Saul kin nipmot bat nya itug ndei nimai
(1Taw. 10:1-12)
31
1 Mpe dima lene tentara Filistin ikon pran bit tentara Israel ei Nungug Gilboa apino mben Israel imang bibor imai ei sirima lo, nindigsi nya yahagom bitut Saul kin nipmot bat nya inang leu. 2 Noro mben Filistin yahatap yok bigyai nimai bak Saul nipmot bat nya ibou ningai di inyeng rino Yonatan kin Abinadab kin Malkisua. 3 Yo di ikon pran itot yam sindem bibor simiak Saul ei nite hi nite hi apino nide siceu nya iprindei noni bibindei ba, nibok buhun bibor. 4 Gima rino noni cuk nide awak pinai pilei di ttei kep nide minggwen nya bipai <<Ma ahit ade simeda ba, adat da hak leu binhyepo mben Filistin di igwam TUHAN ninghim dini yok miba da bikek ba, igyai nimai bida au.>> Noro pinai pilei dima kou sut gi dat noni lewo hig ningon eisi. Gima rino Saul hit nide simeda bitas pijum leu api ei njei nonti ninggwenti bimai. 5 Tirigi pinai pilei ngat lo, Saul mai su lene noni cem yai igbit Saul niyaisi pima ba, mai noyam kin niceu. 6 Nok gima lene Saul kin nipmot bat nya ibou ningai kin yo di igya kui noni kin pinai pilei gom yahagom igyai nimai mem njap gom dima. 7 Tirigi mben Israel di ingat rin ei Mbang Briep Yisreel nite dima ug kin gi hi di ibong ei Minyei Yordan nite dima ug imiap tut bipia tentara Israel inang leu ba, Saul kin nipmot bat nya itug ndei nimai tu lene inang leu ide ig nya. Lene mben Filistin ikwei bong ser minu ndig dima yok hagom.8 Njap di hyep bu mben Filistin di idem yam ei mem gima ipos ndigban leu tentara Israel ingut ikwei su lene ingat lo, Saul kin nipmot bat nya ibou ningai ingut jo ei Nungug Gilboa. 9 Lene irop Saul nitibou leu ba, ijuk nide sinsun pran leu lene isok ighyet tut nihyet di kei dima bak mben Filistin nindigsi yahagom kin ide kwar di ikuk yok bak cem. 10 Lene tentara Filistia ikon Saul de minggwen ug ei ide kwar Asytoret de ig nibousi leu api yahak ningut ei dihim ninggwenti ei minu ndig Bet-Sean.
11 Tirigi timiei Yabesh di ibong ei Gilead ikan tut notou mben Filistin ibibon Saul ningut lene, 12 ide pinai di mimbri kui ingkek nya ittei yam mem mmun bimbut kikau ug bipek Bet-Sean. Tirigi yuug krau tu lene icug Saul kin nipmot bat nya ingut leu biei nidihim pima bingkwei sut ug ei Yabesh leu api indig yahagom ingut kep hum a. 13 Lene iket nimai njum bitig ei biei tamariska nghousi ei minu ndig dima. Leu api igyem njita bi kikau ei ninsi njap nitindur muhwindacan.