Boas kin Rut ingwam kep yam
3
1 Jei bi lene Naomi pai bak Rut <<Suar dibrim dingkek bidibindei ba, awak ajjep ba, ayai amunggwom bat nya cem. 2 Ma ayok ngon kep bipia Boas po sindui sut di ambus gandum-barli bit nide awak sop dima yok pima tig mbier tut sa. Amiap e, ariman mmunti lene noni millet gandum ninjep leu nisina bai. 3 Gima rino ma aug kek minyeiti ba, aba mini mbris bidip nac ba, anghap ui-gwang kei lene ma ajuk ade sinsun di kei bibor kei. Lene ma ambris nyahan ug ei nide ig gudan di ittei gandum eisi leu binhyepo noni kan tut akweisi bi bibou yem njita ba, dut ba anggur ngei bingwig leu ug e. 4 Lene ma angig ayai kep nghim nsi tirigi noni bong nyahan eisi. Niabiati tirigi noni bong mai leu su leu api ambris nyahan ug ei nghim nsi dima ba, akon nide ban dut ninghas him leu api abong nyahan ei nimig him.d Leu api Boas mipai igbit ningon kanti bina.>>5 Lene Rut buhup <<Midiyai hagom bit leu nok acuk dati.>>
6 Noni ug ei ig gudan di illet gandum leu nisina bai eisi biyai hagom bit leu nok nignyot nicuk noti. 7 Niabiati Boas yem njita ba, dut ba anggur ngei bindei no tu lene ningon llei bibor. Gima rino noni ug bong ei gandum nintam di iroi keyam ei su dip. Tirigi noni bong mai leu su lene Rut mbris nyahan ug ei mpia dima bikon ban dut ninghas him leu api bong nyahan ei Boas nimig him. 8 Lo bi lene himmun dima Boas kiju kros bikiek no lene drui sut bingat lo, misop gom no bong sir nimig him a. 9 Gima rino Boas hig ser noni <<Anyeng tou i?>>
Lene Rut buhup <<Andigpoi e, dani ne Rut pima ri. Nani ne dide bat ri. Gima rino suar abrim angkek mem gima anyohou da. Gino na di Andigpoi ajoi sut da lene ma abuwak da bidinok atnem e?>>
10 Lene Boas buhup <<Nnaba TUHAN minjei mun di kei bak nani lewo gino ibinai ayai munti dini kin mun di abibon bak agnyot lene ayai munti di nogindini bindo tut ade ningon ngakeisi di nindig bibor dor njiriek bu. Mbro nok gino bon nituti mem gima ajem ajjep bit pinai pilei di nyeng hi e, he no di nuhui mbum hi e lo, ayai nok gima bi. 11 Rut e, ma akrau angon tut mun nyeng hi bu au. Midiyai hagom bit leu nok ahara da tutti lewo timiei minu dini yahagom ikan tut bipia nani ne sop di singat kei ri. 12 Mbro nok gino dani ne ade bat rin ba, suar dibrim dingkek mem gima dinyohou na lo, ade bat hiter di ninyeng jo bibie leu da dinyeng di suar noni yai nituti mem gima nyohou nani nipou ug e. 13 Ma agwam nyahan ei mpia dini binjap kep leu api midimbus no dima ningonti mem njap bigyoti leu binhyepo ningon kanti tut gima noni brim ningkek mem gima nyohou na mijo nibreisi mem da. Gino noni joi sut na lene dem. Gi bi lene diba neheng bipai tug hon Allah di niyaijo ninyeng bipia midibrim dingkek mem gima dinyohou na. Noro ma abong nyahan binjap ug e.>>
14 Gima rino Rut bong mai ei Boas nimig him binjap kep noro kiju bimbut mem ha yausi leu binhyepo tungwatu nya ingat noni bi. Ba, Boas cem joi sut gima hi kan tut Rut nikwei ei ig gudanti dima bi. 15 Nipou tirigi Rut mbut bigyo lene Boas pai binoni <<Ma acug ade ban ba, angig ei ansan dip.>> Noni yai bit leu Boas nicuk noti leu api Boas kwas gandum-barli ningan kilo ningot can biniken tut noni. Tirigi Boas kon ban tut ei Rut ninghat dip lene Rut mbut tut bingkwei hanyen ug ei nide ig. 16 Tirigi noni coi ug ei ig bei tu lene Naomi hig ser noni <<Dipmisop na e, ayai hagom nok gi igbit tu e?>>
Lene Rut pui sut notou Boas bibon noni bimpu noni cem hagom bak. 17 Lene Rut binut bu bipai <<Boas kwas gandum-barli ningan dini yok hagom tut da mikuisi lewo noni pai bipia kei mem gima dingkwei hanyen ndam amei ei igbei nsi kin gi dehei he bi.>>
18 Gima rino Naomi pai binoni <<Rut e, ma abet angon mem mun di mipek kep mem na lewo Boas mita nibou ei nimbus no dima ningonti njap di ammani bibou tug hon ningkiemti ug e.>>