Yonatan hati tut Daud
20
1 Lene Daud nang leu Nayot dideu minu ndig Rama buug um Yonatan ba, hig ser noni <<Dibon mun tunggwei nok mindei ngan i? Dibon sisar mindei ngan tut acig di bindei dino noni bungwam mem gima yai nimai bida hanyen i?>>2 Lene Yonatan buhup <<Apai nok gima au! Dipreu kep na tug hon TUHAN ninyeng bipia hi miyai nimai bina bi. Dicig no ndo igbit ningon kanti di bon ninyeng kin gi, bon ninyeng bi cem bida bit leu nok niyai kepti. Gima rino noni miku ningon kanti tut na leu da bi. Gima rino apaisi dima ne mun di nijit rin bi!>>
3 Noro Daud buhup <<Acig kan bipia singon ce yam bi. Gima rino noni kos tut bipia ndo ningon kanti tut da bina bi leu gima mibindei ba, angon buhun bibor. Deheng bitug hon TUHAN di niyaijo ninyeng bipia dikan tut bipia diyaijo ningwig honti dideu kwei su!>>
4 Lene Yonatan pai bak Daud <<Midiyai igbit leu angon kanti hak ug.>>
5 Gima rino Daud buhup <<Njap di hyep ne tto bou dem mem nibon Pesta Bed Jep rin ba, suar diyem njita bit nibou ndig bit leu diyai kepti. Ne gino ace tut lene midiku da nyahan ei beisi pima kikau bipek njap di can mmunti. 6 Gino acig ngat bipia dingat rin bidiyem njita bit noni bi lene ma abuhup bipia nanti asindui sut da bidingkwei hanyen ug ei Betlehem lewo tto bou dem mem dide bat nya yahagom ibon midut nindig mindhe titut kep humti bit leu nok igyai kepti bikwop ari bingwam sindam. 7 Gino acig buhup <Nok ug e!> Lene midingon jo nyahan. Ne gino ningon sibui sut da drek dip lene mijo nibreisi mem na bipia noni kos tut bipia yai nimai bida. 8 Ma aba nisinati dima bahati tut da ba, ayai igbit gi preu di sipreu ei biyam bou TUHAN niyai him nipou su. Gino ningat ne dingon mui su lene ma nanti ayai nimai bida hak ug! Noro ma akes da ei acig nindati au.>>
9 Lene Yonatan buhup <<Dwai! Gino dikan tut bipia dicig bungwam mem gima yai nimai bina lene midipai igbit bina yo.>>
10 Lo bi lene Daud hig ser noni <<Gino acig ba ningon di sibui bibuhup bina lene tou rima kwei pai sut bida i?>>
11 Lene Yonatan buhup <<Akwei ba, suug ei ngoi dumti. Lene imbut ug ei ngoi dumti.>> 12 Leu api Yonatan pai bak Daud <<Nnaba TUHAN di nok mben Israel ide Allah miap side nikos tutti dini ei nitingou nsi! Midihig pus dicig mem njap dihyep kin njap di can cem ei nituti di noyam kin nogindini. Gino ningon kwes kin na lene midisok dihyet bak nani. 13 Ne gino noni bungwam mem gima yai nimai bina lo, dipai sut bina bidibindei ba, angwes ngun bi lene ma Allah yai nimai bida hak drek dip. Handei kon ba, Allah misindem tut na bit leu nok Noni sindem tut dicig. 14 Ne gino ditug midut bi lene ma ayok ngon kep mun po sipreu ei biyam ba, angon gom tut da. Gino ditug midut lene, 15 ma angon gom tut dide bat nya bijo ninno bijo kikau. Mpe dino Allah bindei ba, ade siceu nya yahagom icut bak nani tu lene, 16 ma angon ngkwei leu side nipreu ei biyamti pima au. Noro jo kikau. Gino angon ngkwei leu side nipreu ei biyamti lene mporo Allah mikes hukum ei nani dip.>>
17 Lene Yonatan cuk Daud nimbican leu binhyepo Daud preu ei mem noni tut ide ningon ce yam bisi lewo Yonatan ningon ngakei Daud nindig bibor bit leu nok ningon ngakei nonti.
18 Lene Yonatan pai <<Gino ayem njita bit nye mem njap di hyep bi lene gima mijo nibreisi mem yo di hiter lewo gima ne Pesta Bed Jep ri. 19 Gino ayem njita bit nye mem njap nitindur can bi lene gima mijo nibreisi bibor mem yok. Gima rino ma aug ku na nyahan ei ngoi dumti pima leu api agwam nding tig di jo-jo yam dip ei mpia dima. 20 Mpe dima lene midiprindei tibor hammi tig dima yok mbiningai tereu nok diprindei ndiyokti. 21 Lene midicuk ditde awak bipia ug nggok tibor dima yok. Gino noni ug nggok lo, dipai <Tibor cut nite dini kwei ba, ayai kwei bida!> ne mijo nibreisi mem na bipia mun di buhun micut igkep nani bi apino ma akiju kwei ndam da. Deheng bitug hon Allah di niyaijo ninyeng bipia mun di buhun micut igkep nani bi. 22 Ne gino dipai binoni <Tibor cut nite dima ug!> ne mijo nibreisi mem na bipia Allah cuk na mem gima abrim amig ba, anang bihigom leu. 23 Lene tut gi preu di sipreu ei biyamti pima lene Allah minyohou tou kep sa ser nhyema singon ngkwei leu bi bijo ninno bijo kikau.>>
24 Lene Daud ku no nyahan ei ngoi dumti. Leu api Nibou Ndig Saul kwei yem Pesta Bed Jep, 25 bigwam ei nigwam kepti kui dring ba, Abner gwam simiak noni lene Yonatan gwam kui meja nite dima kwei lo, Daud nigwam kepti ngwak. 26 Noro Saul ningon a tut bi kikau njap dima lewo kan <<Mun nyeng gom pek kep mem Daud bibindei ba, map kui noti ser gima rino bit nibon midut dini bi a.>> 27 Njap di hyep bu ne njap gi nican mem Pesta Bed Jep rin lo, Daud nigwam kepti ngwak. Gima rino Saul hig ser Yonatan <<Nggon rino Daud yem pesta bit nye annani kin ammani cem bi i?>>
28 Lene Yonatan buhup <<Noni bidip huk da leu binhyepo disindui sut noni bingkwei hanyen ug ei Betlehem. 29 Bipai bida <Ma asindui sut bidingkwei hanyen lewo dide bat nya ibon midut nindig mindhe titut kep humti ei ditimieisi ba, dikindig jem da. Gima rino gino singon ce yam bi lene ma akes da bidicem kep dide bat nya.> Gima rino noni kwei gwam nigwam kepti kui ade meja dini bi a.>>
30 Tirigi Saul miap nihyet dima rino ningon sibui sut Yonatan nindig bibor bipai binoni <<Nani ne munggwom tirimpoi ri! Nogindini dikan tut bipia atti kin Daud ba, abinim kep nanti kin apmem jenti cem tu! 31 Gino disindui sut ba, Daud niyaijo lene mporo aya luei dohoti nok nibou ndig di ninyeng tak kep minu dini bi sren. Gini jo nibreisi mem na bi e? Gima rino ma acuk tungwatu nya ba, yuug nggok Daud bikat kwei lewo suar ma noni tug ndei nimai!>>
32 Lene Yonatan buhup <<Nggon rino suar ma noni tug ndei nimai i? Noni bon sisar mindei ngan i?>>
33 Saul miap nibuhupti di nok rino srer nide micim mem gima bidat Yonatan. Lene Yonatan ningon kan bipia nicig bungwam mem gima yai nimai bak Daud. 34 Lene noni ba ningon di sibui bibor tut nicig bikiju leu meja biyem njita hi bi ei njap gi nican ei Pesta Bed Jep dima. Noni krau ningon nindig bibor tut Daud drek dip nicig di bibon Daud kinei bibor nok gima.
35 Njap di hyep bu lene Yonatan ug ei ngoi dumti buum Daud bit leu nok gi po ice tut yamti pima bibuwak nide awak pinai gom bibit noni. 36 Lene pai bak mot dima <<Ador bibie mem gima aug yai tibor dima diprindei gau abousi kwei.>> Lene noni dor bibie leu api Yonatan prindei tibor gom gau nibousi. 37 Tirigi mot dima ug krau mpia dima rino Yonatan ba nihyet nindig pai binoni <<Tibor dima cut wer ting nima ug o! 38 Aya ayati dima hak au! Abrim amigya!>> Lene mot dima ngat igbit tibor nijoti bittei hanyen kwei bak niceu. 39 Noro ningon hukti tut Yonatan ningon kanti dima bi. Lewo Yonatan kin Daud yongkom ikan tut. 40 Lene Yonatan kes nide hampiap kin tibor nya ei mot dima nindati bicuk noni bingkwei sut hanyen ug ei ig bei.
41 Niabiati tirigi mot dima ug leu su lene Daud kiju leu niku no ei tig nggreti pima biba nibiau bicom mpia lene ba ningwak bikik dihyei mbiningai. Lene noni kin Yonatan inggriou yam ba, imei-mei nyen yam cem iba igyai nggwei di kibor nindig bibor bipim lo, Daud ningon ngguk biborti nindig dor njiriek Yonatan. 42 Lene Yonatan pai bak Daud <<Handei kon ba, Allah misindem tut na. Noni minyohou tou kep sa kin side nintun him yamti di bram yam nya ser nhyema singon kin yoni ingon mingkwei leu gi preu di sipreu ei mem yamti pima bi bijo ninno bijo kikau.>> Lene Daud kes noni ei bimbut leu api Yonatan ngkwei hanyen ug ei nide minu ndig.