Keret mben Israel di ibong ei nite bei mpia nijjai ikiek imig jou tut Rehabeam
(1Raj. 12:1-20)
10
1 Mpe dima lene Rehabeam jo leu minu ndig Yerusalem buug ei Sikhem. Ug ei sirima lewo limwa mben Israel di ibong ei nite bei mpia nijjai yahagom induk yam ei Sikhem leu binhyepo ita noni nok nibou ndig. 2 Tirigi Nebat nipmot di Yerobeam po nang leu Nibou Ndig Salomo buug ei minu Mesir pima miap tut Rehabeam ninghapti tu lene ngkwei hanyen kwei ei minu Israel. 3 Gima rino keret di ibong ei nite bei mpia nijjai yahagom ihig Yerobeam bikwei ngat yok. Leu api noni ya tut yok tirigi yahagom yuug ngat Rehabeam. Lene ipai bak Rehabeam, 4 <<Na Di Andigpoi e, acig Salomo kes mun di buhun ei nyeni ninghat dip nipou su. Gino Na Di Andigpoi abindei ba, mun di noni kes ei nyeni ninghat dip dima wer nggan bibindei ba, nyeni ninghuisi wei bu bi lene ningon gom tut Na Di Andigpoi.>>5 Lene Rehabeam buhup <<Ma dikan-kan nyen tut jihyet nghwak him dima nipou ug e. Njap ningai ser ug api jikwei hanyen bidibuhup jihyet.>> Lene yo dima ikes noni ei bimbut.
6 Lene Rehabeam ug mbrap bit andigpoi nya po ipingok kep nicig Salomo ningonti pima leu binhyepo ipingok ningonti bihig ser yok <<Notou dibuhup yo dima ighyet i? Notou jipingok dingonti tut i?>>
7 Lene ibuhup <<Gino Na Di Andigpoi ajoi sut abon mun di kei bak limwa nya ba, abipwoi ingon lene ma aba ahyet di kei boom ingona. Gino ayai nok gima tut yok lene yoni miyoom yonti ba, inok awak di ingon gom tut Na Di Andigpoi bijo ninno bijo kikau cem.>>
8 Noro Rehabeam miap kep ide nipingok noti bi ba, ug ngat nisut pinai pilei di igya kui noni nya leu binhyepo ipingok ningonti tut. 9 Bihig ser yok <<Notou dibuhup yo di ijoi sut dibindei ba, mun di dicig kes ei inghat dip dima wer nggan bu dima ighyet i?>>
10 Lene ibuhup <<Suar Na Di Andigpoi abuhup biyok <Mbro nok gino dinghuisi mbriong lo, dinghuisi no sindem dor njiriek dicig yo!g 11 Dicig kes mun di buhun ei jinghat dip noro midikum ei mun di buhun bibor dimati bu. Dicig ba biap tindak bimbas jeni noro dani midiba biap tindak di kawa nggwen joti bimbas jeni bu.> >>
12 Njap ningai ser lene Yerobeam ya tut yo dima yahagom ba, induk yam hanyen kwei bikwei ngat Rehabeam bit leu nicuk yokti pima. 13 Noni tunggwei ndigpoi nya ipingok noti pima lene ba nihyet singga bibuhup nide limwa di ikwei ngat dima ighyet, 14 bipai biyok bit leu pinai pilei ipingok noti pima <<Dicig kes mun di buhun ei jinghat dip noro midikum ei mun di buhun dimati bu ug ri. Dicig ba biap tindak bimbas jeni noro midiba biap tindak di kawa nggwen joti bimbas jeni bu.>> 15 Miap kep nide limwa nya ighyet bi. Ningat ne gima bit leu TUHAN Allah ningon kanti mem yoni. Leu binhyepo nihyet di TUHAN sok ei Nabi Ahia leu Silo dip tut Yerobeam di Nebat nipmot pima hagom midem igbit.
16 Tirigi keret mben Israel ikan tut bipia noni buhup ighyet bit leu ingon kanti bi lene iba ighyet nindig bibor bahara <<Nikou sut Daud kin yo di intun noni him! Yoni ingondut nye nipou kikau kwei bipek ammani kep bi sren! Je di limwa mben Israel e, jikwei ba, imbut ri! Ma Rehabeam nyohou dimig ningon kanti nya mem nonti!>>
Lene keret mben Israel ingkwei hanyen ug ei ide ig. 17 Ba, Rehabeam kui bigwam nok nibou ndig ba, ninyeng tak kep nide limwa di ibong ei minu Yehuda he.
18 Mbro nok gima lo, Nibou Ndig Rehabeam cuk Adoniram di nide nibou di ninyeng tak kep yo di igyai kep midyai nibidip hukti buug ngat Yerobeam de limwa nya leu binhyepo bakei yo pimati noro iba tig bihwen noni bimai hak ug. Lene Rehabeam bipbur ba, kui nide kroba pran bingkwei hanyen ug ei minu ndig Yerusalem biningwes ngun. 19 Hon kep njap dima kui lene keret di ibong ei nite bei mpia nijjai yahagom ikiek imig jou tut nibou ndig nya di intun Daud him kikau.