Abia kin Yerobeam ikon pran bit yam
(1Raj. 15:1-8)
13
1 Nibou Ndig Yerobeam ninyeng tak kep mben Israel ug ei ari bingwam gi nisimnaimuhwidip brimigtehiningai lene Abia kui bigwam nok nibou ndig mem timiei Yehuda nya. 2 Ninyeng tak kep mem nijam ari bingwam ningai ei minu ndig Yerusalem. Nipmem rino Mikhaya di Uriel leu minu ndig Gibea nipmisop.Mpe dima lene Abia kin Yerobeam sindi ikon pran bit yam. 3 Abia njei sut nide tentara nya ibou sribu sratus bitai lene Yerobeam njei sut nide tentara nya ibou sribu sratus muhwindaningai.
4 Nimpung tentara cin dima sindi ikon pran bit yam ba, irok kik yam hak ei nungug him Efraim. Mpe dima lene Abia kui ug ei Nungug Zemaraim leu api jem bak Yerobeam kin mben Israel bipai <<Jimiap e, 5 jikan tut bipia TUHAN Allah mem mben Israel ngot kep Nide gi preu bit Daud ba, Daud kin nide nintun him yamti di bram yam nya mporo inyeng mitak kep mben Israel bijo ninno bijo kikau o! Gi preu dima ne TUHAN tiba kan bi sren o! 6 Mbro nok gima lo, Yerobeam di Nebat nipmot dima ham nimbuk kep nide nibou ndig Salomo o! 7 Lene noni mbus yo di ingon bum nimpung gom ba, ibidip huk Rehabeam di Salomo nipmot leu binhyepo noni miyai igbit yonti ingon kanti lo, mpe dima lene Rehabeam ne pilei ngat di ningon bou yo rin ba, um mun di nok gima hi bigyo apino srep tut bi ug o! 8 Nogindini jikan bipia jisindem mem gima jico kep nisindemti di TUHAN kwas tut yo di intun Daud him. Lewo jide tentara nya imang bibor ikwei sut sapi mas di Yerobeam bon bou ninda him nok jide kwar nya cem tu. 9 Apo jijji TUHAN de imam nya di intun Harun him kin Lewi nya him yahagom bi e? Leu api bikwop tungwa tou rino joi sut yai ninyeng imam lene suar jem sapi ningut gom kwei e, he domba ningut muhwindacan kwei e, lene jikon no dima binok imam mem gi Allah bi dima biya luei TUHAN de imam nya kin Lewi nya yohoti. Lewo jo nibreisi bipia mben ngkiai cem ikon ide imam nya tug hon nisinati dima. Noro nyeni niyai bram mben ngkiai igyaisi dima bi sren o!
10 Nyeni noom nyenti ba, nibou cut bak nyende TUHAN Allah kikau ba, nigiba ninghim bak Noni bi. Nikrau kep nyende imam di intun Harun him kin Lewi nya di yahati tut yok nok gima cem kikau o! 11 Lene imam dima yok indig biei nggrai di ui-gwang kei ba, ibon midut nindig mindhe titut kep humti cem bibikuk yok bak TUHAN ba, idis roti nitin eii ei TUHAN Noho bei bikwop njap tekti kin mmunti. Lene itin mini njeng nya ba, ikes ei nidihim dip bikwop mmun cem. Nyeni nikrau kep TUHAN nicuk nyeti nya kikau yo. Noro jeni ne jiba jinghim bak Noni tu o! 12 Allah Nonti nok nyende nibou di bie tut nyeni lene Nide imam nya cem ingat rin bit nyeni. Yoni itin ei mem gima imiep pun mbrei nya nok bindo mem gima ninjei ba, nikon pran bit je. Mben Israel jen o! Ma jaham jimbuk kep jidigup bat-jidigai bat nya ide TUHAN Allah au o! Lewo bit bon jibindei timek nye kan bi sren o!>>
13 Tirigi Abia jem biyok bisri lo, Yerobeam kes nide tentara nya nite hi biyuug kos dik ser siceu di timiei Yehuda nya inghim dip dinu kwei su. Lene nindigsi iba yoho rok timiei Yehuda nya bei yoho bei dini ug. 14 Tirigi tentara timiei Yehuda nya ingat lo, siceu nya igyon ttai yok lene yahara TUHAN bimpu yok. Lene imam nya imiep pun mbrei nya. 15 Leu api tentara timiei Yehuda nya ikon ighyet tut pran bikiju igkep Yerobeam nya bikon pran bit yok. Abia nonti njei sut yok ba, ikon pran bit keret mben Israel. Ikon kep ighyet tut pran leu api Allah bindei timek Yerobeam kin tentara Israel. 16 Apino yahagom itti kep inghim dip binang leu timiei Yehuda nya ide tentara nya yoho bei lewo Allah bindei ba, tentara timiei Yehuda nya ico kep yok. 17 Abia ya tut nide tentara nya ba, ibindei timek mben Israel bibor hak ba, Yerobeam de tentara di ikon kep pran igkei nya ibou sribu sratus muhwi ikrop bingwig ei pran dimati. 18 Tentara timiei Yehuda nya ibindei timek yok lewo iba ingon com idigup bat-idigai bat nya ide TUHAN Allah.
19 Nibou Ndig Abia nya igyon igkep Yerobeam de tentara nya ba, ihwen yok leu lene yai minu ndig gom-gom bitut minu mien di jo ttai nya cem biyati. Minu ndig dima rino Betel kin Yesana kin Efron. 20 Mem nijam di Abia ninyeng tak kep dima lene Yerobeam yai nisindemti mem gima ninyeng tak kep bu bi. Leu api TUHAN yai nimai bak bihigom.
21 Noro Abia de nisindemti kum eisi kikau. Noni wak nitnem bat nya ibou simnaibrimigtai lene yai nipmot bat nya ibou nyatungwagom ba, can kin nipmisop bat nya ibou simnaimuhwidip brimigtehigom. 22 Nipui sut Abia niyai munti nindigsi nya bitut nihyet kin nibon munti nya cem hagom jo ei srat Nibohon Nabi Idoti.