Daud bindei timek nide siceu nya
(2Sam. 8:1-18)
18
1 Nituti poi bu ne Nibou Ndig Daud kon pran bit mben Filistin ba, bindei timek yok. Lene biyai minu ndig Gad tut minu mien di jo ttai nya biyati. 2 Daud bindei timek mben Moab cem apino inok nide limwa nya lene ibigo belasten bak noni cem.3 Niabiati bu ne Daud bindei timek nibou ndig Zoba di Hadadezer dideu hanjop Hamat ei minu Siria. Mpe dima lene Hadadezer njei siceu bipi bipos hanjop di jo dideu Minyei Efrat nibrig ba, ninyeng tak kep. 4 Noro Daud pos Hadadezer de kroba pran ningat sribu gom. Lene kat tentara di ibri kuda igkei nya ibou sribu muhwindacan kin tentara nindigsi ibou sribu ningot can bibindei ba, isima. Noni bet kuda nimangti nok gi dem mem gima ikri kroba pran sratus gom noro kos kuda nindigsi imig nggiluk leu.
5 Tirigi mben Siria ei minu ndig Damsyik ipinak tentara mem gima impu Nibou Ndig Hadadezer lene Daud hwen yoni bicut ba, nimbiam di hwen yok nya ibou sribu nyatungwagom can. 6 Leu api Daud kes nide tentara nya ba, yohok ide prak meng yati mem gima igya ser minu di ninyeng tak kep dima. Yo dima yahagom inok Daud de limwa nya bu ba, igo belasten cem bak noni. TUHAN bindei ba, Daud bindei timek nide siceu nya bidem nikon pranti nya hagom bingwig. 7 Lene Daud pos mun di tentara nya ibipukep minggwen nya di iba mas bibon di Hadadezer de tentara nya ikrau ser yok nya leu api ttei hagom buug sut ei minu ndig Yerusalem. 8 Ter leu gima lene Daud pos ngkimom-tembaga mang bibor leu minu ndig Tibhat kin Kum di Hadadezer ninyeng tak kep cem. (Nijam gi niabiati lene Salomo ba ngkimom-tembaga dima bibon tong ngkimom-tembaga di nindig bibor kin dihim cou nya kin nimbumbati di imam nya ikrau kep tirigi ibon midut ei TUHAN De Ig cem.) 9 Tirigi nibou ndig Tou di bong ei Hamat miap tut Daud nibindei timek Hadadezer de tentara nya yahagomti tu, 10 lene pinak nipmot Yoram mem gima pigo Nibou Ndig Daud tut gi bindei timek nide siceu nya. Lewo Hadadezer kon pran bit Tou bijo ninno tu. Yoram ttei ndigban mas kin perak kin ngkimom-tembaga mang bibor ba, kwei bingat Daud. 11 Nibou Ndig Daud ttei ndigban dima yok hagom ba, bikuk no bak TUHAN bidimig hagom ei mem nibon midutti nya ei TUHAN De Ig. Daud yai bram niyaisi dima tut ndigban mas kin perak di pos leu Hadadezer kin mben Edom kin Moab kin Amon kin Filistin kin Amalek nya di noni bindei timek yok tu.
12 Abisai (di nipmem ninyeng Zeruya) hwen mben Edom bicut bak noni. Lene biyai nimai bak ibou sribu simnaimuhwidip brimigtehiningai ei Mbang Briep Nsim. 13 Noni bikes nide tentara nya ba, yohok ide prak meng yati mem gima ibiya ser Edom nisurti-nipekti. Lene mben Edom inok Nibou Ndig Daud de limwa nya bu. TUHAN bindei ba, Daud hwen nide siceu nya bidem nikon pranti nya hagom bingwig.
14 Nok gima lene Daud ninyeng tak kep minu Israel titut yam biyok niyai kep nide limwa nya leu binhyepo ide nibou nya iba ingon di gom bibon yok cem.
15-17 Yo dini ne yo di inyeng jei ei Daud ninda behei di nonti kon yok nya inyeng ri. Yoab di Abisai nikindig ne nibou tentara ri. Yosafat di Ahilud nipmot rinok nibou di pas kep nibohon mem nibou ndig de ig. Zadok di Ahitub nipmot kin Ahimelekh di Abyatar nipmot yo cin dini ne imam nya ri. Sausa ne sekertaris di pas kep srat ei Daud ninyeng tak kep limwa nyati ri. Benaya di Yoyada nipmot ne nibou mem yo di icuon ser Nibou Ndig Daud niyaisi ri. Daud nipmot bat nya cem ikrau midyai di bon ninyeng ei Daud ninyeng tak kep limwa nyati.