7
1 Gima rino mben Kiryat-Yearim ikwei kon Brua Gi Preu dima biyuug sut lene ikes ei Abinadab nide ig di jo nai ei nungug tou. Lene ibon midut nita imam nijep bikon nipmot Eleazar leu binhyepo noni ngig niyai kep Brua Gi Preu.Samuel ninyeng tak kep mben Israel
2 Allah De Brua Gi Preu jo nijoti ei Kiryat-Yearim kikau mem ari bingwam ningot can lo, mben Israel no yahara Allah leu binhyepo Noni mikwei mpu yok.
3 Lene Samuel pingok mben Israel ingonti bipai biyok <<Gino jikos tut bipia jiba jingon titut yam bikuk je bak Allah lene ma jicom kwar Asytoret kin kwar nindigsi nya di jikuk je bak hagom leu je ug e. Lene ma jikes jenti titut yam bak Allah ba, jikuk je bak Nongkom cem leu api Noni miteu je leu mben Filistin indati.>> 4 Gima rino mben Israel icom ide kwar Baal kin ide kwar Asytoret cem hagom leu api ikuk yok bak Allah Nongkom.
5 Lene Samuel nduk mben Israel yahagom kwei ei Mizpa bipreu ei mem yok bipai <<Midingat nadi mem je ei mpia dima.>> 6 Gima rino yahagom induk yam kwei ei Mizpa ba, ibon midut nitau nisiber minyei ei Allah Noho bei. Leu api igyem njita bi ei ninsi njap nitindur gom dima. Yahagom ice tut yam bipai <<Nibon sisar tut Allah tu.>> (Ei minu Mizpa ne Samuel sindi gwam nok nikei ba, mbus mben Israel di iba ighyet dahat yam ingonti.) 7 Tirigi mben Filistin imiap tut bipia mben Israel induk yam kwei ei Mizpa lene ide nibou ndig ibou muhwi pima injei siceu bimbut tut ide tentara leu binhyepo ihwen yok. Mpe dino mben Israel imiap tut gima tu lene ittin tut nindig bibor. 8 Lene ibidip huk Samuel bipai bak <<Ma ahuk nadi bak Allah kikau leu binhyepo Noni miteu nye ba, ingwes ngun leu mben Filistin indati.>> 9 Gima rino Samuel bui domba mien ningut gom bibon midut nindig mindhe titut kep humti bak Allah. Gima ngwig lene noni ngat nadi leu binhyepo Allah mimpu Nide limwa di mben Israel. Apino Allah buhup nide nadi. 10 Samuel no bui kep domba mien pima lo, mben Filistin injei kwei bihwen yok. Noro Allah bindei ba, kru nindig bibor cut kros kwei leu mpia-bbed him ei mben Filistin dip binggek yok nindig bibor leu apino yahagom inang bingwig. 11 Lene tentara Israel injei siceu leu Mizpa ba, yuhuk mben Filistin kikau biyuug ei dideu Bet-Kar ba, ihwen yok kak puig sinon.
12 Lene Samuel ug yai tig gom bitas ei Mizpa kin Sen ikieti lene bipai <<Allah mpu nye kikau kwei bipek ammani kep tu.>> Leu api noni jem tig dima ninyeng bipia <<Tig Nibiyok Ngon Kep Allah Di Mpu Nye.>> 13 Nok gima rino mben Filistin icut bak mben Israel. Lene Allah bindei ba, bit bon yoni igya kep bihwen mben Israel bu bi kikau bipek Samuel niyaijo ningwig honti. 14 Lene mben Filistin itug minu nya di yoni ipos leu mben Israel ei Ekron kin Gat ikieti hagom hanyen biyok. Gima rino mben Israel inyeng tak kep ide minu nisurti-nipekti hagom hanyen bu. Mpe dima cem yoni kin mben Kanaan ingon kwes kin yam.
15 Samuel ninyeng tak kep mben Israel kikau bipek niyaijo ningwig honti. 16 Noni mbut-mbut nyen ug ei minu ndig Betel kin Gilgal kin Mizpa bikwop ari bingwam hagom sindam bigwam nok nikei leu binhyepo mbus tungwatu nya di iba ighyet dahat yam ingonti. 17 Bikwop mpe di noni yai midyai dima bingwig lene ngkwei hanyen ug ei nide ig ei minu ndig Rama bigwam nok nikei ei mpia dima bu. Lene noni dingug tig bijo-jo yam dip nok nimbar hum dok mem Allah ei minu ndig Rama.