Nabot de ba anggur nghousi
21
1 Nabot nyeng tut ba anggur nghousi di jo dideu Nibou Ndig Ahab de ig ei Yizreel. 2 Mpe di gom lene Ahab ug pai bak Nabot <<Ma akwas ade ba anggur nghousi dima tut da leu binhyepo diyai miai eisi lewo jo dideu ditde ig. Gino ace tut lene midiba ba anggur nghousi hiter di kei bibor kei biluei ade ba anggur nghousi dima. Gi bi lene midiba mitiei di dem bipek leu nani hak ug.>>3 Lene Nabot buhup <<Diba dakep ba anggur nghousi dima leu didigup bat-didigai bat nya. Gima rino dipai kin neheng tug hon Allah ninyeng bipia miditri gima hanyen bak na di Andigpoi bi sren!>>
4 Lene Ahab ngkwei hanyen ug ei nide ig kin ningon buhun ba, ningon sibui sut Nabot cem. Lene noni ug bong nibongti bikiek noho ter leu lene kou sut niyem njita cem. 5 Leu api nitnem Izebel kwei ngat bihig ser noni <<Nggon rino angon buhun ba, akou sut niyem njita cem i?>>
6 Lene Ahab buhup <<Dingon sibui sut Nabot. Dipi bidipek nide ba anggur nghousi mem danti. Gi bi lene midiba ba anggur nghousi hiter bu biluei nide ba anggur dima noro noni ce tut dingon kanti dima bi.>>
7 Lene Izebel buhup <<Nani ne Nibou Ndig mem mben Israel rin e, he bi e? Akiju lene ma abindei ba, angon kei hanyen leu api ayem njita hak ug lewo midibindei ba, anyeng tut Nabot de ba anggur nghousi dima ug ri!>>
8 Lene noni pas srat meng poi bikes Ahab ninyeng kin nide cap ei srat nibehei leu api pinak bak nibou Yizreel nya kin yo di inyeng jei nya ei minu dima. 9 Bicuk yok tug hon srat dima <<Jinduk yam ba, jahagom jitto njap gom biyam leu binhyepo timiei Yizreel nya igyem njita bi mem nituti poi lene yahagom induk yam ei gom. Lene ma Nabot gwam bibie leu nindigsi nok no di jahagom jinggei sut noni. 10 Lene ma jikes jihyet bak yo di imbuk nya ibou poi leu binhyepo ipai kep noni drek dip gi nihyet wer mpiahi tut Allah kin nibou ndig. Lene ma jikri noni ug ei minu ndig nisai bijiba tig biyai nimai bak drek dip nihyet di wer mpiahi dima.>>
11 Lene nibou Yizreel nya kin yo di inyeng jei nya igyai hagom bit leu nok Izebel nicuk yoti. 12 Itto njap dima igyem njita mem nituti poi bit yam leu api yahagom induk yam ei gom ba, ikes Nabot bigwam bibie leu nindigsi nya. 13 Lene yo di imbuk nya ibou poi ipai kep Nabot bipia nihyet wer mpiahi tut Allah kin nibou ndig. Gima rino ikri noni ug ei minu ndig nisai lene iba tig biyai nimai binoni hak ug. 14 Lene isok ighyet bak Izebel bipai binoni <<Nabot mai su.>>
15 Tirigi noni miap ighyetti dima tu lene ug pai bak Ahab <<Nabot mai su. Nogindini ma aug ba, ayai nide ba anggur nghousi di noni tri bina bi pima hak ug.>> 16 Leu api Ahab ug ei ba anggur nghousi pima bisrin ser ei mem nonti.
17 Lene Allah pai bak Nabi Elia leu Tisbe pima, 18 <<Aug ngat Ahab di Nibou Ndig Samaria. Nogindini ningat rin ei Nabot de ba anggur nghousi ba, sindi ug srin ser ei mem nonti. 19 Da di Allah disok dihyet ei nani dip bak noni <Abindei ba, Nabot mai su lene abipbur ba, ayai nide dihyei hanjop nsi nya cem tu. Gima rino nsien nya mipiei anggrom ei mpia di ipiei Nabot ninggrom ei pima.> >>
20 Tirigi Ahab ngat Elia di tau kep noni lene noni pai bak <<Ditde siceu hatap da tu e?>>
Lene Elia buhup <<Igbit ri! Lewo na di Andigpoi ampig bou kep ade niyai munti di mbuk bibor ei Allah niyai him wer ninno tu. 21 Gima rino Allah pai sut na di Andigpoi <Midibindei ba, mun di buhun bibor micut igkep na. Midiyai nimai bak nani kin pinai pilei nya kin andigpoi nya di itig mbier tut na cem yahagom. 22 Ambier kimti nya midem kep nok Nebat nipmot di Nibou Ndig Yerobeam nimbier kimti nya kin Ahia nipmot di Nibou Ndig Baesa nimbier kimti nya drek dip gi abindei ba, dingon sibui sut mben Israel tirigi abie tut yok ug ei sisarti.> 23 Lene Allah pai sut Izebel bipia nsien nya migyem ningut bingwig ei minu ndig Yizreel. 24 Nsien nya migyem yo di itig mbier tut na di nibou ndig ingut tirigi imai ei minu ndig Yizreel leu api hacam krubri nya mipuk gi hi di imai ei minu dima nisai ingut bingwig.>>
25 Tungwatu dihyeisi dini hi mpig bou kep mun di mbuk bibor ei Allah niyai him noyam kin nibou ndig Ahab de niyai munti dimbuk bibor bi sren. Nitnem Izebel dor pip noni bitig dino noni bon mun di mbuk bibor dima hagom. 26 Ahab bon sisar di mpiei bibor tirigi noni kuk no bak kwar nya noyam kin mben Amori po Allah jji yok bingwig leu ide dihyei hanjop nsi tirigi mben Israel sindi ikieng kep minu Kanaan pima.
27 Tirigi Elia kes nihyet hon lene Ahab rik nide sinsun nibou ndig bijuk leu no leu api juk sinsun kron biluei bu nok bindo bipia noni ttin ser nide sisar. Noni kou sut gi yem njita ba, ttin sinsun kron nok ban tirigi bong nibongti lene niimaisi nghek kikau cem.
28 Lene Allah hig ser Elia, 29 <<Ayok ayai kep Ahab di ba ningon di huk niti bikuk no ei Doho bei tu e? Leu gima rino midibindei ba, mun di buhun bibor micut igkep noni bi kikau bibou niyaijo ngwig hon ug e. Midibindei ba, mun di buhun bibor dima micut igkep nide mbier nikimti nya mem nijam di nipmot ya luei nohoti.>>