Yoab hwen nibou ndig Daud ningon
19
1 Lene Yoab miap Nibou Ndig Daud ninghapti tut ningon di ngguk tut Absalom di pim biniyai nggwei kibor dima. 2 Tirigi Daud de tentara di sindi ingon llei sut ide siceu nya di icut bak yoni pima imiap tut nibou ndig di ningon ngguk tut nipmot lene gima bindei ba, itta cut tut mem njap dima. 3 Gima rino yahagom iba iimaisi di hai bingkwei hanyen ug ei minu ndig pima dem kep nok tentara di immai sut yonti tut gi inang leu ide siceu nya. 4 Lene nibou ndig nggai ser niimaisi leu api ba nihyet nindig bahara <<Ayo dipmot Absalom o! Absalom dipmot ndia ug o!>>5 Lene Yoab ug ei nibou ndig de ig bisok kep noni <<Andigpoi e, ade limwa nya iteu nani kin ade bat nya kin atnem bat nya kin atnem bat di nimien nya jahagom ba, jingwes ngun. Noro njap di ammani abinim kep ade limwa dima yok yahagom. 6 Andigpoi e, ningat ne angondut yo di ingon mpo tut na lene angon mpo tut yo di ingondut na! Ando brei bak ade nibou pran nya kin ade tentara nya bipia yahagom ibon inyeng ei na di Andigpoi ayai him bi! Dikan tut bipia gino Absalom niyaisi jo mem njap di ammani lo, nyeni nahagom nimai lene na di Andigpoi angon llei bibor! 7 Nogindini akiju ba, aug biwin kep ade limwa nya ingonti. Gi bi lene diba neheng bipai tug hon TUHAN ninyeng bipia yahagom mikes na di Andigpoi ei ba, minang bingwig mem mmun di ariman leu na ug ri. Gino mun di buhun dima cut igkep na di Andigpoi lene minok mun di buhun bibor dor njiriek mun nyeng nindigsi di micut igkep na di Andigpoi kikau ug bipek ayaijo ningwig honti.>> 8 Lene nibou ndig kiju buug ei nisai lene gwam nyahan kui dimbou hui ei minu ndig dima. Nide limwa nya imiap tut nibou ndig nikweisi leu api yahagom induk yam bingwig kep noni.
Daud ngkwei hanyen ug ei minu ndig Yerusalem
Noro mben Israel pima yahagom inang bingwig ba, ingkwei hanyen ug ei itimieisi. 9 Mpe dima lene yahagom iba ighyet bidahat yam bipai biyam <<Nibou Ndig Daud teu nye bingwes ngun leu mben Filistin kin ide siceu nindigsi nya cem. Noro nogindini noni nang leu Absalom buug ei ningkiaisi tu. 10 Nyeni ita Absalom nok ide nibou ndig lene noni ug bikon pran noro tug midut tu. Nggon rino tungwagom ug brim ningkek kep Nibou Ndig Daud bibuwak noni hanyen kwei bi i?>>
11 Lene Nibou Ndig Daud miap tut mben Israel isimbot kep biyamti dima. Gima rino noni sok nihyet ei Imam Zadok kin Imam Abyatar dip bak nibou keret Yehuda nya bihig ser yok <<Nggon rino jibon jenti nok yo di igya nohon keti mem gima jikwei buwak nibou ndig hanyen ug ei nide ig nibou ndig i? 12 Jeni ne dide bat nya rin ba, ditig mbier tut je. Nggon rino jibon jenti nok yo di igya nohon keti mem gima jikwei buwak da hanyen i?>> 13 Lene Daud sok nihyet ei yok dip bak Amasa cem bipai binoni <<Ditig mbier tut na. Hon kep ammani kui lene dita nani ba, aya luei Yoab nohoti nok nibou pran bu. Gino diyai igbit dipreu ei mem nati dima bi lene ma Allah yai nimai bida hak ug.>> 14 Gima rino Daud bindei ba, keret Yehuda yahagom ingon gom tut noni leu api isok ighyet kwei bak noni leu binhyepo noni buwak yo di igya kui noni yahagom kwei ba, ibong ser nide ig nibou ndig hanyen bu.
15 Tirigi Daud kwei krau Minyei Yordan lene keret Yehuda di induk yam kwei ei Gilgal igya um noni ba, isigon minyei bibie mem noni. 16 Mpe dima cem Simei di ntun keret Benyamin him di nicig ninyeng Gera leu Bahurim pima bipbur bibrim nimig leu binhyepo ngat Nibou Ndig Daud ei Yordan nyai. 17 Noni kwei sut tungwatu nya di intun keret Benyamin him ibou sribu gom. Lene Ziba di Saul de awak pima cem kwei krau Yordan nyai bibie mem nibou ndig. Noni buwak nipmot bat nya ibou simnaimuhwidip kin nide awak nya ibou ningot can kwei bibit noni. 18 Yo dini yahati tut nibou ndig kin nide ig bei nsi nya yahagom tirigi isigon minyei leu api ingon ya mem nibou ndig nicuk yokti nya hagom.
Daud ningon nggriu sut Simei
Tirigi nibou ndig sindi sigon minyei lene Simei kuk no biba ningwak bikik dihyeisi ei nimig him. 19 Bipai binoni <<Andigpoi e, ma ayok ngon kep ditde mun di diyai tunggwei sut na di Andigpoi mem njap di anang leu minu ndig Yerusalem pima bu au. Dahara mem na di Andigpoi leu binhyepo angon prion ser hagom lene ma agga da drek dip au. 20 Andigpoi e, dikan tut bipia dibon sisar tut na tu. Gima rino njap di ammani dikwei um na di Andigpoi bibie leu keret nindigsi nya di ibong bei mpia nijjai.>>
21 Lene Abisai di Zeruya nipmot pai <<Ma Simei tug ndei nimai lewo noni mbriom nibou ndig di TUHAN ta ei su.>>
22 Noro Daud buhup bipai bak Abisai kin nikindig Yoab nya <<Tou rihig ser jeni tut jingon kanti i? Mijibindei ba, mun di buhun cut igkep da bu e? Nogindini dani ne nibou ndig mem mben Israel yahagom hanyen bu ri. Gima rino dipai ser ba, timiei Israel hi mitug ndei nimai njap di ammani bi.>> 23 Lene noni pai bak Simei <<Dwai, diba neheng bipai tug hon dinyeng bipia atug ndei nimai bi.>>
Daud ningon nggriu sut Mefiboset
24 Lene Mefiboset di Saul nignyon pima kwei ya um nibou ndig. Tirigi nibou ndig nang leu minu ndig Yerusalem pima lene Mefiboset kek minyeiti bi kak nuhui nta bi tot nide sinsun ei minyeiti cem bi kikau kwei bipek njap dino nibou ndig ningwes ngun bikwei hanyen kep. 25 Tirigi Mefiboset kwei leu minu ndig Yerusalem bipigo nibou ndig lene nibou ndig hig ser noni <<Mefiboset e, nggon rino abit da tirigi dinang leu minu ndig Yerusalem pima bi i?>>
26 Lene noni buhup <<Andigpoi e, akan tut bipia dimig hacem lit. Dicuk ditde awak bipia suar noni tin ei ditde keledai leu binhyepo dibri bidibit na di Andigpoi noro awak dima ham nimbuk kep da. 27 Gima he bi lewo noni ris bak na di Andigpoi tut da. Noro na di Andigpoi noyam kin Allah de malaikat. Gima rino ma na di Andigpoi abibon da bit leu angon kanti. 28 Mbro nok gino dicig Saul nide bat nya yahagom idem mem gima na di Andigpoi ayai nimai biyok lo, asindui sut da ba, diyem njita bit na di Andigpoi ei ade meja dip. Dani dem mem gima dahara na di Andigpoi tut mun nyeng hi bu bi.>>
29 Lene nibou ndig buhup <<Cobi. Ma akes ahyet hon lewo dimiap tu. Dikos tut bipia nani kin Ziba jahacem jikwas ndigban di jiba jekep leu Saul pima tut yam.>>
30 Noro Mefiboset buhup <<Nna ba Ziba ba nokep hagom hak ug. Dingon cut hon gino na di Andigpoi angwes ngun ba, akwei hanyen tu.>>
Daud ningon nggriu sut Barzilai
31 Lene Barzilai leu Gilead cem kwei leu Rogelim leu binhyepo ya tut nibou ndig tirigi noni sigon Minyei Yordan. 32 No dini wer andig-ndau ba, nide njap ug ei ari bingwam ningot muhwindaningai tu. Noni nyeng tut ndigban nindig bibor. Tirigi Daud bong ei minu ndig Mahanaim pima lene Barzilai ngondut noni bikwas njita tut noni kin nide limwa nya. 33 Lene nibou ndig bidip huk noni <<Ma abit da ba, suug bong ei minu ndig Yerusalem leu api midinyohou na.>>
34 Noro Barzilai buhup <<Andigpoi e, jei bi lene dimai ug ri. Gima rino nggon rino midibit na di Andigpoi ug ei minu ndig Yerusalem i? 35 Ditde njap ug ei ari bingwam ningot muhwindaningai tu. Dingat dingwes ei mun nyeng hiti bu bi. Diyem njita hagom kei bi ba, biei ngat ningei hagom nok minyei he lene ditingou nam ser yo di ipai doia ighyet cem tu. Gino duug bong bit na di Andigpoi lene midinok mun di buhun mem nani. 36 Dem mem gima angondut da nok gima bi. Gima rino tirigi sisigon minyei lene midibit na di Andigpoi mbigom he leu api midingkwei hanyen. 37 Handei kon ba, na di Andigpoi asindui sut da ba, duug hanyen ei ditimieisi leu binhyepo itig dingut simiak dicig dipmem nya ijui dip. Angat dipmot Kimham dini e? Abuwak noni leu binhyepo noni miya kui na di Andigpoi ba, abibon noni bit leu angon kanti.>>
38 Lene nibou ndig buhup <<Midibuwak noni leu api midibibon noni bit leu angon kanti. Lene midiyai mun di asuar nya hagom bina mpe dino ahara da.>> 39 Lene Daud kin nide limwa nya yahagom isigon Minyei Yordan. Tirigi yuug dihip ei nite hi bu lene Daud mei Barzilai ningyoi bingat nadi tindei mun di kei mem noni. Lene Barzilai ngkwei hanyen ug ei nitimieisi.
Yehuda nya kin mben Israel iliriem yam tut nibou ndig
40 Tentara Yehuda yahagom kin tentara Israel niken igya tut nibou ndig ba, isigon minyei leu api nibou ndig ug ei Gilgal ba, Kimham bit noni. 41 Lene mben Israel yahagom induk yam kwei bigya ei nibou ndig noho bei lene yihig ser noni <<Andigpoi e, nggon rino nisut bat di keret Yehuda nya ikan bipia idem mem gima ikwei um na di Andigpoi bibie bitut nani kin ade bat nya kin ade limwa nya jahagom tirigi jisigon Minyei Yordan i?>>
42 Lene Yehuda nya ibuhup <<Niyai nok gima lewo nibou ndig tig mbier tut nye. Nggon rino niyai munti dima bindei ba, jiwok nye i? Nibou ndig ba njita bingondut nye bikwas mun nyeng gom tut nye cem bi.>>
43 Lene mben Israel ipai <<Mbro nok gino nibou ndig tig mbier tut je lo, nyeni nidem mem gima nibuwak noni nindig bibor mbisimnai bu njiriek je. Nggon rino jingon jei ba, jingwes pri gau nye i? Ma jiyok ngon kep bipia nyeni nisimbot kep biyam tut nibuwak nibou ndig hanyen kweisi bibie leu je!>>
Noro Yehuda nya ighyet singga bibor dor njiriek mben Israel ighyet.