Natan binut TUHAN nihyetti bak Daud
(2Sam. 7:1-17)
17
1 Niabiati Nibou Ndig Daud bong ser nide ig nibou ndig lene jem Nabi Natan kwei bipai bak <<Angat i! Dibong ei ig nibou ndig di iba buom Libanon bingot. Noro TUHAN De Brua Gi Preu jo hak ei prak mengti he.>>2 Lene Natan buhup <<Na Di Anyeng Jei e, akinyon ei angon kanti nya hagomti hak ug. Lewo Allah No mpu Na Di Anyeng Jei.>>
3 Noro Allah pai bak Natan mem mmun dima, 4 <<Disok dihyet ei nani dip bak Ditde awak di Daud. Aug pai bak <Nani ne mporo angot ig mem Dani bi. 5 Lewo habiei tirigi po diteu mben Israel leu minu Mesir pima kikau kwei bipek ammani kep lene dibong ser ig hi bi noro dipo-po nyen bidibong kep prak meng nya he. 6 Nijam po dipo-po nyen bit mben Israel pima lene digahara nibou di didimig yok ei nya tut ig di iba buom Libanon bingot mem Da e? E bi! Digihig ser yok tut ig di nok gima bi sren.>
7 Gima rino na di Nabi Natan aug pai bak Ditde awak di Daud bipia Da di TUHAN Di Dinyeng Jei dipai binoni <Didimig nani leu ade midyai ninyohou domba nya ei ngoi dumti leu api dikon na nok nibou ndig ba, anyeng tak kep Ditde mben Israel tu. 8 Dimpu na bidem aug eisi nya hagom lene dibindei ba, ade siceu nya cem isar bingwig ei mpe di akon pran bit yoni. Midibindei ba, anyeng jei bibor noyam kin nibou di inyeng jei nindigsi nya ei dihyeisi dini. 9-10 Tut Ditde mben Israel ne ditin ei mpia gom di minok ide dihyei di igyati mem yok tu. Ditin ei mpia dima mem yok leu binhyepo ibong nyahan ei dihyei dimati ba, hi giwaisi yok bu bi. Yo di imbuk nya ihwen kep yok habiei nipou tirigi ikwei krau minu dini bigyo ba, nipou tirigi ita nibou ndig hi mem yok bigyo cem pima. Noro mun di buhun dima micut igkep yok bu bi. Dipreu ei mem na bipia midibindei timek ade siceu nya yahagom. Lene midiyai ade nintun him yamti di bram yam nya binani cem. 11-12 Niabiati dino ade njap dem di amai ba, itig na bit adigup bat-adigai bat nya ei ijui dip leu su lene mididimig apmot gom leu apmot bat nindigsi nya ikieti ba, noni mikui bigwam nok nibou ndig biya luei ahoti. Apmot dima rimingot ig mem Dani. Lene midibindei ba, nide ninyeng tak kep limwa nyati ngkiem kei ba, yo di intun noni him mporo inyeng mitak kep ide limwa nya bijo ninno bijo kikau cem. 13 Noni minok dipmot lene Dani midinok nicigya. Midingon kei sut noni kikau bit leu dipreu ei mem jeti. Midikrau kep Ditde gi preu di dipreu ei mem je lene midison noni leu ninyeng noyam kin Saul po dison leu ninyeng leu api akui ba, agwam nok nibou ndig luei nohoti pima bi. 14 Midikon apmot di didimig ei dima ba, kui bigwam nok nibou ndig mem Ditde limwa nya ba, ninyeng mitak kep yok bijo ninno bijo kikau. Lene yo di intun noni him inyeng mitak kep ide limwa nya bram yam bijo kikau.> >>
15 Lene Natan tri tut nihyet di Allah sok ei noni dip dima hagom bak Daud.
Daud ngat nadi bipai sigyo
(2Sam. 7:18-29)
16 Leu api Nibou Ndig Daud coi ug ei TUHAN de prak meng bigwam jug lene ngat nadi bipai <<TUHAN Allah e, dani kin ditde ig bei nsi nya nidem mem gima nisu nye mem nitug ndei Ade nikei sut nyeti nya di abon binye hagom kikau kwei bipek ammani kep bi. 17 Noro abon mun di kei dor tunggwei gima binye tu. Apreu sut yo di mintun dani him ei nijam gima kwei cem ba, abibon da tereu nok no di ninyeng jei. 18 Midipai mindei biNa bu i? Mbro nok gino akan bidem tut mun nyeng hagom di bitut Ade awak di dani lo, akon dinyeng tu. 19 Abon mun di nindig bibor dini tut da bit leu Nanti ajoi sutti leu binhyepo ando nijam di dinyeng jei ei nidipti bu brei bida. 20 Hi di noyam kin Nani bi. Allah rino Nangkom he. Nikan tut gima lewo itri tut binye habiei leu nipou pima kwei bipek nijam dini kep. 21 Mben nindigsi di ingat rin ei dihyei nisurti-nipekti hi di noyam kin nye di mben Israel bi. Mben Israel ne mben gom ngat di akwek yok leu gi yuubon yok nok awak leu binhyepo inok Nanti Ade limwa nya. Nibon mun di nindig biborti nya kin gi mindur bibor nya di abon mem yok hagom bindei ba, anyeng di jei kieng kep dihyeisi dini hagom. Akwek Ade limwa nya leu minu Mesir leu api ajji mben ngkiai leu itimieisi ei mpe di po Ade limwa nya injei siceu mem gima ikon pran bit yok. 22 Akon mben Israel binok Nanti Ade limwa nya bijo ninno bijo kikau. Lene abindei ba, Na Di TUHAN anok ide Allah.
23 TUHAN Allah e, nogindini ma akrau kep Ade gi preu di andat kep di bitut danti kin ditde nintun him yamti di bram yam nya bijo ninno bijo kikau. Ma abindei bipek kep mun di apreu ei dima hagom. 24 Tungwatu nya bidem dihyeisi dini hagom mikon anyeng bijo kikau. Lene mipai <TUHAN Di Sindem Bibor ne Allah di ninyeng tak kep mben Israel ri.> Mporo Nani anyohou yo di intun dani him leu binhyepo inyeng tak kep ide limwa nya bram yam bijo kikau. 25 Allah e, dibrim dingkek bidibindei ba, ditde nadi dini mitibim ei atingou nsi ug rin lewo Nanti apai brei bida bipia mporo akon yo di intun dani him leu binhyepo ikui bigwam nok nibou ndig ba, inyeng mitak kep mben Israel bram yam kikau. 26 Nani ne TUHAN Allah rin ba, mun di kei-kau dima ne apreu ei bida tu. 27 Gima rino dahara Nani leu binhyepo ditde limwa nya ijo ei Ade ningon ngakei yokti bijo ninno bijo kikau. Lewo TUHAN e, apai ahyet di biyai gi kei bak Ade limwa nya. Gima rino handei kon ba, anjei mun di kei bak yoni bijo ninno bijo kikau.>>