Mben Mesir icoi bihwen timiei Yehuda nya
(1Raj. 14:25-28)
12
1 Tirigi Rehabeam kui bigwam nok nibou ndig ba, sindem tu lene noni kin nide limwa nya yahagom iba igyai ngat TUHAN nicukti nya lene, 2 ingon gom tut Noni bu bi. Gima rino TUHAN kes hukum ei yok dip. Tirigi Rehabeam ninyeng tak kep ug ei ari bingwam gi nimuhwi lene Sisak di nibou ndig mben Mesir njei nide siceu nya ba, ikwei hwen timiei Yerusalem nya. 3 Nisindemti di ya dip di bihwen timiei Yerusalem rino kroba pran ningat sribu gom sratus can kin tentara di ibri kep kuda kan nya ibou sribu ningot muhwindagom kin tentara Libia kin Suki kin Sudan yahagom imang bibor di bit bon hi kwop imangti kan bi. 4 Noni coi bihwen minu ndig di sindem bibor ei minu Yehuda leu lene yai biyati sindam kikau ba, kwei ya hon minu ndig Yerusalem.5 Mpe dima lene Nibou Ndig Rehabeam kin nibou timiei Yehuda nya imang bibor di idem yam ei minu ndig Yerusalem lewo yahagom ikuk yam binang leu Sisak. Lene Nabi Semaya kwei ngat yok bipai biyok <<TUHAN pai bije <Jiba jinghim bak Dani gima rino Dani cem diba dinghim bak jeni. Bitig dino Sisak co kep jeni ug a.> >>
6 Lene Nibou Ndig kin nibou di igya kui noni ipai jit ei nibreisi bipia ibon sisar tu. Ibuhup <<Mun di TUHAN bon dima ne gi igbit hak ri.>>
7 Tirigi TUHAN ngat lo, yoom yonti ba, ipai jit ide sisar lene pai hanyen bak Semaya <<Ipai jit ide sisar tu. Gima rino midibindei sar yok bi. Noro miditeu yok bingwes ngun leu siceu inda nsi. Lene timiei Yerusalem cem mitimek bi. Mbro nok gima lo, 8 Sisak mico kep yok lene yahagom mikan tut bipia gi yoom yonti nok awak mem Dani ter leu gi yoom yonti nok awak mem nibou ndig dihyeisi dini di inyeng tak kep yok.>>
9 Apino Nibou Ndig Sisak kwei di hwen minu ndig Yerusalem leu dino cat ndigban di bon ninyeng di nibok kak nya ei TUHAN De Ig kin gi jo ei nibou ndig de ig cem hagom ba, bipos mun di ibipukep siceu de minggwen nya di Nibou Ndig Salomo bon nya cem ba, mbut tut sin yoti.
10 Leu api Rehabeam ba ngkimom-tembaga bibon mun di ibipukep siceu ide minggwen nya nijep bu bijo luei niceti hanyen. Lene kes hagom bak nibou tentara nya di igya ser dimbou pmem nya ei nibou ndig de igya. 11 Bikwop mpe di nibou ndig ug ei TUHAN De Ig lene yo di igya-ya nyen kep nya ittei mun di ibipukep siceu ide minggwen nya ba, ibicuon ser nibou ndig niyaisi. Leu api ingkwei mun dima yok bijo nijoti ei tentara nibousi di igya coi hanyen. 12 Nibou ndig om nonti ei TUHAN Noho bei hanyen ba, nide limwa ei minu Yehuda igyai munti nya singat kei cem apino TUHAN nigga Rehabeamti cut hon leu di bindei sar noni bi sren ug a.h
Nirop nipmem tut Rehabeam ninyeng tak kepti
13 Rehabeam ninyeng tak kep timiei Yerusalem ba, nisindemti cem bikum eisi binindig bibor. Nide njap ug ei ari bingwam ningot bitai ba, gom rino kui di bigwam nok nibou ndig a. Ninyeng tak kep ei minu ndig Yerusalem kikau mem nijam ari bingwam simnaimuhwidip brimigtehican. Minu ndig Yerusalem ne minu ndig di TUHAN dimig leu mben Israel de hanjop nsi nya hagom ei binok gumihyep nikuk no bak Allah eisi ri. Rehabeam nipmem rino Naama sop mben Amon. 14 Rehabeam bon sisar di kinei bibor lewo ningon hou ser gima kan igbit tut TUHAN ningon kanti.
15 Nipui sut Rehabeam niyai munti nya leu nimbie him ug bipek niyaijo ningwig honti kin nintun himti nya hagom jo ei srat Nibohon Nabi Semaya kin srat Nibohon Nabi Idoti. Rehabeam kin Yerobeam ikon pran bit yam kikau. 16 Rehabeam de njap ngwig hon lene itig ei nibou ndig nya ijui dip ei Daud De Minu Ndig lene nipmot Abia kui bigwam nok nibou ndig biya luei nohoti bu.