Boas kin Rut iwak yam
4
1 Lene Boas ug ei dimbou hui di itu ei ngug tig di bikrop ttai minu dima bigwam nyahan. Mpia dima ne gumihyep di timiei Betlehem nya isimbot kep tut munhyet eisi ri. Mpe dima lene Elimelekh nide bat po ninyeng jo bibie leu Boas ninyeng pima kwei krau. Leu api Boas hig noni <<Disut na e, akwei gwam bit da.>> Gima rino no dima kwei gwam bit Boas. 2 Lene Boas ug buwak timiei Betlehem di inyeng jei nya ibou simnai kwei ba, kes yok bigwam bit noni. Tirigi yahagom igwam nyahan tu lene, 3 Boas pai bak Elimelekh nide bat pima <<Naomi kwei hanyen leu minu Moab tu ba, kos tut bipia mitri side bat Elimelekh de dihyei hanjop nsi gom ba, bipek mitiei. 4 Gima rino dipai sut brei bina leu binhyepo akan tut. Gino ajoi sut apek dihyei hanjop nsi dima lene ma apai hak nok bida ei yo dini yahagom yoho bei. Ne gino ajoi sut bi lene apai hak nok gima cem ei yahagom yoho bei. Lewo sahacem sitig mbier tut Elimelekh noro anyeng jo bibie leu da dinyenga.>>Lene no dima buhup <<Dijoi sut dipek dihyei hanjop nsi dima.>>
5 Lene Boas pai binoni <<Gino apek dihyei hanjop nsi di Naomi mitri dima lene suar awak Rut po kibom mben Moab pima nok atnem ndrim. Lene ma noni miyai nimunggwom bat nya tug hon nani leu binhyepo yoni miba yokep dihyei hanjop nsi dima nok ide dihyei ninda rom bu.>>
6 Lene no dima buhup <<Mbro nok gino dinyeng jo bibie leu anyeng mem gima dipek dihyei hanjop nsi dima lo, midipek bi. Lewo bit bon dimunggwom bat nya miba yokep hanjop nsi dima leu da hanyen bi. Nna ba nani apek dihyei dima hak ug lewo dikou sut.>>
7 Ei nijam dima ne tirigi mben Israel itri ide dihyei hanjop nsi bipek hiter ide dihyei hanjop nsi cem lene ibon nibon midut nyeng gom dini. No di mitri dihyei hanjop nsi mikwek nide srop leu nimig jou biyai bak no di mipek dihyei hanjop nsi dima. Tug hon nibon midut dima lene jo nibreisi mem mben Israel bipia mun dima tug hon ningkiemti tu.
8 Gima rino tirigi no dima pai bak Boas <<Nnaba nani apek dihyei dima hak ug>> lene noni kwek nide srop leu nimig jou biyai bak Boas. 9 Leu api Boas pai bak yo di inyeng jei pima kin yo di nindigsi di ingat rin ei mpia dima <<Jahagom jingat bou jiyai him bipia dipek mun di Elimelekh kin Kilyon kin Mahlon yoni inyeng tut hagom leu Naomi mem njap di ammani tu. 10 Lene dibiyai Rut di kibom timiei mben Moab po nijjep Mahlon mai leu noni tu pima cem binok ditnem. Tug hon nisinati dima lene yo di intun Mahlon him minyeng tak kep dihyei hanjop nsi dima bijem Mahlon nok ide pung di intun him cem kikau ei nitimieisi dini. Jingat mun dini yok hagom bou jiyai him ammani tu.>>
11 Lene yo dima yahagom isimbot dat bipai <<Igbit ri. Ningat hagom bou niyai him tu. Handei kon ba, TUHAN bindei ba, atnem noyam kin Rakhel kin Lea po igyai imunggwom bat nya imang bibor bak Yakub mimbrek ngan tu pima. Nnaba ma anyeng bibor ei ade bat di itig mbier tut Efrata ikieti ba, anyeng jei bibor ei Betlehem. 12 Handei kon ba, TUHAN bindei ba, ayai amunggwom bat nya tug hon misop dini. Nnaba ma ade keret noyam kin keret Peres po Yehuda kin Tamar ipmot pima.>>
Boas kin yo di intun noni him
13 Lene Boas buwak Rut nok nitnem. Apino TUHAN yai gi kei biyok bibindei ba, Rut nghop ba, yai nipmot. 14 Mpe dima lene sop nya ingon llei sut Naomi bipai binoni <<Jikwei ba, yahagom inggei sut TUHAN! Lewo Noni yai adrot nipinai gom bina njap di ammani apino mot dima minyohou na. Handei kon ba, mben Israel ikon ninyeng di jei. 15 Agnyot ngondut na nindig bibor. Mun di noni bibon binani kei bibor dor njiriek gino apmot bat nya ibou muhwindacan mibibon bina. Nogindini noni yai adrot nipinai gom bina lene mot dima mibindei ba, angon kei bibor hanyen bu lene minyohou na ei awer sindig-ndausi cem.>> 16 Lene Naomi hon ningwoi dima binggriou leu api nyohou noni nok gi kei.
17 Mpe dima lene Naomi nisut bat di sop nya ijem ningwoi dima ninyeng Obed. Itri tut <<Rut srek tut nipmot bibindei ba, Naomi yai nidrot nipinai gom tu!>>
Tirigi Obed ndig su lene noni yai nipmot Isai lene Isai yai nipmot Daud.
18 Daud de pung di ntun him rino Peres. Peres yai nipmot Hezron lene Hezron yai nipmot Ram. 19 Lene Ram yai nipmot Aminadab. 20 Lene Aminadab yai nipmot Nahason lene Nahason yai nipmot Salmon. 21 Lene Salmon yai nipmot Boas lene Boas yai nipmot Obed. 22 Lene Obed yai nipmot Isai lene Isai yai nipmot Daud.