Mben Israel kin keret Yehuda ita Daud nok nibou ndig
(1Taw. 11:1-9, 14:1-7)
5
1 Lene mben Israel yahagom induk yam ei Hebron ba, ipai bak Daud <<Andigpoi e, nahagom nitig mbier tut na. 2 Mbro nok gino Saul nok nibou ndig mem nye nipou su lo, na di Andigpoi abie tut tentara Israel ug ei nikon pranti. Mpe dima lene TUHAN preu ei mem na bipia mimbrek-mimbrek lene mporo abie tut Nide limwa nya ba, anyeng mitak kep yok.>> 3 Lene Daud kin nibou mben Israel yahagom ipreu ei biyam ei TUHAN niyai him leu api nibou nya ita Daud nok nibou ndig mem mben Israel cem yahagom. 4 Mpe dima ne Daud de njap ug ei ari bingwam ningot ningai leu api ninyeng tak kep yok kikau mem ari bingwam ningot bitai bu. 5 Ninyeng tak kep keret Yehuda ei Hebron mem ari bingwam muhwindacan biniken lene ninyeng tak kep mben Israel kin Yehuda yahagom ei minu ndig Yerusalem mem ari bingwam ningot ningai ba, ningai biniken bu.6 Mpe di gom bu lene Daud ya tut yo di igya kui noni bimbut mem gima ihwen mben Yerusalem. Noro timiei minu dima di mben Yebus ikan bipia bit bon Daud sindem mem gima bindei timek minu dima kan bi. Gima rino ipai binoni <<Asindem mem gima ahwen nye leu ba, acoi kwei ei minu dini bi sren. Yo di igyai tu kin yo di las hwen yok nya isindem mem gima ihwen je bijingwig.>> 7 Noro Daud sindem mem gima hwen yok leu ba, yai ide minu ndig Sion biyati leu api bong ei sirima. Leu gima rino tungwatu nya ijem minu dima ninyeng Daud De Minu Ndig.
8 Tirigi sindi ihwen yok lene Daud hig ser nide tentara nya <<No di ningon mpo tut mben Yebus dem kep nok danti dingon mpo tut yokti ningat rin srig jikieti e? Ningon mpo tut yokti dem mem gima hwen yok e? Gi nok lene ma noni coi kak dihyei nyem di ide minyei biam kak bimbut kikau ba, bihwen yo di igyai tu kin yo di ipriker pima.>> (Leu gima rino tungwatu nya indat kep nipaisi <<Ma yo di igyai tu kin yo di ipriker icoi ug ei TUHAN De Ig au.>>)
9 Niabiati Daud yai mpia dima leu yok biyati tu lene noni bong ser bijem ninyeng <<Daud De Minu.>> Lene noni kinyon ei niwin minu ndig dimati hammi mpia di iji kep nipou su ei nungug nikiou bei mpia nipriti.
10 Noni kum ei nide nisindemti bijo ninno bijo kikau lewo TUHAN Di Sindem Bibor mpu noni nindig bibor.
11 Lene nibou ndig Hiram ei Tirus cuk yo di igya kui noni ibou poi ba, yuug ngat Daud. Lene noni kwas biei buom Libanon ba, pinak nide tukan biei kin tukan tig ibou poi cem bak Daud leu binhyepo ibingot ig nibou ndig mem noni. 12 Lene jo nibreisi mem Daud bipia TUHAN ta noni nok nibou ndig mem mben Israel bibindei ba, ninyeng tak kepti sindem bibor cem leu binhyepo nide limwa nya ibong kei igwam kei.
13 Niabiati tirigi Daud kes Hebron ei buug bong ei minu ndig Yerusalem lene noni wak nitnem bat nya kin sop nyeng tak kep he nya hi kin bu bibon nipmot bat kin nipmisop bat nya hi kin bu. 14 Munggwom pinai di sop dini yok isrek tut bak Daud ei minu ndig Yerusalem inyeng rino Syamua kin Sobab kin Natan kin Salomo. 15 Kin Yibhar kin Elisua kin Nefeg kin Yafia. 16 Kin Elisama kin Elyada kin Elifelet yahagom.
Mben Filistin icut bak tentara Israel
(1Taw. 14:8-17)
17 Tirigi mben Filistin imiap tut gima mben Israel ita Daud nok ide nibou ndig tu lene ikos tut bipia minduk yam kwei bikat noni. Noro Daud miap tut ingon kanti dini leu api ku no ei tentara nibousi di igya coi. 18 Tentara Filistin ikwei krau Mbang Briep Refaim bibong ei sirima. 19 Lene Daud hig ser TUHAN <<TUHAN e, suar dikon pran bit tentara Filistin dima yok e? Asindem tut da ba, abindei ba, icut bak dani e?>>
Lene TUHAN buhup <<I, akon pran bit yok lewo midibindei ba, icut bak nani ug ri!>>
20 Gima rino Daud nya yuug ei Baal-Perasim bikon pran bit tentara Filistin ei sirima apino yahagom icut bak noni. Lene noni simbot dat <<TUHAN njei ditde siceu ide tentara nibousi di igya coi dem kep nok minyei di su nindig bibor bihwen ditde siceu nya bingwig.>> Leu gima rino tungwatu nya ijem mpia dima ninyeng Baal-Perasim. 21 Tirigi tentara Filistin inang bingwig leu mpia dima lene bon nituti mem ipwoi ide kwar di ikuk yok bak biyuug sut bi. Gima rino Daud kin nide limwa nya imbus kwar dima yok bimbut tut.
22 Lene tentara Filistin induk yam kwei ei Mbang Briep Refaim hanyen bu bibong ei sirima. 23 Lene Daud hig ser TUHAN tut ningon kanti hanyen bu leu api Noni buhup <<Jihwen yok hammi mpia dini au noro jikrop je bijihwen yok leu nite bei inghim dip kwei dideu biei murbei ninghousi. 24 Tirigi jimiap nibimbi di tibim kwei leu biei murbei dima ninggrupti dem kep nok tentara di injei bram yam lene ma jihwen tentara Filistin lewo midibie tut je bidibindei ba, yahagom micut bak jeni ug ri.>> 25 Lene Daud yai hagom bit leu nok TUHAN nicuk noti bijji Filistin nya leu Geba kikau ug ei Gezer bibindei ba, igyai nimai.