Nabi Natan pai nihyet bak nibou ndig Daud
(1Taw. 17:1-5)
7
1 Mpe dima lene Nibou Ndig Daud bong kei gwam kei ei nide ig nibou ndig ba, TUHAN cuon niyaisi binyohou noni leu nide siceu nya yahagom cem. 2 Lene noni pai bak nabi Natan <<Angat i! Dibong kei di gwam kei ei ig nibou ndig di iba biei buom Libanon bingot dini noro Allah De Brua Gi Preu jo nijoti ei prak meng behei gom ngat he.>>3 Lene Natan buhup <<Andigpoi e, nna ba ayai mun bit leu angon kanti lewo TUHAN mpu na di Andigpoi.>>
4 Noro ei himmun dima ne TUHAN pai bak Natan, 5 <<Disok dihyet ei na dip bak Ditde awak Daud. Apai binoni bipia dem mem gima noni ngot ig mem Da bidibongti bi. 6 Ei nijam po diteu Ditde limwa di mben Israel ba, ingwes ngun leu Mesir kikau kwei bipek ammani kep lene dibong ig hiti bi. Lewo dibong-bong nyen bidem minu ei prak meng behei he. 7 Tirigi dibong-bong nyen bidem minu bit mben Israel pima lene dahara ide nibou di didimig ei su nya leu binhyepo iba biei buom Libanon bingot ig gom mem Da bi sren.>>
8 Gima rino apai bak Ditde awak Daud <<Da di TUHAN Di Sindem Bibor dihig nani kwei leu ade domba nya di anyohou ei susti leu api dita nani ba, anyeng tak kep Ditde limwa di mben Israel. 9 Dingat rin bit nani bidem ambutti nya hagom ba, dihwen ade siceu nya bingwig ei aho bei cem tu. Midibindei ba, anyeng jei bibor noyam kin nibou ndig di inyeng jei nindigsi nya bidem dihyeisi dini hagom. 10 Dipek minu ttou nsi gom bak Ditde limwa nya leu api dita yoni ei sirima tu. Yoni mibong kei migwam kei lewo ide siceu nya mihwen yok ei sirima bu bi. Nipou tirigi icoi kwei ei minu dini bigyo lene yo di isibut nya ihwen-hwen nyen yok. Noro nok gima bu bi sren. 11 Mbro nok gino didimig nibou nya di ibie tut yok ei apino yo di isibut nya ihwen bit yok kikau kwei bipek ammani kep lo, midicuon ser ayaisi lene midibindei ba, ade nintun him di bram yam nya imang bibor cem. 12 Mpe dino ayaijo ngwig hon tu leu api tungwatu mitig angut ei jui nsi simiak adigup bat-adigai bat nya ingut lene midita apmot gom nok nibou ndig biya luei ahoti bu leu api midibindei ba, ninyeng tak kepti mbut sindem bibor. 13 Noni rima mingot ig gom mem Da. Lene midibindei ba, yo di intun noni him minok nibou ndig nya bigya luei nohoti bram yam bijo ninno bijo kikau. 14 Midibon Danti bidinok nicig lene noni minok dipmot. Gino noni bit dihyet bi lene midibui noni drek dip bit leu nok no di pinai bui nipmot. 15 Midinjei mun di kei bak noni bit leu nok gi dipreu ei mem yo di intun nani him. Midinghek tut noni bi. Noro dinghek tut Saul bididip tut ninyeng leu binhyepo aya luei nohoti nok nibou ndig bu. 16 Mporo ma anok pung mem nintun him di bram yamti imang bibor ba, anyeng di tak kep ade limwa nya sindem bibor cem bijo ninno bijo kikau. Ade nintun him di bram yam minok nibou ndig nya biya luei ahoti bram yam bijo ninno bijo kikau.>>
17 Lene Natan tri tut nihyet dima hagom bak Daud bit leu nok Allah nicuk noti.
Daud ngat nadi bijem sigyo bak Allah
(1Taw. 17:16-27)
18 Lene Nibou Ndig Daud coi ug ei TUHAN De Prak Meng nsi bikuk no lene ngat nadi bipai <<TUHAN Di Anyeng Jei Bibor e, dani kin dide bat nya nahagom nidem mem niyai mun di kei di anjei bak nyeni nipou kwei bipek ammani kep hagom bi. 19 Lene gima he bi lewo Na di TUHAN Di Anyeng Jei Bibor abikum eisi bu ba, apreu ei mem da tut ditde nintun him di bram yamti. Mbro nok gino dani ne tungwatu dihyeisi dini he lo, Na di TUHAN Di Anyeng Jei Bibor ando mun dini yok hagom brei bida! 20 Bit bon dahap diji bidimbrap bit Na bu kan bi! Akan bidem tut mun di jo ei Ade awak di dani dingonti hagom tu. 21 Ayai munti nya di kei bibor dini hagom bit leu nok apreu ei mem da ba, bit leu angon kanti mem da cem leu binhyepo abingginau Ade awak di dani. 22 TUHAN Allah Di Anyeng Jei Bibor e, asindem bibor! Nangkom ne Allah ri! Tungwatu nya noyam kin Nani bi. Nikan tut gini lewo nimiap tut hagom nipou kwei bipek ammani kep tu. 23 Ngkiai nya ei dihyeisi dini noyam kin Israel bi. Lewo ateu mben Israel leu awak leu binhyepo abibon yok ba, inok Ade limwa nya. Mun di sindem bibor kin mun di mindur di abibon mem yok bindei ba, tungwatu nya itri tut bidem dihyei nisurti-nipekti tu. Ajji ngkiai nya bitut ide kwar nya bingwig sindam tirigi Ade limwa nya icoi ug ei ide minu bikon pran bit yok tu. 24 Na di TUHAN abindei ba, mben Israel inok Ade limwa nya bijo ninno bijo kikau ba, Nanti anok ide Allah.
25 Nogindini nahara Na di TUHAN Allah leu binhyepo abindei ba, mun po apreu ei mem da kin ditde nintun him di bram yamti pima mijo ninno mijo kikau. Ma ayai hagom bit leu nok apreu ei mem nyeni tu. 26 Tungwatu bidem dihyeisi dini hagom mikon anyeng di jei tirigi itri tut ighyet biyam <TUHAN Di Sindem Bibor ninyeng tak kep mben Israel!> Lene ma abindei ba, yo di intun dani him minok nibou ndig nya bigya luei dohoti bram yam bijo ninno bijo kikau. 27 TUHAN Di Sindem Bibor di anyeng tak kep mben Israel e, dibrim dingkek kep Na tug hon nadi dini lewo apai brei bida bipia ditde nintun him di bram yamti minok nibou ndig nya bigya luei dohoti bram yam bijo ninno bijo kikau tu.
28 TUHAN Di Anyeng Jei Bibor e, Nangkom ne Allah ri! Ayai hagom bit leu nok apreu ei mem nyeti tu bijo ninno bijo kikau. Lene apreu ei sut mun di kei bibor kei mem da tu. 29 Leu gima rino dahara bak Nani, ma anjei mun di kei bak ditde nintun him di bram yam nya leu binhyepo Ade ningon ngakei yokti mijo nibreisi mem yok. TUHAN Di Anyeng Jei Bibor e, apreu kep da tut mun dini yok hagom tu. Gima rino mporo ma anjei mun di kei bak ditde nintun him di bram yam nya bijo ninno bijo kikau.>>