Nibou ndig sop Atalya nimaisi
(2Taw. 22:10--23:15)
11
1 Tirigi Atalya miap tut nipmot Nibou Ndig Ahazia nimaisi rino cuk tentara nya leu binhyepo igyai nimai bak Ahazia nide ig bei nsi nya yahagom. 2 Nahanok ma igyai nimai bak Yoas di Ahazia nipmot cem bit nibou ndig nimunggwom bat nindigsi nya. Noro Yoseba di Yoram nipmisop ba, Ahazia nikwohop krau Yoas ninda bibrim nyahan leu nindigsi nya ikieti bibindei ba, ningwes ngun. Lene noni buwak Yoas kin sop di nyohou kep noni biku yok nyahan ei nghim nsi gom ei TUHAN De Ig. 3 Yoseba nyohou munggwom dima ei TUHAN De Ig kikau mem nijam ari bingwam muhwindagom mem nijam di Atalya gwam nok nibou ndig sop yo.4 Noro ug ei ari bingwam nimuhwindacan lene Imam Yoyada jem yo di igya ser nibou ndig sop pijum kin yo di igya ser nibou ndig de ig ba, ikwei um noni ei TUHAN De Ig. Tirigi idem yam lene noni cuk yok leu binhyepo iba neheng bipreu ei bipia ibindei mbut ningon kanti gom. Lene noni ndo Yoas di Nibou Ndig Ahazia nipmot biyok, 5 bicuk yok <<Mpe di jibindei mbut midyai mem Njap Nigwam Kep Ninghuisi bu lene ma jikwas yam ei nimpung ningai ba, nimpung gom ya ser nibou ndig de ig, 6 lene nimpung gom kin bu igya ser Dimbou Pmem Sur lene nimpung gom kin bu igya bei nimpung di ya ser dimbou pmem dima inghim dip. 7-8 Ma nimpung can di ikes inda tut midyai ei Njap Nigwam Kep Ninghuisi ikrau ide simeda bijo indati leu api ibiya ser Tuhan De Ig leu binhyepo ibicuon ser Yoas niyaisi. Suar jiya ser Yoas igbit nimbutti nya lene suar jiyai nimai bak bikwop yo di ibisinggre di idideu jeni hak ug.>>
9 Lene nibou tentara dima yok ibit Yoyada nicuk yokti ba, ibuwak tentara di igya ser pima kin gi hi di ikes inda tut midyai mem Njap Nigwam Kep Ninghuisi yahagom kwei bak noni. 10 Lene Yoyada cat micim nya kin mun di ibipukep tibor nggwen nya di Daud nyeng tut di igyok ei Tuhan De Ig pima biyai bak nibou tentara nya dima yok. 11 Leu api yo di igya ser nya ikrau simeda ei indati bidem yok bigya ser TUHAN De Ig nuhui leu binhyepo inyohou bicuon ser nibou ndig Yoas niyaisi. 12 Gima leu lene Yoyada buwak Yoas behei sut leu api kes topi nibou ndig ei nibou nggram him ba, kes srat Allah Nicukti Nya cem bak. Lene yahagom ikon Yoas kui bigwam nok nibou ndig bitri tut noni bidem limwa nya yahagom. Lene yahagom ittem inda ba, ibimbos-hi-mbos bipai <<Na di nibou ndig e, ma ayaijo ninno!>>
13 Nibou ndig sop di Atalya miap yo di igya ser nibou ndig kin limwa nya di imbos-hi-mbos dima ighyet rino brim nimig haninyai buug ei Tuhan De Ig lewo tungwatu imang bibor idem yam ei mpia dima. 14 Tirigi ug krau bingat lo, nibou ndig nijep dima ya ei Tuhan De Ig nimbou ba, imam nya iba mini nibon midut bita noni lene ikon noni kui bigwam nok nibou ndig cem ba, nibou tentara nya kin yo di imiep pun mbrei igya ttai noni. Limwa nya yahagom imbos-hi-mbos ba, ibiyai nillei lene ibimiep ide pun mbrei nya cem. Atalya ba ningon di digit birik nide sinsun lene ba nihyet ndig bisrep <<Jaham jimbuk kep da o! Jaham jimbuk kep da o!>>
15 Yoyada kou sut gima igyai nimai bak Atalya ei TUHAN De Ig him dima. Gima rino cuk nibou tentara nya <<Jikri noni bijehei sut lo, jibimbut tut simin yo di igya ser nibou ndig dima yok ikieti lene ma jiyai nimai bak tungwa dino yai nibou tut gima cuon sop dima niyaisi hak ug.>> 16 Lene ikat Atalya ba, ikri ug ei nibou ndig de ig leu api igyai nimai binoni ei Dimbou Pmem Kuda nuhui ei nibou ndig de ig him.
Imam Yoyada cok tut mun di kinei leu minu Yehuda
(2Taw. 23:16-21)
17 Mpe dima lene Imam Yoyada cuk nibou ndig kin limwa nya leu binhyepo iba neheng bipreu ei bak TUHAN bipia yoni ne TUHAN de limwa nya ri. Lene cuk nibou ndig nonti cem leu binhyepo ba neheng dima bipreu ei bak nide limwa nya. 18 Gima leu lene limwa nya injei bicoi ug ei Baal nibousi binggek. Lene ibinggek nimbar hum dok kin kwar di ikuk yok bak nya cem hagom ningwig a. Lene igyai nimai bak Matan di imam Baal cem ei nimbar hum dok dima nuhui a.
Lene Yoyada kes yo di igya ser Tuhan De Ig cem bigya ser bingkiem. 19 Leu api Yoyada kin nibou tentara nya kin yo di ingkiem ser nibou ndig pijum nya kin yo di igya ser nibou ndig nya ide ig nya bitut limwa nya yahagom injei bibuwak Nibou Ndig Yoas leu Tuhan De Ig biyuug sut ug ei nibou ndig de ig. Yoas coi kak Dimbou Pmem Niya Ser Cig Nya ide leu api kui bigwam ei nibou ndig de banggo mbrei dip. 20 Limwa nya yahagom ingon nggei-hi-nggei ba, mpia mbum-bra ei minu ndig dima nisurti-nipekti lewo igyai nimai bak Atalya tu.
21 Yoas kui bigwam nok nibou ndig mem timiei Yehuda nya ei mpe dino nide njap ug ei ari bingwam muhwindacan.