Yoahas di nok nibou ndig mem mben Israel
13
1 Tirigi Yoas di Ahazia nipmot ninyeng tak kep mem nijam ari bingwam nyatungwagom ba, can tu lene Yoahas di Yehu nipmot kui bigwam nok nibou ndig mem mben Israel. Yoahas bong ei Samaria ba, ninyeng tak kep limwa Israel mem nijam ari bingwam simnaimuhwidip brimigtehican. 2 Yoahas bon sisar tut TUHAN noyam kin Nibou Ndig Yerobeam bibindei ba, mben Israel cem icut ei sisarti. Noni kes hon niyai munti di kinei-kinau nya bi sren. 3 Gima rino TUHAN gga mben Israel bisindui sut Hazael di nok nibou ndig mem mben Siria kin nipmot Benhadad di ingkwei-ngkwei nyen bigya kep mben Israel bibindei timek yok bijo kikau. 4 Leu api Yoahas ngat nadi bak TUHAN. TUHAN ngat lo, mben Siria ide nibou ndig ba nisibut biborti bico kep mben Israel apino TUHAN buhup Yoahas de nadi dima. 5 TUHAN dimig nibou gom ei mem mben Israel ba, nibou dima bie tut mben Israel biteu yok leu mben Siria inda nsi. Apino icoi ei nijam nibong kei nigwam keiti hanyen bu noyam kin gi nipou pima. 6 Mbro nok gima lo, ikes hon nibon kep sisar ngot di Nibou Ndig Yerobeam kinyon eisi di bon kep ei nimbie him pima bi ba, ibon kep sisar ngot dima bijo kikau. Lene ibisindui sut kwar Sop Asyera bijo kikau ei Samaria.7 Mben Siria ide Nibou Ndig hwen tentara Israel yahagom bingwig su. Nibou Ndig Yoahas de tentara di iba kuda bikon pran kan nya ibou ningot muhwi kin kroba pran simnai kin tentara nitu nya ibou sribu simnai he rino igyaijo a.
8 Nipui mun tut Nibou Ndig Yoahas niyai munti nindigsi nya kin nibrim ningkekti di bon ninyeng nya hagom jo ei srat Nibohon Nibou Ndig Mben Israel Nyati. 9 Noni cem mai lene itig ei Samaria leu api nipmot Yoas kui bigwam nok nibou ndig biya luei nohoti.
Yoas di nok nibou ndig mem mben Israel
10 Tirigi Nibou Ndig Yoas ninyeng tak kep timiei Yehuda nya mem nijam ari bingwam ningot ningai ba, muhwindacan tu lene Yoas di Yoahas nipmot kui bigwam nok nibou ndig mem mben Israel ei Samaria ba, ninyeng tak kep limwa nya mem nijam ari bingwam simnaimuhwidip brimigtehigom. 11 Noni cem bon sisar tut TUHAN lewo yai bram Nibou Ndig Yerobeam niyai munti di kinei bibor nya bibindei ba, mben Israel cem icut ei sisarti. 12 Nipuig mun tut nibou ndig Yoas dini niyai munti nindigsi nya bitut nibrim ningkekti di kon pran bit nibou ndig Amazia di nok nibou ndig mem timiei Yehuda nya hagom jo ei srat Nibohon Nibou Ndig Mben Israel Nyati. 13 Noni mai lene itig ei jui nsi di ibet ei mem itig kep nibou ndig mben Israel eisi ei Samaria. Lene nipmot Yerobeam Nican kui bigwam nok nibou ndig mem mben Israel biya luei nohoti.
Nabi Elisa niyaijo ningwig honti
14 Mpe dima lene ninggwen di buhun hwen Elisa ba, ningon tai-tai bou lene Yoas di nok Nibou Ndig mem mben Israel kwei cem kep noni. Nibou ndig pim ba, niyai nggwei kibor bipai bak Elisa <<Arig e, Arig e, aba ade nisindemti nyohou nye di mben Israel ninno tu!>>
15 Noro Elisa cuk noni bipai <<Ayai ade hampiap kin ade tibor nya kwei.>> Lene Yoas yai hagom bit leu nok Elisa nicuk noti. 16 Lene Elisa cuk noni bipia tin ei mem prindei tibor gom. Gima rino nibou ndig yai igbit Elisa nicuk noti leu api Elisa kes ninda hacem ei nibou ndig ninda cin dip. 17 Lene nibou ndig kau kendera mihyeti di birok kik minu Siria bit leu nok Elisa nicuk noti. Lene Elisa cuk noni bipai <<Aprindei tibor hak ug!>> Tirigi nibou ndig prindei tibor dima rino nabi dima pai <<Nani ne TUHAN de tibor ri. Noni ba tibor dima mibibindei ba, mben Siria micut bak nani. Jei bi lene ma akon pran bit mben Siria ei Afek kikau bibou yahagom icut bak nani ug e.>>
18 Lene Elisa cuk nibou ndig bu bipia ba tibor nindigsi nya bibui dihyei. Nibou ndig bui dihyei ninjek dip mbiningai lene kes hon. 19 Lene Elisa ningon sibui sut noni bipai bak <<Gino abui dihyei mbimuhwi mbimuhwindagom lene TUHAN mibindei ba, mporo ma aco kep mben Siria yahagom bingwig bihigom ri. Noro nogindini yoni micut bak nani mbiningai he.>>
20 Jei bi lene Elisa niyaijo ngwig hon leu api itig.
Ei nijam dima mben Moab di ibong bigbehei ingkwei-ngkwei nyen kep mben Israel bihwen yok bikwop ari bingwam hagom. 21 Mpe di gom tungwatu nya di itin ei mem itig nimai gom ingat yo di bigbehei nimpung gom leu minu Moab di itau kep yok kros. Lene ibipbur ba, icom nimai dima ei hak mihyeti di itig Elisa ningut eisi nipou su leu api inang leu. Tirigi nimai dima cut bindei Elisa ninjum rino nimai dima kiju biya pijum lene niyaijo hanyen.
Mben Israel kin mben Siria ikon pran bit yam
22 Hazael di nok nibou ndig mem mben Siria co kep mben Israel mem nijam di Yoas ninyeng tak kep mben Israel bijo kikau. 23 Noro TUHAN ngondut Nide limwa nya ba, kos ser igyai munti nya cem. Noni mpu yok bisindui sut ba, isar bi drek dip gi preu di Noni bon bak Abraham kin Ishak kin Yakub. TUHAN bbwe ser Nide limwa nya bi sren kikau kwei bipek ammani kep.
24 Tirigi Hazael di nok nibou ndig mem mben Siria pima mai leu su lene nipmot Benhadad kui bigwam nok nibou ndig biya luei nohoti. 25 Leu api Yoas di nok nibou ndig mem mben Israel bindei timek tentara Siria mbiningai bram yam bibiyai minu ndig ngot di Benhadad pos di yati mem nijam di Nibou Ndig Yoahas di Yoas nicig ninyeng tak kep mben Israel yo pima hanyen.