Nibou Ndig Sop mben Syeba kwei cem kep Salomo
(1Raj. 10:1-13)
9
1 Nibou Ndig Sop mben Syeba miap tut Salomo ninyeng jeisi. Apino jo leu nide minu kwei ei minu ndig Yerusalem. Tirigi kwei krau minu ndig Yerusalem tu lene tin ei ningonti mem gima bingon Salomo tug hon gi hig ser noni tut mun di nggruk bibor nya. Noni kwei sut nide awak di igya kui noni di injei bit nya nipmem ngat binju biei ngat di ui-gwang kei nya kin tig permata kin mas mang bibor bikon ei unta di ijem nya dip bimpung kei. Tirigi Nibou Ndig Sop dima kwei um Salomo lene hig ser noni tut mun nyeng mang bibor pima hagom. 2 Noro Salomo buhup igbit tut mun nyeng di hig ser tut nya hagom binoni lewo mun nyeng di hig ser noni tut dima hi di nggruk bibor mem noni bi sren. 3 Nibou Ndig Sop dima ngat Salomo ningon kiti dima kin nide ig nibou ndig di ngot, 4 kin nide awak igyai midyaisi nya kin sinsun nimig-ninda di ijuk kin ig di ide nya cem bou niyai him. Lene bingat njita di iket di inyohou dimig ei meja dip kin sinsun di nide awak nya ijuk di ibitin ei njita ei pestati cem. Lene bingat mindhe-ndhe di Salomo bui bindig kep hum ei nimbar hum dokti ei TUHAN De Ig mem gima bikuk no bak TUHAN cem. Mun nyeng di Nibou Ndig Sop leu minu Syeba ngat bou niyai him dima yok hagom bindei ba, noni nggap leu nindig bibor ba, ningon mbris tut cem.5 Gima rino noni pai bak Nibou Ndig Salomo <<Ningat ne anghapti di tibim tut mun dini yok ei ditingou nsi tirigi dingat rin ei ditimieisi bitut Na Di Anyeng Jei kin angon kiti hagom dem igbit ri! 6 Nipou yo lene diba dingon com ipaisi dima bi bibou dikwei ngat hagom bou diyai him bidimiap ei ditingou nsi cem ug api diba dingon com. Ningat ne mun nyeng di dingat bou diyai him nogindini dor tunggwei gi dimiap tut he leu yo di hiter pima. Jo nibreisi bipia Na Di Andigpoi angon kiti kin gi anyeng tut ndigban biborti dor tunggwei mun nyeng di ipai sut bida pima bu. 7 Mbenjen! Ade awak di igyai midyai mem na nya ne ingon nggei-hi-nggei lewo igya kui Na Di Andigpoi kikau ba, imiap kep ahyet di tibim kwei leu angon di ki! 8 Jikwei ba, inggei sut TUHAN di nok Na Di Andigpoi ade Allah! Noni ta Na Di Andigpoi ba, anok nibou ndig leu binhyepo aba Nonti ninyeng bitak kep mben Israel lewo Noni joi sut Na Di Andigpoi nindig bibor. Noni ta Na Di Andigpoi ba, anyeng tak kep yok lewo ningon ngakei Nide limwa mben Israel ba, joi sut gima nyohou yok kikau. Apino kon Na Di Andigpoi ba, anok ide nibou ndig leu binhyepo yahagom ibit nihyet ba, ingon sren.>>
9 Leu api Nibou Ndig Sop mben Syeba njei ndigban ngot di kei di ttei kwei nya hagom bak Salomo. Ndigban ngot di njei bak Salomo dima ne mas kilo sribu bitai binjiriek kin tig permata kin biei ngat di ui-gwang kei nindig bibor cem. Hon kep njap dima ne hi yai biei ngat di ui-gwang kei bibor bak Salomo noyam kin gi hi di Nibou Ndig Sop mben Syeba yai binoni dima bi sren.
( 10 Ei nijam dima ne Nibou Ndig Hiram de timiei kibar dip nya kin Nibou Ndig Salomo de timiei kibar dip nya ipwoi mas leu Ofir kwei mem Salomo. Lene ibipwoi tig permata kin biei cendana cem bak noni. 11 Salomo ba biei cendana dima bittei lin kui TUHAN De Ig cem bittei lin kui nide ig nibou ndig cem. Lene iba biei dima bibon nggong nya kin nggong mbrei nya mem yo di ipai kep doia nya. Hon kep njap dima kui lene hi gingat biei di nok gima bou niyai him bu bi sren.)
12 Lene Nibou Ndig Salomo njei mun nyeng hagom bak Nibou Ndig Sop mben Syeba bit leu sop dima nijoi sutti bikum ei ndigban di Salomo tin ei mem gima yai binoni bit leu niyai kepti. Leu api Nibou Ndig Sop dima njei sut yo di igya kui noni yahagom bingkwei hanyen ug ei nitimieisi.
Ndigban di Nibou Ndig Salomo nyeng tut nya
(1Raj. 10:14-25)
13 Nibou Ndig Salomo tug ndei mas di nibuhunti kilo sribu nyatungwagom ningai bikwop ari bingwam. 14 Lene gima ter leu belasten di brim leu nitri-nipek mun cig nindig nya kin nitri-nipek mun cig nimien nya. Nibou ndig Arab nya kin nibou hanjop keret mben Israel nya cem ikwas mas kin perak tut noni. 15 Salomo ba mas di nibuhunti kilo muhwindacan bibon bikwop mun di ibipukep siceu ide minggwen nya ningat sratus can gi wer nindig. 16 Lene noni ba mas di nibuhunti kilo ningai bibon bikwop mun di ibipukep siceu ide minggwen nya ningat sratus ningai gi wer nimien. Noni ba mas nitug he bibon gima yok hagom. Lene noni kes mun di ibipukep minggwen nya dima yok hagom ei Ninsi Baham Libanon.f
17 Nibou ndig bindei ba, tukan nya iba gaja nikwai di jei bibor bibon banggo mbrei ninyeng tak kep di nindig bibor gom mem noni leu api iba mas di pimbai kei bimau. 18 Banggo mbrei dima bon mun di bahati tut nibou ndig ninda pang ei nite hi nite hi ba, yeheu singa ningat can di joti. Banggo mbrei dima bon nicoti muhwindagom di iba mas bikingkrai. Lene ibon bilen gom mem nimig di iba mas bikingkrai ba, bilen dima ibinut banggo mbrei binok gom. 19 Lene yeheu singa ningat bibikwop lin mbrei dima niyenti nya sur nico kepti muhwindagom ba, bihi ei ninda com bihi ei ninda prak ba, singa nimangti ningat simnaibrimigcan. Banggo mbrei di noyam kin Salomo de dima hi jo ei nibou ndig ninyeng tak kepti hiter nya bi sren.
20 Iba mas bibon Salomo de mok di dut minyei eisi nya hagom. Lene iba mas di pimbai kei bibon hot nya kin hot nggram nya hagom ei Ninsi Baham Libanon. Iba perak bibon mun nyeng hi bi lewo ei nijam Salomo dima ne perak nibok cut bibor. 21 Salomo nyeng tut kibar minyei di nindig krop mang-mang di ug kwei nyen ei muk ngwa dip bit Nibou Ndig Hiram de kibar minyei nya. Kibar minyei dima yok imbut-mbut nyen mem ari bingwam nitindur ningai leu api ingkwei hanyen tut mas kin perak kin gaja nikwai di jei bibor nya kin dion kin hanggei nya.
22 Nibou Ndig Salomo nyeng tut ndigban nindig bibor cem ningon ki bibor dor njiriek nibou ndig nindigsi nya ei dihyeisi dini hagom. 23 Nibou ndig nya yahagom yuug ngat noni bibrim ingkek kep leu binhyepo noni bon nituti mem ingig itingou mem nipingok yokti tug hon ningon di ki bibor di Allah yai binoni. 24 Bikwop nibou ndig di ikwei nya lene ikwei sut ndigban di kei nya ba, injei bak Salomo. Ba, injei perak kin mas kin sinsun kin minggwen kin biei ngat di ui-gwang kei kin kuda kin mindhe bagal hagom nok gima bak bikwop ari bingwam.
25 Nibou Ndig Salomo de ig kandan nsi di mem nide kuda kin kroba pran nimangti ug ei sribu bitai ba, noni nyeng tut kuda pran ningut sribu simnaibrimigcan. Noni kes kuda dima nite hi ei minu ndig Yerusalem lene pinak nindigsi nya bidem minu ndig di bon nibousi mem nide kroba pran nindigsi nya. 26 Ninyeng tak kep nibou ndig nya ei minu di ninyeng tak kepti nisurti-nipekti leu Minyei Efrat kikau ug bipek kin minu Filistin ide kikau ug ei minu Mesir niya kwas yamti cem. 27 Ei nijam di Salomo ninyeng tak kep dima lene perak jo sinsiou ei minu ndig Yerusalem ba, noyam kin tig ei dihyei ninjek dip cem. Lene buom Libanon hei bidimbun kei dem kep nok biei ara nitu cem. 28 Salomo pek kuda kwei leu minu Mesir cem leu minu nindigsi nya hagom cem bibindei coi hagom ei ninyeng tak kepti.
Nirop nipmem tut Salomo ninyeng tak kepti
(1Raj. 11:41-43)
29 Mun di ipui sut Salomo leu nimbie him kikau ug bipek ningwigsi hagom jo ei srat Nabi Natan Niyai Munti Nya kin srat Nabi Ahia Leu Silo kin srat Nabi Ido Ningat-Hi-Ngatti tu. Ba, srat Nabi Ido dima pai sut Yerobeam di nibou ndig mben Israel cem. 30 Salomo ninyeng tak kep mben Israel titut yam mem nijam ari bingwam ningot bitai ei minu ndig Yerusalem. 31 Leu api mai ba, itig ei Daud De Minu Ndig leu api nipmot Rehabeam kui bigwam nok nibou ndig biya luei nohoti bu.