Tentara Babel icoi ug ei minu ndig Yerusalem bigyati
(2Taw. 36:13-21; Yer. 52:3b-11)
25
1 Zedekia ninyeng tak kep timiei Yehuda nya mem ari bingwam muhwindatai leu api kiek nimig jou tut Nebukadnezar. Gima rino nibou ndig mem mben Babel dima njei sut nide tentara nya yahagom ba, ikwei kon pran bit mben Yerusalem mem njap gi nisimnai ei bed gi nisimnai. Tentara dima yohok ide prak meng yati bigyon ttai minu ndig Yerusalem ba, iroi dihyei keyam kui ngug tig dima cem. 2 Ba, igya ser timiei minu ndig Yerusalem nya kikau bibou Zedekia ninyeng tak kep yok mem ari bingwam simnaibrimiggom ug e. 3 Ug ei hon njap nimuhwindatai mem bed nibitai ei ari bingwam dima tirigi ninggum nindig bibor hwen timiei minu ndig Yerusalem nindig bibor ba, njita hagom ngwig leu yok tu, 4 lene ide siceu nya inggek ngug tig dima bicoi ug ei minu ndig Yerusalem. Mbro nok gino mmun dima ide siceu nya igyon ttai minu dima lo, tentara timiei Yehuda yahagom imbris nyahan sir nibou ndig de bunggan nghousi bimbut kak dimbou heisi di itu ei ngug tig nipuig can ikieti binang ug ei Yordan nyai leu api ingwes ngun. 5 Noro tentara Babel yuhuk bram Nibou Ndig Zedekia bikat noni ei briep bou him dideu minu ndig Yerikho leu api tentara timiei Yehuda yahagom ikes noni leu ba, inang kikau. 6 Tentara Babel ikat Zedekia kwei ei Nebukadnezar noho bei ei minu ndig Ribla leu api Nebukadnezar kes hukum ei noni dip. 7 Noni bindei ba, Zedekia nipmot bat nya itug ndei nimai bou icig niyai him leu api noni cuk tentara itak Zedekia niyai. Lene iba lante biteu noni ug ei minu Babel.Tentara Babel inggek TUHAN De Ig bingwig
(Yer. 52:12-33)
8 Nibou Ndig Nebukadnezar ninyeng tak kep mben Babel mem ari bingwam simnaimuhwidip brimigtehibitai tu lene Nebuzaradan di pingok kep nibou ndig ningonti ba, nok nibou pran cem kwei ei minu ndig Yerusalem ei njap nimuhwindacan mem bed nimuhwi bicoi ug ei minu dima. 9 Noni ndig TUHAN De Ig kin nibou ndig de ig kin timiei minu ndig Yerusalem di inyeng jei nya ide ig hagom bitimek. 10 Nide limwa nya inggek ngug tig di bikrop ttai minu dima, 11 lene noni kat timiei nya kin tukan nya kin yo di itti kin nibou ndig mem mben Babel kin yo di ibong ser minu dima bikat yahagom ug ei minu Babel. 12 Noro noni sindui sut yo di yuhui mbum bibor ibou poi di inyeng tut dihyei hanjop nsi hi bi bicuk yok leu binhyepo inyohou miai ba anggur nghousi kin beisi nya hagom.
13 Tentara Babel inggek cou ngkimom-tembaga kin kroba kin bokor di jut bibor hagom ei TUHAN De Ig bingwig bipwoi ngkimom-tembaga dima hagom bingkwei sut hanyen ug ei minu Babel. 14 Imbut tut sikop nya kin tong di iket atriem leu nimbar hum dok eisi nya kin mini njeng nimbumbati nya kin bokor di itau mindhe ninggrom eisi kin bokor di indig biei nggrai di ui-gwang kei eisi kin mun nyeng nindigsi di iba ngkimom-tembaga bibon hagom di imam nya ikrau kep tirigi ibon midut ei TUHAN De Ig. 15 Noni mbut tut mun di tukan nya iba mas kin perak bibon hagom ba, gima ne mok nya kin bokor mem gima iket hum mbom eisi ri. 16 Cou ningat can kin kroba nindig kin bokor di nindig krop di Nibou Ndig Salomo ba ngkimom-tembaga bibon mem TUHAN De Ig pima hagom buhun bibor ba, bit bon ikwop nibuhunti kan bi. 17 Cou pima nijeisi meter muhwindaningai ba, hacem noyam. Iba ngkimom-tembaga bibon mun di nijeisi meter gom biniken biyahak ei niyenti nya. Iba ngkimom-tembaga bibon mun di nok jang cem ei niyenti nya lene iba ngkimom-tembaga bibon biei ngat delima ba, ibimau jang dima titut yam.
Timiei minu ndig Yerusalem hi kin bu isima ug ei minu Babel
(Yer. 52:24-27)
18 Nibou pran Nebuzaradan kat Imam Nibou Ndig Seraya kin imam Sefanya di ya kui Seraya kin nibou mem TUHAN De Ig di inyeng jei nya ibou ningai yahagom ba, isima ug ei minu Babel. 19 Noni kat nibou pran gom di ninyeng tak kep tentara timiei Yehuda nya kin nibou kintror tentara di ya kui nibou pran dima kin yo di ipingok nibou ndig ningonti ibou muhwi yahagom bitut yo di inyeng jei nya ibou ningot muhwindagom bu, 20 bibuwak yok ug ei nibou ndig mem mben Babel noho bei ei Ribla ba, 21 minu ndig dima jo ei hanjop Hamat. Lene nibou ndig bindei ba, nide tentara nya ibui yahagom binem-nnai leu api igyai nimai biyok.
Ide siceu nya ikat timiei Yehuda nya bibuwak yok leu itimieisi kikau ug ei ingkiaisi.
Gedalya di nok nibou mem timiei Yehuda nya
(Yer. 40:7-9, 41:1-3)
22 Nibou Ndig Nebukadnezar ta Gedalya nok nibou mem timiei Yehuda nya leu binhyepo ninyeng tak kep limwa nya di yuug sima ei minu Babel bi. No dini nicig ninyeng Ahikam ba, nignyon ninyeng Safan. 23 Tirigi nibou pran kin tentara timiei Yehuda di ikes yonti ei ide siceu nya indati bigyo imiap tut Gedalya tu lene ibikum noni ei Mizpa. Nibou pran Ismael di Netanya nipmot kin Yohanan di Kareah nipmot kin Seraya di Tanhumet leu Netofa nipmot kin Yazanya leu Maakha. 24 Gedalya pai biyok <<Ma jittin tut nibou mben Babel nya di inyeng tak kep nye au. Ma jingot ig ei minu Yehuda ba, jibon jenti nok nibou ndig mben Babel nide awak nya cem leu api mijibong kei jigwam kei.>>
25 Noro ug ei bed nimuhwindacan mem ari bingwam dima lene Ismael di nide pung kim nibou ndig timiei Yehuda nya pima kin nide limwa nya ibou simnai yuug ei Mizpa bigyai nimai bak Gedalya. Yoni ihwen mben Israel kin mben Babel di igya kui noni yahagom ei mpia dima cem. 26 Lene mben Israel dini yok bitut yo di inyeng kin yo di yuhui mbum kin nibou pran nya yahagom inang bingwes ngun ug ei minu Mesir lewo ittin tut mben Babel.
Ewil-Merodakh kes Yoyakhin leu ig bui nsi
(Yer. 52:31-34)
27 Tirigi mben Babel ita Ewil-Merodakh nok ide nibou ndig nijep bu lene noni ningon nggriu sut Nibou Ndig Yoyakhin leu minu Yehuda bikes noni leu ig bui nsi. Mun dini pek kep mem noni ei njap nyatungwagom ba, muhwindacan ei bed simnaibrimigcan mem ari bingwam ningot ningai ba, muhwindacan niabiati noni sima hukum ei ig bui nsi. 28 Ewil-Merodakh ningon nggriu sut noni bibindei ba, ninyeng jei dor njiriek nibou ndig nindigsi di isima hukum bit noni ei ingkiaisi ei minu Babel. 29-30 Nibou ndig sindui sut ba, Yoyakhin juk sinsun ig bui nsi bu bi leu api cigit noni kui nide ig biyem njita bit noni lene kwas mitiei kin mun di noni suar nya hagom tut noni kikau ug bipek niyaijo ningwig honti.