Sop timiei Sunem ngkwei hanyen ug ei minu Israel
8
1 Mpe di gom ne TUHAN ba ninggum di buhun bibor bihwen mben Israel kikau mem nijam ari bingwam nitindur muhwindacan. Tirigi ninggum di buhun bibor dima cut igkep yok bigyo lene Elisa mbot kep tut gima bak sop timiei Sunem po nipmot mai pima lo, Elisa win bikiju hanyen leu nimai eisi tu. Elisa mbot kep tut gima lene bidip huk noni leu binhyepo pri tut nide ig bei nsi nya biyuug ei minu hiter ug e. 2 Noni yai igbit Elisa nibidip huk noti ba, kiju bimbut leu nitimieisi buug ei minu Filistin bibong ei sirima.3 Tirigi nijam ari bingwam muhwindacan dima ngwig leu lene noni ngkwei hanyen ug ei minu Israel. Leu api ya tut nimunggwom bat nya biyuug ngat nibou ndig ba, yahara nibou ndig leu binhyepo noni tug ig kin ngoi dumti di sop dima nyeng tut nipou su hanyen bak. 4 Mpe dima lene nibou ndig hig Gehazi di Elisa de awak pima kwei ngat noni leu binhyepo pui sut mindur di Elisa bibon tu nya. 5 Tirigi noni kwei ngat nibou ndig bimbot kep ningon kanti bak rino Gehazi pui kep tut notou Elisa win mot di mai gom hanyen leu nimai eisi biyai niyaijo hanyen bu. Lene Gehazi nga leu tut bipai <<Na Di Anyeng Jei Di Akei-kau e, sop di dipui sut pima ningat rigini lene nipmot po Elisa win bikiju hanyen leu nimai eisi biyai niyaijo hanyen pima cem rigini.>> 6 Nibou ndig hig ser tut lene sop dima pui sut nipmot dima bak nibou ndig. Apino nibou ndig hig tungwagom di ya kui noni kwei bicuk noni leu binhyepo itug mun nyeng po sop dima nyeng tut nya pima hagom hanyen bak. Lene suar ibingkwei njita nibok di dem mem nide njita ngat di jo miai nideti nya di hiter igyem mem nijam ari bingwam muhwindacan tirigi sop dima ningat rin ei minu hiter leu pima hagom hanyen bak.
Elisa pui sut mun di micut igkep Benhadad di nok Nibou Ndig mem mben Siria
7 Mpe di gom ne Elisa ug ei Damsyik mem nijam dino Nibou Ndig Benhadad no nggwen yo. Tirigi nibou ndig miap tut Elisa di ningat rin ei Damsyik, 8 lene pai bak Hazael di nibou di ya kui noni <<Ma attei munkwas ba, anjei bak nabi lene abahara noni leu binhyepo hig ser TUHAN tut dani. Midikei hanyen yo e, he midikei hanyen bi e?>> 9 Hazael su ninda kep unta ningut ningot bitai lene njei timiei Damsyik ide mun di kei nya kin njita ngat di kei hi gom hi gom kui unta dima yok leu api ug sut binggok Elisa. Noni kwei krau Elisa nibongti lene Hazael pai bak <<Nibou Ndig Benhadad di nok ade awak cuk da kwei leu binhyepo dihig ser na tut nide ninggwenti. Noni mikei hanyen yo e, he bi e?>>
10 Lene Elisa buhup <<TUHAN pai bida bipia noni mimai ug ri. Noro ma apai hak bak bipia noni mikei hanyen yo.>> 11 Noni tou kep Hazael nggilun apino Hazael ninghuisi mpig sut. Lene Elisa pim kros ba, niyai nggwei kibor. 12 Hazael hig ser <<Andigpoi e, nggon rino apim i?>>
Lene Elisa buhup <<Dipim lewo dikan tut gi mporo ayai mun kinei bibor tut mben Israel. Mporo aya kep ide minu ndig di bon ngug tig jo ser nya ba, andig bingwig ba, ayai nimai bak ide pinai pilei di ubbu nya cem aom ku ide munggwom ngwoi nya ikimam ba, asrat ide sop di itta buhun nya inghop tut munggwom biyem mpia ei dihyeisi cem.>>
13 Lene Hazael hig ser <<Mei! Dibon dinyeng bi ba, notou mem midiyai nisindemti di nok gima i?>>
Lene Elisa buhup <<TUHAN mbot kep tut bida bipia mporo anok nibou ndig mem mben Siria.>>
14 Tirigi Hazael ngkwei hanyen ug ei ig nibou ndig lene Benhadad hig ser <<Elisa pai mindei bina i?>>
Lene Hazael buhup <<Pai bipia Na Di Anyeng Jei mporo ma akei hanyen ug ri.>> 15 Noro njapti kui lene Hazael yai ban dut gom bitur ei minyeiti leu api ba ban dima boom kep nibou ndig niimaisi apino nibou ndig di ninnei cun dima mai hak.
Lene Hazael kui bigwam nok nibou ndig mben Siria biya luei Benhadad nohoti.
Yehoram di nok nibou ndig mem timiei Yehuda nya
(2Taw. 21:1-20)
16 Nibou Ndig Yoram di Ahab nipmot ninyeng tak kep mben Israel mem nijam ari bingwam muhwi lene Yehoram di Yosafat nipmot kui bigwam nok nibou ndig mem timiei Yehuda nya. 17 Mpe dima lene Yehoram de njap ug ei ari bingwam ningot ningai ba, can. Noni bong ei minu ndig Yerusalem ba, ninyeng tak kep limwa nya mem nijam ari bingwam nitindur muhwindaningai. 18 Yehoram wak Ahab nipmisop apino yai bram Ahab niyaisi di bon sisar tut TUHAN noyam kin mben Israel ide nibou ndig nindigsi nya cem. 19 Noro TUHAN kou sut gima bindei sar timiei Yehuda nya lewo Noni preu ei mem Nide awak di Daud nipou su bipia yo di intun noni him mikui bigwam nok nibou ndig sindam kikau.
20 Ei nijam di Yehoram ninyeng tak kepti dima lene mben Edom ikiek imig jou tut minu Yehuda leu api imbres ide ninyeng tak kep limwa nya leu noni ba, igyati kwes. 21 Gima rino Yehoram hei sut nide kroba pran nya hagom ba, njei sut ug ei Zair noro nimpung tentara Edom igyon ttai yok ei mpia dima. Lene Yehoram kin nide nibou tentara nya ikrau kroba pran ba, inang sin siceu di igyon ttai yok nya bingwes ngun mem mmun dima ug. Lene nimpung tentara timiei Yehuda nya cem yahagom inang ba, bikwop tungwagom-gom ngkwei hanyen ug ei nide ig. 22 Hon kep njap dima ne mben Edom igyati kwes ba, nibou ndig mem timiei Yehuda ninyeng tak kep yok bu bi kikau kwei bipek ammani kep. Lene timiei minu ndig Libna cem ikiek imig jou tut minu Yehuda mem nijam dima.
23 Nipui mun tut Yehoram niyai munti nindigsi nya hagom jo ei srat Nibohon Nibou Ndig Mben Yehuda Nyati. 24 Lene Yehoram mai leu api itig ei jui nsi di ibet ei mem itig kep nibou ndig nya eisi ei Daud De Minu Ndig. Lene nipmot Ahazia kui bigwam nok nibou ndig biya luei nohoti.
Ahazia di nok nibou ndig mem timiei Yehuda nya
(2Taw. 22:1-6)
25 Nibou Ndig Yoram di Ahab nipmot ninyeng tak kep mben Israel mem nijam ari bingwam simnaibrimigcan leu api Ahazia di Yehoram nipmot kui bigwam nok nibou ndig mem timiei Yehuda nya biya luei nicig nohoti. 26 Mpe dima lene Ahazia de njap ug ei ari bingwam nyatungwagom ba, can. Noni bong ei minu ndig Yerusalem ba, ninyeng tak kep timiei Yehuda nya mem nijam ari bingwam gom. Nipmem ninyeng rino Atalya ba, Atalya ne Nibou Ndig Ahab nipmisop rin lene Omri di nok nibou ndig mem mben Israel nignyon cem ri. 27 Ahazia kin nide ig bei nsi nya imbier kim Nibou Ndig Ahab kin nide ig bei nsi nya tug hon gi po wak Nibou Ndig Ahab nipmisop pima. Apino Ahazia bon sisar tut TUHAN noyam kin sisar di Ahab kin nide ig bei nsi nya ibon pima.
28 Mpe dima lene Nibou Ndig Ahazia bicom yam bit Yoram di nok nibou ndig mem mben Israel ba, ikon pran bit Hazael di nok nibou ndig mem mben Siria. Ikon pran bit yam ei Ramot ei hanjop Gilead. Yoram tug ndei nibok di buhun ei pran dimati, 29 leu api ngkwei hanyen ug ei minu ndig Yizreel leu binhyepo bong tut nibok ei sirima lene Ahazia mbut ba, ug cem kep noni ei sirima.