalem leu binhyepo ibon midut nibiyok ngon kep Njap Ndig Roti Dwoi Bi. 14 Ba, ipian nimbar hum dok ngot di ibui mindhe-ndhe bindig ei niti kin gi hi di indig biei nggrai di ui-gwang kei ei niti mem gima ibikuk yok bak kwar nya eisi hagom ug ei minu ndig Yerusalem bicom ei Mbang Briep Kidron. 15 Leu api ibui domba Njap Ndig Paskah mem njap gi nisimnaibrimigtai ei bed gi nican. Imam nya kin Lewi nya di map kui yok nya immai sut yonti bibor. Gima rino ibindei pwoi yonti leu binhyepo ibon midut nindig mindhe-ndhe ei nimbar hum dokti ei TUHAN De Ig. 16 Tungwagom-gom coi biya ei nide mpia di yai midyai kikep eisi ei TUHAN De Ig bit leu Musa De Srat Niggai Serti. Leu api Lewi nya igyai ninggrom leu mindhe-ndhe di ibui dima bikes hagom bak imam nya lene imam nya iba ninggrom dima biprok nimbar hum dok. 17 Yo di idem yam ei dima imang bibor ibindei pwoi yonti bigyo. Gima rino bit bon ibui domba Njap Ndig Paskah dima kan bi. Apino Lewi nya he ibui domba nya bindig ei nimbar hum dokti mem yok nok mun di limwa ibikuk yok bak TUHAN. 18 Ter bu leu yo dima lene keret Efraim kin Manasye kin Isakhar kin Zebulon nya imang bibor di ibindei pwoi yonti nipou leu api ikwei ei minu ndig Yerusalem bi cem yo rinaha. Gima rino ibon midut kep Njap Ndig Paskah dima noro ibit nisinati di dem mem Njap Ndig Paskah bi. Gima rino Nibou Ndig Hizkia ngat nadi tindei yok bipai, 19 <<TUHAN Allah di nidigup bat-nidigai bat nya ikuk yok bak e, mbro nok gino yo dini ibindei pwoi yonti bigyo lo, ma akos ser yo di iba ingon titut bikwei kuk yok biNa dini ide sisar bit leu Ade nisingat tut tungwatu nyati.>> 20 Lene TUHAN ce tut Hizkia de nadi. Noni kos ser yo dima ide sisar leu api kes hukum ei yok dip bi. 21 Yo di idem yam ei minu ndig Yerusalem iba ingon di nggei-hi-nggei bibon midut kep Njap Ndig Roti Dwoi Bi dima ei njap nitindur muhwindacan. Ba, Lewi nya kin imam nya iba doia bikon TUHAN Ninyeng bikwop njap ngwa nok gi mungkun kei. 22 Hizkia kon Lewi nya inyeng lewo ingon ki tut gi ibie tut yo di ikuk yok bak TUHAN.
Ibon midut gi nican
Tirigi igyem kep njita ei midutti dima ba, ibui mindhe-ndhe bindig ei nimbar hum dokti ba, ikuk yok bak TUHAN cem ibipai sigyo bak idigup bat-idigai bat nya ide TUHAN Allah cem ei njap muhwindacan, 23 lene yahagom ikos tut mem gima ibinut nibon midut kep Njap Ndig Paskah dima ei njap muhwindacan bu. Leu api iba ingon di nggei-hi-nggei bibon midut kep Njap Ndig Paskah hanyen bu. 24 Nibou Ndig Hizkia njei sapi nikre ningut sribu gom kin domba ningut sribu muhwindacan mikuisi bak yoni. Lene yo di igya kui noni injei sapi nikre ningut sribu gom kin domba ningut sribu simnai mikuisi bak yoni bu. Leu binhyepo limwa nya ibui nok mikwau bigyem. Lene imam nya imang bibor ibindei pwoi yonti. 25 Timiei Yehuda nya kin imam nya kin Lewi nya kin yo di ikwei leu nite bei mpia nijjai nya kin mben ngkiai di ibong timiei ei minu Israel kin Yehuda nya cem yahagom ingon nggei-hi-nggei. 26 Minu ndig Yerusalem mpung tut tungwatu nya di ingon llei bibor lewo habiei leu nijam Salomo di Daud nipmot ninyeng tak kep yo dima ne nibon midut hi nok gima pek kep mem yok bigyo. 27 Imam kin Lewi nya yahara bak TUHAN leu binhyepo Noni njei mun di kei bak limwa nya. Apino Allah di gwam anai ei gwamti miap ide nadi di ingat bibuhup mun nyeng di yahara Noni tut dima.